'Sɛbhɛ Pɔlʋ 'paa ‑Galasii ‑nyɩma yoo
Fʋsawɛlɩ
1
1‑2 ‑Amɩ ‑Zezu Klisɩɩ tietienyɔ Pɔlʋ ‑yɔ ‑Lagɔbhelia weee mɩa ‑seli, ‑amɩa cɛlɩa da ‑Galasiii leglizɩnya 'sɛbhɛ nɩ 'wʋ. Nyɩma 'nɩ 'mɩ lapalɩ, 'ɩn nyɩmɛ yabhlogbɔɔ 'nɩ we 'kɔlʋ nya ‑mɩ. ‑Zezu Klisɩ ‑yɔ Dide ‑Lagɔ ‑ɔ 'bhua ɔ 'wʋ tlɩtlɩnya glaa, ma palɩa 'mɩ la. 3 ‑Amɩaa Dide ‑Lagɔ ‑yɔ ‑amɩaa ‑Kanyɔ ‑Zezu Klisɩ ŋwna aɩn 'nyu la,
'ɩn wa 'nyɛ aɩn 'wʋtʋtʋe ‑dlɔɔ.
4 Klisɩ ka ɔ 'dɛ wla ‑amɩaa gbʋnyuuu 'gbʋ,
ɔ 'ka ‑aɩn pue,
'ɩn ɔ 'ka ‑aɩn bhla 'nyii ‑mɩnɩ kwɛɛ ‑sa,
‑amɩaa Dide ‑Lagɔɔ dʋmagbʋ nya.
5 ‑Lagɔɔ 'ŋnɩ 'ylimanɩ 'kɔmʋʋ!
‑Amɛnɩ!
‑Lagɔgbʋ ‑putu 'nɩ ‑mɩ
6 Amɩa ‑Lagɔ laa [Klisɩɩ] 'nanɩ nya,
a 'ka ɔ 'bɩbhʋ sa slʋɩ,
'ɩn a 'ka gbʋslolusɔ ‑putu 'bɩbholu ‑Lagɔgbʋ 'bhisa,
‑mʋʋ ka 'mɩ ŋwɛgaga ‑sʋbhalɩ.
7 Nɩɩ,
‑Lagɔgbʋ ‑putu 'nɩ ‑mɩ.
Nyɩma tɔlʋa mɩ ‑bha,
‑wa 'yɩbhaa wa 'ka Klisɩɩ ‑Lagɔgbʋ 'bhiti saputu sa,
ma nʋa amɩaa dlɩ zɔ bidi ‑bidi bidi.
8 'Ɩn,
we yi ‑amɩaa 'dɛgbolu ‑zɛ,
we yi yalɩɩ 'anzɩ yabhlo ‑zɛ,
‑Lagɔgbʋ ‑a gbaa da aɩn ‑yla,
‑ɔ ‑ka we 'bhiti saputu sa,
'kple kpa ɔ!
9 ‑A ka we gba aɩn ‑yla pepe,
'ɩn 'mʋ na gba 'yaa da aɩn ‑yla ‑slɛɛn:
‑Lagɔgbʋ a 'nʋa tɩa,
‑ɔ ‑ka we 'bhiti saputu sa,
'kple kpa ɔ!
10 'Lee,
nyɩma 'ka 'mɩ 'ŋnɩ kwalɩɩ da ɩn mɩa ‑talɩda,
yaayɩɩ,
‑Lagɔɔ ‑nʋ ‑wa yɩ?
‑Ɩnnya,
‑Lagɔɔ ‑nʋ ɩn 'yɩbhaa.
'Lee,
ɩn 'ka nyɩmaa dʋdʋnamanɩɩ da ɩn mɩa ‑talɩda yɩ?
Ɩn ‑ka yaa nyɩmaa dʋdʋnamanɩee datalɩda ‑mɩ,
ɩn 'na 'ka yaa Klisɩɩ lubhonʋnyɔ ‑zɛ.
‑Lagɔ ka ‑bha Pɔlʋ ‑sa ‑Zezuu tietienyɔ nya
11 Nɩɩ,
na bhelia,
ɩn nɛɛ aɩn ‑ylaɛ:
‑Lagɔgbʋ na gbaa da,
we'e 'bhʋ nyɩmɛɛ ‑gbɛ.
12 Nɩɩ,
we ‑ka ‑amɩ,
nyɩmɛ 'nɩ 'mɩ we 'nyɛ,
'ɩn nyɩmɛ yabhlogbɔɔ 'nɩ 'mɩ we ‑slolu,
‑Zezu Klisɩ ‑slolua 'mɩ we 'klʋ.
13 Ɩn mɩ bhaa Zuifʋʋ ‑Lagɔbʋbɔ ‑yloogblʋ,
sa na nɔa a ka we 'nʋ.
Sa na palɩa ‑Lagɔɔ leglizɩnya 'klɩyɩe 'wʋ 'kʋa 'tɩtɛ nya,
ɩn 'ka wa lasaa 'gbʋ,
a ‑yi we 'ji.
14 Ɩn mɩ bhaa Zuifʋʋ ‑Lagɔbʋbɔ ‑yloogblʋ,
ɩn ‑zi na ‑lima 'wʋ Zuifʋ glaa,
'ɩn ɩn dolu ‑gʋla bhabha,
ɩn ‑zi wa,
‑amɩaa dʋkpasɩɩ lɛnʋgbʋ 'wʋ.
15‑16 'Ɩn, ‑mʋʋ weee 'yu, ‑Lagɔ ka ‑bha 'mɩ ‑sa pepe, ‑zugba ɩn mɩ ‑slɔ na 'nyaaa nʋkplɛ, 'ɩn ɔ yia 'mɩ la ɔ 'nanɩ nya, ɩn 'ka ɔ lubho nʋ. Da we namanɩa ‑Lagɔ dʋdʋ ɔ 'ka 'mɩ 'wʋ ɔ 'Yu ‑slolu, 'ɩn ɩn 'ka ‑mɔɔ gbʋ gba nyɩma ‑wa 'nɩa Zuifʋ ‑yla, ‑bha ‑bhlokpadɛ ɩn 'nɩ nyɩmɛ yabhlogbɔɔ 'dɩzʋwɛlɩ layɩbha.
17 'Ɩn ‑wa ‑zɛa 'mɩ 'yu ‑Zezuu tietienya,
ɩn 'nɩ ‑maa ‑gbɛ mnɩ ‑Zeluzalɛmʋ,
nɩɩ,
‑bhagɩgalɩda ɩn mnɩa Alabii ‑dʋdʋ ‑gʋ,
'bhie,
ɩn yia lʋbhiti ‑Damasɩgbe nʋkplɛ.
18 ‑Zʋ ta 'plɩa,
'ɩn ɩn yia ‑Zeluzalɛmʋ mnɩ,
Piɛlɩɩ yibheliee 'gbʋ.
'Ɩn ɩn li ɔ ‑gbɛ 'ylɩ kugbua lɛ gbu.
19 Nɩɩ,
we 'nɩ Piɛlɩ ‑yɔ Nyɩmaa ‑Kanyɔɔ bheli 'Zake 'wʋbhʋ,
ɩn 'nɩ ‑Zezuu tietienyɔ ‑putu 'yɩ 'yli nya.
20 ‑We na cɛlɩa da aɩn 'wʋ,
gbʋzɔnʋ ‑wa,
'ɩn ‑Lagɔɔ 'dɛ ‑yi we 'ji nɩɩ,
ɩn 'nɩa yotʋbhʋ.
21 ‑Mʋʋ 'bɩgʋ,
'ɩn ɩn yia Silii ‑yɔ Silisi ‑dʋdʋ ‑gʋ mnɩ.
22 Nɩɩ,
Klisɩɩ leglizɩnya mɩa Zudee ‑dʋdʋ ‑gʋ 'nɩ ‑slɔ 'mɩ 'yɩ 'yli nya.
23 ‑We wa gbaa waa leglizɩnya 'nʋa zlɩmɛ ‑bhlogbɔɔ,
mʋ ‑wa nɩɩ:
nyɩmɛ ‑ɔ palɩ bhaa wa 'klɩyɩe 'wʋ,
'ɩn ‑Lagɔgbʋ ‑we ka 'gbʋ ɔ gʋa la,
ɔ 'ka we lasa,
ɔ mɩ ‑slɛɛn we gbada.
24 'Ɩn wa yia ‑Lagɔɔ 'ŋnɩ ‑mnɩnɩda ‑tʋ na 'gbʋ.