‑Zezu Klisɩ ‑ɔ wa kʋlʋa su ‑gʋ la, ɔ gbʋ Pɔlʋ gbaa
2
Nɩɩ,
bheliaɩn,
da ‑amɩ mnɩa amɩaa ‑gbɛ,
ɩn 'nɩ mnɩ ɩn 'ka aɩn ‑yla ‑Lagɔɔ zizegbʋ gba wɛlɩ 'nanɩ ‑yɔ nyɩmaa gbʋyilo nya.
2 Nɩɩ,
ɩn 'nɩ 'yɩbha ɩn 'ka gbʋ ‑putuu 'jiyibheli,
da ɩn mɩa aɩn nyɩdɩ,
'mʋ we 'nɩ ‑Zezu Klisɩ 'wʋbhʋ,
‑Zezu ‑ɔ wa kʋlʋa su ‑gʋ la,
mɔ.
3 We 'dɛɛ 'gbʋ,
da ‑amɩ 'kaa aɩn 'yu 'yligbe,
ɩn ka 'wʋyɔmanɩ,
ɩn ka nyanɔ nʋ,
‑zugba na tɛlɩa.
4 Nɩɩ,
na gbʋ ‑slolu wɛlɩ ‑yɔ na ‑Lagɔgbʋʋ gba sɔ'ɔ 'bhʋ nyɩmaa gbʋyilo ‑wɛlɩ 'nanʋʋ ‑gbɛ.
Nɩɩ,
Zuzu 'Pʋpaa 'tɩtɛ zʋa 'mɩ we ŋwɛɛ.
5 'Saa 'dɛ amɩaa dlɩzʋzʋe 'na 'kaa nyɩmaa gbʋyilo ‑gʋ ladɩ,
nɩɩ,
we ‑dɩ ‑Lagɔɔ 'tɩtɛ ‑gʋ la.
‑Lagɔɔ gbʋyilo
6 'Ɩn ‑zugba ‑Lagɔnyɩma dolua 'yligwela,
'ma ‑amɩa slolua gbʋyilo.
Nɩɩ,
wee gbʋyilo ‑mɩnɩ 'nɩ bhla ‑mɩnɩɩ gbʋyilo,
'ɩn bhla ‑mɩnɩɩ 'wlulapɩlɩnya 'kadɩ ‑wa 'kaa labhʋ,
we 'nɩ 'ya ‑maa gbʋyilo.
7 ‑Lagɔɔ gbʋyilo mɩa zizeda,
'ɩn ‑we mɩa zizeda ‑bhlokpadɛ nyɩma kwɛɛ,
'mʋ ‑a slolua.
‑Lagɔ ka ‑bha we ‑sa pepe,
‑amɩaa 'ŋnɩɩ 'ylimanɩee 'gbʋ,
'bhie,
ɔ yia dʋdʋ lala.
8 Dʋdʋ nɩɩ 'wlulapɩlɩnya 'kadɩɩ 'yabhlogbɔɔ 'nɩ wee gbʋyilo ‑mɩnɩ yibheli.
We ‑ka nɩɩ,
wa ka yaa we yibheli,
wa 'na 'ka 'ŋnɩmnɩee ‑Kanyɔ 'kadʋ su ‑gʋ lakʋlʋ.
9 Nɩɩ,
‑we mɩa ‑Lagɔsɛbhɛ 'wʋ cɛlɩda mʋ nɩ:
«‑We 'yli 'nɩa ‑slɔ ‑yɔyɩ,
‑we yukwli 'nɩa ‑slɔ 'nʋ,
‑we nyɩmɛ yabhlogbɔɔ 'nɩa ‑slɔ 'wlukʋʋn lapʋpalɩ,
'mʋ ‑Lagɔ mnazɩa la ‑wa 'yɩbhaa ɔ,
wa ‑nʋ nya.»
10 Nɩɩ,
‑Lagɔɔ gbʋ mɩa zizeda,
‑amɩa ɔ ‑slolua we 'klʋ ɔ Zuzu nya.
‑Lagɔɔ Zuzu ‑yi gbʋ weee,
'dɛbhie ‑Lagɔɔ zizegbʋ ‑we ‑tɔa 'wʋ,
ɔ ‑yi we.
11 Nɩɩ,
nyɩmɛɛ ‑gbɛ,
ɔ dlɩ ‑bhlogbɔɔ ‑yia ɔ 'wlukʋʋn lapʋpalɩ gbʋ,
we 'nɩ mʋʋ?
'Sa ‑bhloo 'dɛ ‑Lagɔɔ Zuzu ‑bhlogbɔɔ ‑yia ‑Lagɔɔ 'wlukʋʋn lapʋpalɩ gbʋ.
12 Nɩɩ,
we ‑ka ‑amɩa,
‑amɩa 'nɩ dʋdʋgʋ ‑nyɩmaa zuzu 'yɩ,
nɩɩ,
Zuzu bhʋa ‑Lagɔɔ ‑gbɛ,
'mʋ ‑a 'yɩa.
'Ɩn wlawlalu ‑we ‑Lagɔ 'nyɛa ‑aɩn bhe,
‑a 'ka we yibheli.
13 'Ɩn ‑a ‑ka we gbʋ ‑gbada ‑mɩ,
‑a'a gba we dʋdʋgʋ ‑nyɩmaa gbʋyiloo gbʋslolu sɔlʋ.
Nɩɩ,
‑Lagɔɔ Zuzuu gbʋslolu sɔlʋ ‑a gbaa we.
Sanɛɛ 'sa ‑a gbaa ‑Lagɔɔ gbʋzɔnʋ gbʋnyaa 'ji ‑wa kaa ‑Lagɔɔ Zuzu 'wʋ ‑yla.
14 Nɩɩ,
nyɩmɛ ‑ɔ 'nɩa ‑Lagɔɔ Zuzu 'wʋ ‑ka,
ɔ 'nɩ mneni ɔ 'ka gbʋzɔnʋ ‑gbʋnya bhʋa ɔɔ Zuzuu ‑gbɛɛ gbʋ ‑yɔŋwnu.
‑Sabhɛ ‑bha ‑gbʋ we ‑mɩa ɔnʋʋ ‑gbɛ.
Ɔ 'nɩ mneni ɔ 'ka we 'wʋlanʋ,
nɩɩ,
Zuzu 'Pʋpaa 'dɛbhlogbɔɔ nya wa mnenia wa 'ka wee ‑li 'wʋsɩsalɩ.
15 Nɩɩ,
nyɩmɛ ‑ɔ kaa ‑Lagɔɔ Zuzu 'wʋ,
mɔ sɩsalɩa ‑lu weee 'wʋ.
'Ɩn ɔ dɛ mɩa,
nyɩmɛ yabhlogbɔɔ 'nɩ mneni ɔ 'ka ɔ gbʋ 'wludɩ.
16 We mɩ cɛlɩda ‑Lagɔsɛbhɛ 'wʋɛ:
«Nyɔɔ ‑yi Jejitapɛɛ 'wlukʋʋn lapʋpalɩgbʋa?
Nyɔɔ 'ka ɔ gbʋ ‑slolua?»
'Ɩn ‑amɩa mɩa,
‑a ‑yɔ Klisɩ 'sɔɔ 'wlukʋʋn lapʋpalɩgbʋ ‑bhlo.