‑Lagɔnyɩmaa 'yugalɩnya
3
‑We na yia gbaa gbʋzɔnʋ ‑wa,
nɩɩ,
nyɩmɛ ‑ka gba ɔ 'ka ‑Lagɔnyɩmaa 'yugalɩnyɔ ‑zɛ,
lubho ‑zɔnʋ ɔ 'yɩbhaa.
2 ‑Lagɔnyɩmaa 'yugalɩnyɔ mɩa,
ɔ ‑mɩ tɩklɩɩ,
wa 'na 'ŋwuŋweni ɔ zɔ ‑nɩ.
Ɔ ‑mɩ 'ŋwnɔ ‑bhloo 'lowli nya,
ɔ ‑mɩ sa 'cɛ.
Ɔ yibheli ɔ 'dɛ kpa sa.
‑We nanɩa 'yli,
'mʋ ɔ 'kaa lɛnʋ,
ɔ kpa 'lakpanya sa 'nanʋʋ,
'ɩn ɔ yibheli gbʋ ‑slolu sa.
3 Ɔ 'na ‑zɛlɩ nʋbhanyɔ ‑nɩ.
Ɔ 'na ‑zɛlɩ ‑gɔlʋgʋnyɔ ‑nɩ.
Ɔ 'na ‑zɛlɩ 'gwɛzii zɛ ‑zʋnyɔ ‑nɩ.
4 Ɔ yibheli ɔ 'dɛɛ ‑buduŋwɛɛ 'yliyɔzʋ sa.
Ɔ zʋ ɔ 'yua sɔ ‑we lʋ wa 'kaa ɔ 'nʋŋwɛ zʋ sazɔnʋ sa.
5 Nɩɩ,
nyɩmɛ ‑ɔ 'nɩa mneni ɔ 'ka ɔ 'dɛɛ ‑buduŋwɛɛ 'yliyɔzʋ,
ɔ 'nɩ mneni ɔ 'ka ‑Lagɔnyɩma 'yliyɔzʋ.
6 Nyɩmɛ ‑ɔ 'nyɛa ɔ 'dɛ ‑Lagɔ yoo 'lulolu,
we 'na ‑zɛlɩ ‑mɔɔ ‑nɩ,
we 'nɩ ‑mʋʋʋ,
'ɩn ‑mɔɔ ylimanɩa ‑mɔɔ 'dɛ,
'ɩn ‑Lagɔ dɩlɩa ‑mɔɔ gbʋ,
sa ɔ dɩlɩa ‑Saatan gbʋ.
7 ‑Ɔ 'kaa ‑Lagɔnyɩma 'yugalɩ,
ɔ nʋ gbʋzɔnʋ lɛ,
'ɩn ɔ ‑mɩ 'nʋŋwɛzʋ sa,
‑wa 'nɩa ‑Lagɔ ‑yi,
wa 'yliya 'wʋ,
we 'nɩ ‑mʋʋʋ,
'ɩn ‑maa nyɛa ɔ 'wʋ,
'ɩn ɔ bhoa ‑Saatan ‑lubhu ŋwɛ.
*Diaklɩ ‑lubho
8 'Sa ‑bhlokpadɛ,
diaklɩ ‑mɩ 'nʋŋwɛzʋ sa.
Wa 'na 'tʋbhʋlʋ yo ‑nɩ.
Wa 'na 'ma ‑nɩ nʋ duun ‑nɩ.
Wa 'na ‑talɩ 'gwɛzi la ‑dawli nya ‑nɩ.
9 Gbʋzɔnʋ ‑we ‑Lagɔ wlelia ‑aɩn ‑yla zlɩ 'klʋ,
wa ‑tʋ we 'klilida dlɩ weee nya.
10 A ‑ka amɩaa diaklɩnya ‑bha ‑saa yi,
a yla wa la.
Wa 'nɩ gbʋnyuu kwɛ ‑ka,
wa nʋ diaklɩ ‑lubho.
11 'Sa ‑bhlokpadɛ,
wa 'ŋwnɩ ‑mɩ 'nʋŋwɛzʋ sa,
wa 'na ‑zɛlɩ fɛn ‑cɩan ‑nɩ.
Wa ‑mɩ 'cɛ.
‑We mɩa ‑lu ‑zɔnʋ nya,
wa nʋ we lɛ 'ylɩ weee nya.
12 Waa diaklɩ mɩa,
wa ‑mɩ 'ŋwnɩ ‑bhlo ‑bhloo 'lowli nya.
Wa yibheli wa 'yua ‑yɔ wa ‑buduŋwɛɛ kpa sa.
13 Wa ‑ka wa lubho nʋ 'nanʋʋ,
'ɩn wa zʋa wa 'nʋŋwɛ,
'ɩn wa zʋa wa dlɩ weee ‑Zezu Klisɩ ‑gʋ,
wa 'na 'ka dlɩ lʋ.
Gbʋ 'kadʋ ‑Lagɔ ‑slolua ‑aɩn
14 Ɩn mɩ 'sɛbhɛ nɩ cɛlɩda,
‑zugba na dlɩ mɩ nɩɩ,
ɩn 'ka ‑mɩ 'yɩa mnɩ daylɩ.
15 Ɩn ‑ka ‑seli ‑gwlɛda ‑mɩ,
‑a 'nɩ 'yɩylɩda ‑mɩ ‑pa,
'sɛbhɛ nɩ ‑na yia 'yɩa,
sanɛɛ ‑na yibhelia sa wa 'kaa ‑Lagɔ zʋayli nɔ,
mʋ ‑wa 'yliyɔga ‑Lagɔɔ leglizɩ.
Wee leglizɩ ‑gʋ gbʋzɔnʋ ‑dɩa la,
'ɩn 'mʋ wa 'kaa lakpa ‑kli.
16 Nɩɩ,
gbʋzɔnʋ ‑wa,
wɛlɩ ‑we gbaa sa ‑a 'kaa ‑Lagɔɔ 'yloogblʋ nɔ,
‑we mɩ yaa zizeda,
‑Lagɔ ka we ‑aɩn 'klʋslolu,
wee wɛlɩ 'yli.
'Mɔ wa 'yɩa nyɩmɛ nya,
'mɔ Zuzu 'Pʋpa 'yɩa nyɩmɛ tɩklɩɩ nya,
'mɔ 'anzɩ 'yɩa ‑yɔ,
ɔ gbʋ wa gbaa 'lakpanya ‑yla.
'Mɔ wa zʋa dlɩ ‑gʋ dʋdʋ ‑gʋ,
'mɔ ‑Lagɔ 'bhua 'wʋ ɔ 'ŋnɩmnɩe 'wʋ.