6
‑Amɩa ‑yɔ ‑Lagɔ sɔ nʋa lubho dabʋdʋʋ 'gbʋ,
‑a zʋa aɩn 'dɩ nɩɩ,
'nanɩ a 'yɩa ‑Lagɔ kwɛɛ,
a 'na ‑nyumonu we la ‑nɩ.
2 Nɩɩ,
‑Lagɔ nɛɛ:
«Bhla ‑we nya ɩn mɩa 'nanɩ nʋda,
ɩn ka ‑mɩ yukwli pʋlʋ.
Gbʋwʋbhʋ bhla,
ɩn ka ‑na ‑wawʋyi.»
Nɩɩ,
‑Lagɔɔ 'nanɩɩ ‑yɔŋwnu bhla nɩ ‑slɛɛn.
'Ɩn 'ylɩ ‑we nya nyɩmɛ 'kaa gbʋ 'wʋbhʋ,
mʋ nɩ.
3 ‑A 'nɩ 'yɩbha ‑a 'ka nyɩmɛ yabhlogbɔɔɔ mnɔmnɔgbʋ lɛnʋ gbʋ yabhlogbɔɔ 'wʋ,
wa yi ‑Lagɔɔ lubho ‑a mɩa nʋdaa da gbʋnyuu gba.
4 'Ɩn gbʋ weee 'wʋ,
‑a slolua we nɩɩ,
‑a mɩ ‑Lagɔɔ lubhonʋnyaa 'dɛgbolu nya.
Sanɛɛ 'sa ‑a dɩlɩa laylagbʋ ‑duun nɩ 'wlu zɔ la dlɩtie nya:
sɩasɩe klaa,
gbʋnyuu ‑amɩaa ylɩylɩe ‑yɔ ‑amɩaa lawlalɩgbʋnya klaa,
5 ‑amɩaa bhɩtɩe klaa,
‑amɩaa ‑kaslʋ 'wʋpapɩe klaa,
nyɩmaa ‑zlo yia ‑aɩn ‑yɔwʋsɔlʋ,
‑a yia libho 'tɩtɛ nʋ,
'ɩn wa yia ‑aɩn 'ylaakple ‑gueli,
wa yia ‑aɩn ŋwɔ 'bhalɩ.
6 ‑Slolu ‑a slolua we nɩɩ,
‑a mɩ ‑Lagɔɔ lubhonʋnya nya,
‑amɩaa ‑mɔwlʋwlʋe klaa,
‑amɩaa ‑Lagɔgbʋʋ yilo klaa,
‑amɩaa dlɩtie klaa,
‑amɩaa zʋzɔnʋʋ lɛnʋe klaaa sɔlʋ.
'Ɩn Zuzu 'Pʋpaa lɛnʋgbʋ ‑yɔ ‑amɩaa nyɩmɛɛ zɛkalɩdlɩ tɩklɩɩ klaa,
7 gbʋzɔnʋʋ gbagbɩe ‑yɔ ‑Lagɔɔ 'tɩtɛɛ sɔlʋ.
Nɩɩ,
‑we mɩa tɩklɩɩ ‑Lagɔ 'yliya 'wʋ,
'mʋ ‑a bhua 'wʋ ‑amɩaa tʋgʋ ‑li ‑yɔ ‑amɩaa ‑gʋladolu ‑li nya.
8 Wa ‑ka ‑aɩn 'ŋnɩkwalɩda ‑mɩ,
'ɩn wa bhalɩ 'yaa ‑aɩn zʋ.
Wa ‑ka ‑amɩaa daa gbʋnyuu gbada ‑mɩ,
‑zugba wa gba 'yaa ‑amɩaa daa gbʋzɔnʋ,
wa yɩ ‑aɩn yocɩan 'bhisa,
'ɩn ‑zugba gbʋzɔnʋ ‑a mɩa gbada.
9 'Wʋ wa bhua ‑aɩn nɛɛ wa 'nɩ ‑aɩn ‑yi,
'ɩn ‑zugba wa 'dɛ weee ‑yi ‑aɩn kpɛɛn kpɛɛn.
'Wʋ wa bhua ‑aɩn nɛɛ nyɩma mɩ tlɩda,
'ɩn ‑zugba ‑a ‑ga 'yliyɔ sazɔnʋ sa.
‑Kaslʋ 'wʋ wa paa ‑aɩn,
'ɩn wa'a 'bha ‑aɩn.
10 ‑Amɩaa dlɩ wa sumanɩa,
‑zugba ‑amɩaa dlɩ mɩ 'mʋna 'wʋ 'ylɩ weee nya.
Wamɩa dlɩɩ,
bobabhanya ‑a ‑mɩa,
‑zugba ‑a pa nyɩma duun 'ŋnɩmnɩe ‑gʋ.
Wamɩa dlɩɩ,
‑a 'nɩ ‑lu yabhlogbɔɔ ‑ka,
‑zugba ‑a ka ‑lu weee gbʋzɔnʋ sa.
11 ‑Amɩaa 'talea Kolɛntɩ ‑nyɩma,
‑a ka aɩn ‑yla gbʋzɔnʋ gba,
'ɩn ‑a yia dlɩ 'wʋkalɩ 'kadʋʋ aɩn ‑yla.
12 ‑A 'nɩ ‑amɩaa dlɩ 'wʋkla aɩn ‑yla,
amɩa klaa amɩaa dlɩ 'wʋ ‑amɩaa gbɛgbɛɩn.
13 Nɩɩ,
gbʋ na gbaa aɩn ‑yla nɛɛ na 'yua a ‑mɩ,
a nʋ ‑amɩa 'bhisa,
a ‑kalɩ amɩaa dlɩ 'wʋ 'kadʋʋ ‑aɩn ‑yla!
A vla gbʋnyuu gwe
14 Nyɩma ‑wa'a ŋwnua ‑Lagɔɔ gbʋ ‑yɔ,
a ‑yɔ wa 'na suslolu 'wʋ,
'ɩn a 'ka wa nya lubho nʋ dabʋdʋ ‑nɩ.
'Lee,
‑we mɩa tɩklɩɩ mneni we ‑yɔ ‑we ‑nyuayli 'ka 'wʋsusloluu?
'Ɩn sa zlɩ mneni we ‑yɔ nikpise 'ka 'wʋsuslolua?
15 Sa Klisɩ mneni ɔ 'ka 'Kuzua nya wɛlɩ ‑bhlo ‑ka?
'Ɩn sa ‑Lagɔnyɩmɛ mneni ɔ ‑yɔ ‑ɔ'ɔ ŋwnua ‑Lagɔɔ gbʋ ‑yɔ 'ka ‑lu 'wʋgbɔlʋa?
16 Lɛɛ ‑lu ‑gʋ ‑Lagɔɔ ‑budu ‑yɔ yoyolagɔ 'ka wɛlɩ ‑bhlo ‑ka?
Nɩɩ,
'yliyɔga ‑Lagɔɔ ‑budu ‑a ‑mɩa,
‑Lagɔɔ 'dɛ nɛɛ saɛ:
«La na ‑yɔ wa yia ‑dɩa,
'ɩn nɔa na ‑yɔ wa yia,
wa ‑Lagɔ na yia ‑zɛa,
'ɩn wa 'ka na nyɩma ‑zɛ.»
17 We 'gbʋ,
Jejitapɛ nɛɛ:
«A 'bhʋ waa nyɩma nɩ nyɩdɩ,
'ɩn a vla wa gwe 'pɩpɩ.
A 'na zɩlɩ pʋɩnkalu kwɛ ‑nɩ,
'ɩn amɩaa 'lakpasu ‑amɩ na yia kpaa.»
18 ‑Lagɔsɛbhɛ nɛɛ 'yaɛ:
«'Tɩtɛ weee ‑Kanyɔ nɛɛ:
‹Amɩaa Dide na yia ‑zɛa,
'ɩn amɩa 'ka na nʋkpasuyua ‑yɔ na 'ŋwnɩyua ‑zɛ.› »