'Sɛbhɛɛ 'sɔnʋ Pɔlʋ 'paa Tɛsalonikɩ ‑nyɩma yoo
Pɔlʋ ‑saa Tɛsalonikɩ ‑nyɩma fʋ
1
‑Amɩ Pɔlʋ cɛlɩa 'sɛbhɛ nɩ,
we ‑yɔ Silasɩ ‑yɔ Timotee 'sɔ.
Amɩa,
leglizɩ ‑we mɩa Tɛsalonikɩ,
Dide ‑Lagɔ ‑yɔ Nyɩmaa ‑Kanyɔ ‑Zezu Klisɩɩ sɔ nya,
amɩa ‑a cɛlɩa 'wʋ.
2 Nɩɩ,
Dide ‑Lagɔ ‑yɔ Nyɩmaa ‑Kanyɔ ‑Zezu Klisɩ ŋwna aɩn 'nyu la,
'ɩn wa 'nyɛ aɩn 'wʋtʋtʋe ‑dlɔɔ.
‑Lagɔɔ gbʋwʋbhubhue tɩklɩɩ
3 Bheliaɩn,
we mɩ ‑amɩaa dlɩ zɔ,
‑a 'ka ‑Lagɔ fuo 'pa amɩaa 'gbʋ 'ylɩ weee nya.
Nɩɩ,
dlɩ a zʋa ‑Zezu ‑gʋ,
we mɩ ‑gʋbhoda,
'ɩn amɩaa zɛkɩkalɩdlɩ mɩ ‑gʋ 'wʋlaylimanɩda,
we 'gbʋ,
we mɩ tɩklɩɩ,
‑a 'ka ‑Lagɔ fuo 'pa.
4 We 'gbʋ ‑bhlokpadɛ,
amɩaa 'gbʋ ‑a slolua ‑amɩaa 'dɛ ‑Lagɔnyɩma glaa.
Gbʋ ‑we ka 'gbʋ ‑a slolua ‑amɩaa 'dɛ,
mʋ ‑wa nɩɩ,
a mɩ sɩada,
wa mɩ aɩn 'klɩyɩe 'wʋpalɩda,
'ɩn a yia dlɩtie 'yɩ,
a 'nɩ ‑Lagɔ dlɩ ‑gʋ ‑sa.
5 Wee gbʋ nɩ slolua nɩɩ,
‑Lagɔɔ gbʋwʋbhubhue tɩklɩɩ.
Nɩɩ,
gbʋ ‑we weee lʋ amɩa 'plɩlɩda,
‑wa ‑Lagɔ pɩlɩa 'wlu la,
a 'ka wa ‑zɛɛ gbʋa.
‑Lagɔɔ nyɩmaa 'wlulapɩlɩe mɩa,
we 'gbʋ a mɩa sɩada.
6 Nɩɩ,
‑we mɩa tɩklɩɩ,
'mʋ ‑Lagɔ yia lɛnʋa.
‑Wa mɩa aɩn sɩalɩda,
sɩalɩa ɔ yia wa.
7 Mɔ yia aɩn sɩasɩe 'wʋsaa,
a ‑yɔ ‑aɩn 'sɔ.
Lɛ ɔ yia we nʋa,
da wa yia ‑amɩaa ‑Kanyɔ ‑Zezu 'yɩa,
‑mɔ yalɩ,
ɔ ‑yɔ ɔ 'anzɩ 'tɩtɛnya 'sɔ.
8 Yia ɔ yia ‑kosuu mɩɔ ‑we 'ylia nya,
‑wa 'nɩa ‑Lagɔ ‑yi we ‑yɔ ‑wa 'nɩa ‑amɩaa ‑Kanyɔ ‑Zezu Klisɩɩ gbʋ ‑yɔŋwnu,
ɔ 'ka wa ‑kaslʋ 'wʋpa.
9 Waa nyɩma mɩa dɛ,
‑Lagɔ yia wa ‑kaslʋ 'wʋpaa,
'ɩn ɔ 'ka wa lasa 'ylɩ weee ‑nʋ nya.
Wa 'na 'ka ‑amɩaa ‑Kanyɔ kwesi ‑mɩ.
Ɔ ‑ka yi,
wa 'na 'ka ɔ 'tɩtɛ ‑yɔ ɔ 'ŋnɩmnɩe ‑yɔyɩ.
10 Wee ylɩ mɩa,
we nya ɔ yia yia,
ɔ nyɩma tɩklɩɩ 'ka ɔ 'ŋnɩ 'ylimanɩ,
'ɩn ‑wa ‑ka ɔ dlɩ ‑gʋ zʋ,
wa 'ka ɔ yla 'mʋna nya.
Amɩaa 'dɛ,
glaa a yia wa ‑mɩa.
‑We ka gbʋ ‑wa,
a ka ‑amɩaa gbʋdayɩwɛlɩ dlɩ ‑gʋ zʋ.
11 We 'dɛɛ 'gbʋ,
‑a bhubhoea ‑Lagɔ 'ylɩ weee nya amɩaa 'gbʋ.
A ‑zlalɩ ‑Lagɔ,
a 'ka ‑mɩ 'nanʋʋ,
'ɩn 'yoo ‑we ka 'gbʋ ɔ yia aɩn la,
a 'ka we ‑gʋ nɔ tɩklɩɩ.
Gbʋzɔnʋʋ lɛnʋee 'tʋ ‑we mɩa aɩn 'bhada,
‑Lagɔɔ 'tɩtɛ 'ka aɩn ‑yɔbɛ,
a 'ka we lɛnʋ,
'ɩn ‑we a nʋa lɛ amɩaa dlɩ mɩ ‑Lagɔ ‑gʋʋ 'gbʋ,
we 'ka we ‑gʋ yeli.
12 We ‑ka 'sa 'plɩda ‑mɩ nɩ,
‑amɩaa ‑Kanyɔ ‑Zezuu ŋnɩ yia 'ylimanɩa amɩaa 'gbʋ,
'ɩn amɩaa 'ŋnɩ 'ka 'ylimanɩ ɔnʋʋ 'gbʋ.
‑We ka 'gbʋ ɔ 'kaa we lɛnʋ,
mʋ ‑wa nɩɩ,
‑amɩaa ‑Lagɔ ‑yɔ Nyɩmaa ‑Kanyɔ ‑Zezu Klisɩ ka aɩn 'nanɩ 'wʋnʋ.