4
Amɩa nyɩmaa ‑cɩan,
a zʋ amɩaa galɩ 'nanʋʋ,
'ɩn a nʋ ‑we mɩa tɩklɩɩ lɛ wa ‑yla.
A yibheli we 'ji nɩɩ,
amɩa ka 'ya ‑Kanyɔ yalɩ.
'Dɩzʋwɛlɩ
2 A ‑tʋ ‑Lagɔ bhubhoeda 'kɔmʋʋ,
amɩaa dlɩ ‑tʋ ‑gada,
'ɩn a 'ka ‑Lagɔ fuo 'pada ‑tʋ 'ylɩ weee nya.
3 A bhubhoe 'ya ‑Lagɔ ‑amɩanʋʋ 'gbʋ ‑nya,
'ɩn ‑Lagɔ 'ka ‑aɩn 'yoo 'nyɛ,
‑a 'ka ɔ gbʋ gba nyɩma ‑yla.
Klisɩɩ gbʋ mɩa zizeda,
‑a mneni ‑a 'ka we gba,
we 'gbʋ ɩn mɩa ‑seli ‑kaslʋ 'wʋ.
4 A bhubhoe ‑Lagɔ,
'ɩn sa ɩn 'kaa we ‑slolu,
ɩn 'ka 'sa we gba kpɛɛn kpɛɛn.
5 A zʋ amɩaa nɔnɔbhʋ 'yliyɔ,
‑wa 'nɩa ‑Lagɔ 'wʋ ‑mɩɩ gbɛgbɛɩn,
gbʋyilo sa.
Bhla ‑we ‑Lagɔ nyɛa aɩn wa nya nɩ,
a 'na ‑nyumɔnʋ we la ‑nɩ.
6 Amɩaa ŋwɛɛ wɛlɩ ‑mɩ tɩklɩɩ 'ylɩ weee nya,
we ‑mɩ gumu 'bhisa,
'ɩn a yibheli nyɩma ‑yla gbʋʋ 'bɩgʋpalɩ sa 'nanʋʋ.
Fʋsawɛlɩ 'wʋbhlolunʋ
7 ‑Amɩaa bheli ‑zɔnʋ Tisikɩ,
‑ɔ mɩa lubhonʋnyɔ tɩklɩɩ nya,
‑ɔ na ‑yɔ ɔ nʋa Nyɩmaa ‑Kanyɔɔ lubho,
mɔ yia aɩn ‑yla na ‑gbɛ ‑gbʋ weee gbaa.
8 Na 'dɛɛ 'yibadɩ ɩn tiea ɔ amɩaa ‑gbɛ,
a 'ka ‑amɩaa ‑gbɛ gbʋ yibheli,
'ɩn ɔ 'ka amɩaa dlɩ latɛmanɩ.
9 Tisikɩ ‑yɔ amɩaa 'yɩbha 'yɩbha ‑bheli tɩklɩɩ Onezimʋ ɩn tiea da aɩn 'wʋ,
'ɩn wa 'ka ‑we weee mɩa ‑seli 'plɩda ‑amɩaa ‑gbɛ aɩn ‑yla gba.
10 Alisɩtakɩ ɩn ‑yɔ ɔ 'sɔ mɩa ‑kaslʋ 'wʋ nɩ,
ɔ nɛɛ,
ɔ ‑sa aɩn fʋ.
We ‑yɔ 'ya Banabasɩɩ didee bhelii 'yu Malɩkɩ,
‑ɔ ka gbʋ wa gbaa aɩn ‑yla nɩ,
ɔ ‑ka amɩaa ‑gbɛ mnɩ,
a kpa ɔ 'nanʋʋ.
11 ‑Zezu ‑ɔ wa laa Zutusɩ sa 'yaa aɩn fʋ.
‑Zuifʋ ‑wa ‑zɛa ‑Lagɔnyɩma glaa,
waa nyɩma ta ‑manɩ ‑bhlogbɔɔ nya na nʋa ‑Lagɔɔ nyɩmaa 'wlulapɩlɩ ‑lubho.
Ma paa 'mɩ 'kʋayli.
12 Epaflasɩ ‑ɔ ‑wa amɩaa ‑zɔɔ ‑bheli nɩ,
ɔ nɛɛ,
ɔ ‑sa aɩn fʋ.
‑Zezu Klisɩɩ lubhonʋnyɔɔ 'zayli ɔ ‑mɩa:
'kɔmʋʋ,
ɔ mɩ lagʋda,
‑zugba ɔ bhubhoe ‑Lagɔ amɩaa 'gbʋ.
Ɔ 'yɩbha a ‑tʋ ‑Lagɔnyɩma genyii ‑yɔ ‑wa sʋan la nya ‑Lagɔ 'yu,
'ɩn a 'ka ɔ dʋmagbʋ lɛnʋ 'ylɩ weee nya.
13 Ɩn mneni ɩn 'ka ɔ daa gba nɩɩ,
amɩa klaa,
Laodisee ‑yɔ Ielapolisɩ ‑nyɩmaa 'gbʋ,
ɔ mɩ sɩada.
14 ‑Dɔtlɔɔ ‑yu Lukɩ ‑ɔ ka zɛ ‑a ‑kalɩa bhabha,
ɔ ‑yɔ Demasɩ 'sɔ nɛɛ wa ‑sa aɩn fʋ.
15 Amɩaa bhelia ‑yɔ amɩaa bhɔlɔa mɩa Laodisee,
a ‑sa wa fʋ,
we ‑yɔ Nɛfaa ‑yɔ leglizɩ ‑we gbelia 'wlu ɔ ‑budu zɔ.
16 Nɩɩ,
a ‑ka 'mʋ 'sɛbhɛ nɩ zɛlɩ amɩaa ‑gbɛ nɩ,
a 'pa we yoo Laodiseee leglizɩɩ ‑gbɛ.
'Ɩn wa 'ka 'ya we zɛlɩ ‑maa nyɩdɩ.
'Ɩn ‑we ɩn 'paa Laodisee ‑nyɩma yoo,
we ‑ka amɩaa ‑gbɛ nyni,
amɩa zɛlɩ 'ya ‑mʋʋ.
17 A 'tʋlʋ Alɩsipʋ nɩɩ,
ɔ zʋ ɔ 'dɛ 'yliyɔ,
Nyɩmaa ‑Kanyɔɔ lubho ‑we ka 'gba wa dɩa ɔ 'wlu,
ɔ 'ka we nʋ tɩklɩɩ.
18 ‑Amɩ Pɔlʋ mɩa ‑slɛɛn da fʋsawɛlɩ ‑mɩnɩ cɛlɩda na 'dɛɛ sɔ nya:
ɩn ‑sa aɩn fʋ.
A 'na dlʋlʋ ‑nɩ,
nɩɩ,
ɩn mɩ ‑kaslʋ 'wʋ ‑nɩ.
‑Lagɔɔ 'nanɩdlɩ ‑yɔ aɩn ‑mɩ.