‑We ka 'klʋ ‑Zezuu tietienyɔ kaa, we ‑yɔ ‑we ɔ 'kaa lɛnʋ
9
'Lee,
ɩn 'nɩ na 'dɛ ‑yla ‑mɩɩ?
Ɩn 'nɩ ‑Zezuu tietienyɔɔ?
Ɩn 'nɩ ‑amɩaa ‑Kanyɔ ‑Zezu 'yɩɩ?
'Ɩn Nyɩmaa ‑Kanyɔɔ lubho ɩn nʋa,
a 'nɩ we yaa?
2 We ‑ka nɩɩ,
nyɩma tɔlʋaa ‑gbɛ,
ɩn 'nɩ ‑Zezuu tietienyɔ nya ‑mɩ,
amɩaa ‑gbɛ,
ɩn mɩ we nya ‑kpɔ.
Nɩɩ,
a mɩ Nyɩmaa ‑Kanyɔ 'wʋʋ 'gbʋ,
amɩaa dɛ slolua nɩɩ,
ɩn mɩ Nyɩmaa ‑Kanyɔɔ tietienyɔ nya.
3 Nɩɩ,
wa ‑ka 'mɩ gbʋ 'wludɩ,
sa na saa na 'dɛ gbʋ 'wlu,
mʋ nɩ:
4 'lee,
‑a 'nɩ we 'klʋ ‑ka,
‑a 'ka li,
'ɩn ‑a 'ka 'ma ‑amɩaa lubhoo 'gbʋʋ?
5 Sa ‑Zezuu tietienya tɔlʋa,
Nyɩmaa ‑Kanyɔɔ bhelia ‑yɔ Sefasɩ 'bhua ‑Lagɔŋwnɔ 'wʋ,
‑amɩa 'nɩ we 'klʋ ‑ka,
‑a 'ka ‑Lagɔŋwnɔ 'wʋbhu,
‑a ‑yɔ ɔ 'ka mnɩɩ?
6 Yaayɩɩ,
‑amɩ ‑yɔ Banabasɩ ‑bhlo 'kaa lubho nʋ 'bhie,
‑a 'ka ‑amɩanʋʋ 'pipee 'yɩ yɩ?
7 'Lee,
a ka ‑slɔ 'nʋ nɩɩ,
nyɩmɛ ka 'slʋja pla,
'ɩn ɔ yia ɔ 'dɛ 'pɛnɩ yɩ?
Nyɩmɛ faa ‑dlɔsu,
ɔ'ɔ li we 'bhuee?
'Ɩn 'nɔɔluu zʋa yabhlo 'yliyɔzʋnyɔ'ɔ 'ma 'nɔɔluu nyɩtɩnyuu?
8 'Lee,
nyɩmaa lɛnʋgbʋʋ sɔlʋ ‑bhloo 'dɛ na gbaa gbʋ yɩ?
Moizɩɩ tite 'nɩ wee gbʋ ‑bhloo 'dɛ gbada ‑mɩɩ?
9 Nɩɩ,
we mɩ wee tite 'wʋ cɛlɩdaɛ:
«'Bhli ‑ka 'mnɔ 'titlida ‑mɩ,
a 'na gbʋan ‑nɩ we ŋwɛ ‑nɩ.»
'Lee,
'bhlinyaa 'gbʋ ‑Lagɔ bhalɩa yɩ?
10 'Lee,
‑amɩaa 'gbʋ ɔ yia sa wɛlɩ ‑mɩnɩ gba yɩ?
Cɩɩn,
‑amɩaa 'gbʋ wee wɛlɩ mɩa cɛlɩda.
Nɩɩ,
‑ɔ ‑ka 'mnɔ 'pa,
ɔ dɩ we dlɩ 'wʋ nɩɩ,
ɔ ‑nʋ ɔ yia 'yɩa.
'Ɩn ‑ɔ ‑ka 'mnɔ ‑dɩda ‑mɩ,
ɔ dɩ we dlɩ 'wʋ nɩɩ,
ɔ ‑nʋ ɔ yia 'yɩa,
we 'nɩ mʋʋ?
11 ‑A ka aɩn 'wʋ Zuzu 'Pʋpaa zʋzɔnʋnya glʋ.
'Lee,
‑a ‑ka aɩn kwɛɛ amɩaa dʋdʋgʋʋ zʋzɔnʋnya 'yɩ,
gbʋ 'kadʋ mʋ yɩ?
12 We ‑ka nɩɩ,
nyɩma tɔlʋa ka we 'yɩyɩ klʋ aɩn ‑gʋ,
‑amɩaa nʋ we 'yɩyɩ ‑klʋ 'nɩ ‑maa ‑nʋ 'wʋzii?
‑Amɩa 'nɩ ‑mʋʋ ‑yɔlayɩbha.
Nɩɩ,
gbʋ weee ‑a slʋlʋa 'wlu zɔ la,
‑mʋʋ yi 'wlʋ Klisɩɩ gbʋzɔnʋ gbʋʋ 'yoo ‑a kɩklalɩ.
13 A 'nɩ we 'ji ‑yi nɩɩ,
‑wa nʋa lubho ‑Lagɔbudu 'kadʋ zɔ,
‑Lagɔbudu 'kadʋ zɔ wa yɩa wanʋʋ lililuu?
'Ɩn ‑wa nʋa ‑Lagɔɔ bʋbɔlʋda lubho,
‑Lagɔɔ bʋbɔlʋda wa'a 'yɩ wanʋʋ lililuu?
14 Nɩɩ,
'sa ‑bhloo 'dɛ Nyɩmaa ‑Kanyɔ palɩa tite,
nɩɩ,
‑wa gbaa ‑Lagɔgbʋ,
wa 'yɩ wanʋʋ lililu ‑Lagɔgbʋʋ gbagbɩe ‑yɔ.
15 Nɩɩ,
‑amɩ,
‑li ka 'yɩyɩ klʋ ɩn kaa,
ɩn 'nɩ we 'yabhlogbɔɔ ‑yɔlayɩbha.
'Ɩn ɩn 'nɩa ‑li ka 'yɩyɩ klʋ ɩn kaaa 'gbʋ we cɛlɩ.
We nanɩ 'yli ɩn 'ka tlɩ!
‑Mʋʋ ‑zi nyɩmɛ 'ka 'mɩ 'ŋnɩ 'kadʋ ‑mɩnɩ ‑gʋ ‑sa.
16 Nɩɩ,
ɩn 'nɩa na 'dɛ 'ylimanɩ ‑Lagɔgbʋʋ gbagbɩe 'wʋ.
‑Gla ‑wa ɩn 'ka we gba.
'Ɩn we ‑ka nɩɩ,
ɩn 'nɩ wee ‑Lagɔgbʋ gba,
gbʋnyuu mɩ na ‑nʋ nya!
17 We ‑ka na dɛ ‑saa ‑bha wee lubho ‑mɩnɩ,
‑zugba ɩn mneni ɩn 'ka we 'pɛnɩe 'yɩ.
Nɩɩ,
‑gla nya ‑Lagɔ dɩa 'mɩ wee lubho 'wluu 'gbʋ,
bhe na nʋa we.
18 Nɩɩ,
lɛɛ ‑lu ‑wa na 'pɛnɩa?
‑Lagɔgbʋʋ gbagbɩe bhe ‑wa,
'ɩn ‑li ka 'yɩyɩ klʋ ɩn kaa,
ɩn 'kaa 'yɩ ‑Lagɔgbʋʋ gbagbɩe ‑yɔ,
ɩ'ɩn 'yɩbha we ‑yɔla.
19 Ɩn mɩ na 'dɛ ‑yla,
ɩn 'nɩ nyɩmɛ yabhlogbɔɔɔ gaylo.
'Ɩn ɩn yia na 'dɛ nyɩma weee gaylo 'wʋnʋ,
ɩn 'ka nyɩma duun 'yɩ Klisɩɩ ‑nʋ nya.
20 Nɩɩ,
ɩn ‑ka Zuifʋ nyɩdɩ ‑mɩ,
'ɩn na nʋa na 'dɛ Zuifʋ 'bhisa,
'ɩn,
ɩn 'ka wa 'yɩ Klisɩɩ ‑nʋ nya.
Na 'dɛ'ɛ zʋ Moizɩɩ tite 'nʋŋwɛ ‑gla nya,
'ɩn ɩn ‑ka ‑wa zʋa we 'nʋŋwɛ nyɩdɩ ‑mɩ,
'ɩn na nʋa na 'dɛ wee titee 'nʋŋwɛzʋnyɔ 'bhisa,
'ɩn ɩn 'ka wa 'yɩ Klisɩɩ ‑nʋ nya.
21 'Sa ‑bhloo 'dɛ,
‑wa 'nɩa Moizɩɩ tite ‑yi,
ɩn ‑ka wa nyɩdɩ ‑mɩ,
'ɩn na nʋa na 'dɛ ‑maa 'bhisa,
'ɩn,
ɩn 'ka wa 'yɩ Klisɩɩ ‑nʋ nya.
'Ɩn ‑zugba,
ɩn ‑yi ‑Lagɔɔ tite,
‑we ka gbʋ ‑wa,
Klisɩɩ tite na zʋ 'nʋŋwɛ.
22 Nɩɩ,
‑wa ka dlɩ 'nɩa 'wʋtɛ,
ɩn ‑ka wa nyɩdɩ ‑mɩ,
'ɩn na nʋa na 'dɛ ‑ɔ ka dlɩ 'nɩa 'wʋtɛ 'bhisa,
'ɩn ɩn 'ka ‑maa 'yɩ.
Na 'dɛ na nʋa ‑lu weee 'wʋ,
wa 'dɛ weee ‑yla.
'Ɩn,
ɩn 'ka tɔlʋa gbʋ 'wʋsa sɔ weee lʋ.
23 ‑Lagɔgbʋʋ 'gbʋ na nʋa gbʋ weee ‑mɩnɩ lɛ,
'ɩn ɩn 'ka we zʋzɔnʋ 'yɩ.
24 A ‑yi we 'ji nɩɩ,
‑gwagwanya weee ‑ka ‑gwaa mnɩ,
‑gwa wa 'dɛ weee gwaa,
'ɩn nyɩmɛ ‑bhlogbɔɔ bhua we 'kupʋ 'wʋ.
Nɩɩ,
amɩa ‑gwa 'ya 'sa,
'ɩn a 'ka we 'kupʋ 'wʋbhu.
25 ‑Gwagwanya ‑ka ‑gwagwɩe 'kpɩaa yi ‑luu tɔlʋa wa tɩa.
We 'pɛnɩe ‑we yia labhʋa wa 'ka we 'yɩɩ 'gbʋ,
wa nʋa we lɛ.
'Ɩn 'pɛnɩe we'e 'bhʋa la,
‑amɩa 'ka we 'yɩɩ 'gbʋ ‑a nʋa we lɛ.
26 We ‑ka ‑amɩ,
we 'gbʋ na zʋa ‑gwagwɩe 'yliyɔ,
'ɩn ɩn 'ka we 'wlulapalɩda nyni.
'Ɩn,
ɩn 'wlʋ ‑kwligʋnyɔ,
ɩ'ɩn 'pa ‑kwli 'sa ‑mɔ bhe.
27 Nɩɩ,
na ku na palɩa 'klɩyɩe 'wʋ,
'ɩn ɩn mɩ we ‑kanyɔ nya.
‑Mʋʋ yi 'wlʋ nyɩma tɔlʋa ‑yla ɩn gba ‑Lagɔgbʋ 'bhie,
‑Lagɔ yi 'mɩ kwnɛɛ ‑sa.