'Sɛbhɛ Pɔlʋ 'paa Wlɔmʋ ‑nyɩma yoo
Fʋsawɛlɩ
1
‑Amɩ,
‑Zezu Klisɩɩ lubhonʋnyɔ,
Pɔlʋ,
‑amɩ cɛlɩa aɩn 'wʋ.
‑Lagɔ laa 'mɩ,
ɩn 'ka ɔ tietienyɔ ‑zɛ,
mɔɔ ‑saa ‑bha 'mɩ ɔ gbʋʋ gbada.
2 Wee ‑Lagɔgbʋ mɩa dɛ nɩ,
‑Lagɔ ka bha we gba ɔ gbʋʋ ‑falɩpanyaa gbɛgbɛɩn,
'ɩn wa yia we cɛlɩ ‑Lagɔsɛbhɛ 'wʋ.
3 Ɔ 'Yuu ‑gʋgbʋ we gbaa.
Nɩɩ,
'mɔ wa gwalɩa ɔ dʋkpasa,
nyɩmaa 'wlulapɩlɩnyɔ ‑Davidɩɩ zʋayli,
nyɩmɛ ‑kpʋa 'bhisa.
4 Zuzu 'Pʋpa ‑slolua 'tɩtɛ nya nɩɩ,
mɔ ‑wa ‑Lagɔɔ Yu,
ɔ ka tlɩtlɩnya glaa 'wʋsɔɔ 'gbʋ.
5 Ɔɔ ‑amɩaa ‑Kanyɔ ‑Zezu Klisɩ mɩa nɩ,
ɔ gbɛgbɛɩn ‑Lagɔ nʋa ‑aɩn 'nanɩ 'wʋ,
'ɩn ‑a yia ɔ tietienya ‑zɛ ɔ 'ŋnɩɩ 'gbʋ ‑a 'ka dʋdʋgʋ ‑nyɩma weee ɔ 'tɩtɛ ‑slolu,
'ɩn wa 'ka ɔ wɛlɩ 'nʋŋwɛ zʋ dlɩzʋzʋe nya.
6 ‑Wa ɔ ‑saa ‑bha wa 'ka ɔ wɛlɩ 'nʋŋwɛ zʋ,
a mɩ wa glaa,
‑we ka gbʋ ‑wa,
ɔ ka 'ya amɩa la ‑Zezu Klisɩɩ ‑nʋ nya.
7 Amɩa weee,
‑mɔ Wlɔmʋ,
amɩa ‑wa ka zɛ ‑Lagɔ ‑kalɩ,
'ɩn amɩa ‑wa ɔ laa a 'ka ‑mɩ tɩklɩɩ,
nɩɩ,
‑amɩaa Dide ‑Lagɔ ‑yɔ ‑amɩaa ‑Kanyɔ ‑Zezu Klisɩ ŋwna aɩn 'nyu la,
'ɩn wa 'nyɛ aɩn 'wʋtʋtʋe ‑dlɔɔ.
Pɔlʋ 'yɩbha ɔ 'ka Wlɔmʋ ‑nyɩma 'yɩ
8 Tɩatɩa mɩa,
‑Lagɔ na paa fuo ‑Zezu Klisɩɩ 'ŋnɩ nya,
a 'dɛ weee 'gbʋ.
‑We ka gbʋ ‑wa,
dlɩ a zʋa,
we 'dɩ ka 'gbe weee ‑gʋlamneni.
9 ‑Lagɔ,
‑ɔ ka lubho ɩn mɩa nʋda na dlɩ weee nya ‑Lagɔgbʋʋ gbagbɩe nya,
ɔ ‑yi we 'ji nɩɩ,
‑we na gbaa gbʋzɔnʋ ‑wa.
We 'gbʋ,
ɩn ‑ka ‑Lagɔ bhubhoeda ‑mɩ,
amɩaa 'ŋnɩ'ɩ bɔ ‑mɔ.
10 Zlabhuezɔ,
na bhubhoea ɔ,
ɔ 'ka 'mɩ 'yoo 'nyɛ,
ɩn 'ka amɩaa ‑gbɛ mnɩ.
11 Nɩɩ,
amɩaa 'yɩyɩee 'tʋ mɩ 'mɩ 'bhada.
Ɩn ‑ka amɩaa ‑gbɛ yi,
‑Lagɔɔ Zuzuu wlawlalu a yia 'yɩa na gbɛgbɛɩn,
'ɩn a 'ka dlɩ 'tɛmanɩ.
12 Nɩɩ,
ɩn 'yɩbha ɩn ‑mɩ aɩn glaa,
'ɩn ‑a 'ka 'kʋayli 'pʋpalɩ nanʋʋ dlɩzʋzʋe ‑yɔ amɩaa ‑nʋ 'sɔɔ gbɛgbɛɩn.
13 Bheliaɩn,
‑we ɩn 'yɩbhaa a yibheli 'ji,
mʋ ‑wa nɩɩ,
amɩaa ‑gbɛ na yi yaa yia ‑zakpa duun,
'ɩn ɩn 'nɩ ‑slɔ we 'yoo 'yɩ.
Ɩn ‑ka ‑mɔ nyni nɩ,
ɩn 'yɩbha nɩɩ,
na lubho mɩa,
sa we 'yɩa ‑tnʋʋ laga ‑dʋdʋ ‑putu ‑gʋ,
we nʋ 'ya 'sa amɩanʋʋ ‑gbɛ.
14 ‑We ɩn 'kaa lɛnʋ,
mʋ ‑wa nɩɩ,
ɩn mnɩ dʋdʋ weee ‑gʋ,
‑wa ka 'yli ‑bloa klaa,
‑wa ka 'yli 'nɩa ‑blo klaa,
‑wa ‑yia 'sɛbhɛ we ‑yɔ ‑wa 'nɩa we ‑yi,
wa ‑gbɛ.
15 We mɩ 'saa 'gbʋ nɩ,
na dlɩ mɩ amɩaa ‑gbɛ nynida ‑mɔ Wlɔmʋ,
ɩn 'ka aɩn ‑yla ‑Lagɔgbʋ gba.
‑Lagɔgbʋ, mʋ nɩ
16 Nɩɩ,
ɩn ‑ka ‑Lagɔgbʋ gbada ‑mɩ,
we'e 'bhalɩ 'mɩ zʋ.
‑Lagɔɔ 'tɩtɛ ‑wa,
'ɩn ‑wa zʋa ɔ dlɩ ‑gʋ,
'ma ɔ saa gbʋ 'wʋ:
Zuifʋ ɔ saa gbʋ 'wʋ tɩa,
'bhie ɔ saa nyɩmaa pnɩɩ gbʋ 'wʋ.
17 ‑We wee ‑Lagɔgbʋ slolua,
mʋ nɩ:
nyɩma ‑wa zʋa ɔ dlɩ ‑gʋ,
nyɩma tɩklɩɩ nya ɔ bhua wa 'wʋ.
Dlɩzʋzʋe ‑bhlogbɔɔ nya nyɩmɛ bhʋa gbʋ 'wʋ.
We mɩ cɛlɩda ‑Lagɔsɛbhɛ 'wʋɛ:
«‑Ɔ ‑Lagɔ yibhelia nyɩmɛ tɩklɩɩ nya dlɩzʋzʋee 'gbʋ,
'yliyɔgagɩe ‑mɔɔ yia 'yɩa.»
Nyɩma weee ka gbʋnyuuu 'gba 'wlu ‑Lagɔ 'yu
18 Nɩɩ,
‑Lagɔ mɩ ɔ 'cɛ ‑we bhʋa yalɩ ‑sloluda,
‑we ka gbʋ ‑wa,
dʋdʋgʋ ‑nyɩma mɩ gbʋnyuu lɛnʋda,
'ɩn ‑we wa nʋa lɛ,
we 'nɩ tɩklɩɩ ‑mɩ.
'Ɩn wa lɛnʋgbʋ 'nyii nya wa tuntnua ‑Lagɔɔ gbʋzɔnʋ.
19 Nɩɩ,
‑we ‑yɔ wa mnenia wa 'ka ‑Lagɔɔ gbʋ yibheli,
we mɩ wa 'yu:
‑Lagɔ ka we wa 'klʋslolu 'nanʋʋ.
20 ‑Lagɔɔ 'tɩtɛ,
we'e bhɩa,
'ɩn wa'a 'yɩ we ‑yɔ,
'ɩn sa ‑Lagɔ mɩa,
wa 'nɩ mneni wa 'ka 'sa ɔ ‑yɔyɩ.
Nɩɩ,
da ‑Lagɔ ‑laa dʋdʋ la,
wa mneni wa 'ka wee gbʋ yibheli.
‑A ‑ka ‑Lagɔɔ lalalu yla,
‑amɩaa 'wlukʋʋn mneni we 'ka ‑Lagɔ ‑yɔ ɔ 'tɩtɛ ‑yɔyɩ.
We 'gbʋ nyɩma 'nɩ zizelida ‑ka.
21 Wa yibhelia ‑Lagɔ,
wa 'nɩ ɔ 'ŋnɩ ‑mnɩnɩ,
'ɩn wa 'nɩ ɔ fuo 'pa.
'Ɩn,
'mʋ nyɩmɛ 'ka yaa ‑Lagɔ ‑yla lɛnʋ.
‑Slɛɛn,
wa 'wlukʋʋn lapʋpalɩe bhe,
wa 'nɩ gbʋyilo dlɩ ‑ka,
we mɩ nikpise 'wʋ.
22 Wamɩa nɛɛ,
wa ‑yi gbʋ,
'ɩn ‑zugba wa nʋ ‑sabhɛbhagbʋ lɛ.
23 ‑Lagɔ,
‑ɔ'ɔ tlɩa,
‑ɔ ka 'ŋnɩ wa 'kaa ‑mnɩnɩ,
wa tɩ ‑bha ‑mɔɔ,
'ɩn wa bʋbɔa tɛlɩtɛlɩli ‑we 'wlʋa nyɩma ‑wa tlɩtlɩe mnenia ‑yɔ blublunɩma klaa,
'lalimnʋanɩma klaa,
we ‑yɔ dlɩɩnɔnʋnɩma.
24 ‑We mɩa dɛɛ 'gbʋ,
‑Lagɔ yia wa kwɛbɩsa wa dlɩwʋnynili 'bɩ,
'ɩn wa plalɩa wa 'dɛ pʋɩn,
zʋbhalɩgbʋʋ lɛnʋe nya.
25 Wa ka ‑Lagɔɔ gbʋzɔnʋ ‑blɩgʋpalɩ,
'ɩn wa yia yonya ‑yɔŋwnu.
'Ɩn ‑Lagɔ ‑ɔ ka 'ŋnɩ nyɩma 'kaa 'ylimanɩ sazɔnʋ sa 'ylɩ weee nya,
wa yia ‑bha ‑mɔɔ 'dɛ tɩ,
‑zugba wa bʋbɔ ɔ lalali ɔ 'bɩgʋ.
26 We 'dɛɛ 'gbʋ ‑Lagɔ yia wa kwɛbɩsa wa zʋbhalɩ gbʋʋ 'tʋ 'bɩ.
Nɩɩ,
wa 'ŋwnɩ ‑yɔ wa 'lowlia'a ‑dɩ ‑slɛɛn ‑budu 'wʋ,
'ŋwnɩ ‑putu wa ‑yɔ wa dɩa ‑budu 'wʋ.
'Sasʋkpa gbʋʋ lɛnʋe mɩa,
we 'nɩ 'ylinanɩ dʋdʋ ‑gʋ.
27 'Sa ‑bhlokpadɛ nʋkpasia ‑yɔ wa 'ŋwnɩ'ɩ ‑dɩa ‑budu 'wʋ.
Nʋkpasiaa tʋ bhaa wa.
Wa ‑lima wa ‑yɔ wa dɩa ‑budu 'wʋ,
zʋ we kaa.
‑We mɩa dɛɛ 'gbʋ,
‑lu ‑we ka 'klʋ wa lɛnʋgbʋ 'nyuu kaa,
'mʋ wa yɩa.
28 Nɩɩ,
wa 'nɩ ŋwnu wa 'ka ‑Lagɔ yibhelii 'gbʋ,
ɔ yia wa kwɛbɩsa wa 'ka wa 'dɛɛ 'wʋkanɔ gbʋ lɛnʋ.
'Ɩn ‑we nyɩmɛ 'na 'kaa lɛnʋ,
'ɩn wa nʋa we lɛ.
29 'Ylinyunogbʋʋ 'yli ‑bhlo ‑bhlo yea wa:
nyɩma 'nyii wa ‑mɩa,
wa ‑limaa kwɛlu wa dlɩ nynia 'wʋ,
wa nʋkplɛ ‑nyu 'yli.
Zenyi yea wa dlɩ zɔ,
'ɩn nyɩma ‑bhabhɩe nanɩa wa dʋdʋ.
Wa ka ‑zlɛ,
wa ‑lima wa nʋa ‑dawli 'wʋ,
gbʋkpʋa ‑gbʋ wa nʋa lɛ.
Nyɩma wa saa 'ŋnɩ,
30 gbʋnyuu wa gbaa wa ‑limaa gbɛgbɛɩn,
‑Lagɔɔ tʋnyɩma wa ‑mɩa,
wa ‑lima wa vɛlɩa,
wa 'dɛ wa ylimanɩa,
wa 'dɛ wa ylɩlɩa,
nacɩ weee da wa talɩa wa 'ka gbʋnyuu lɛnʋ.
Wa'a zʋ wa dide ‑yɔ wa 'nyaa 'nʋŋwɛ.
31 Wa 'nɩ 'wlukʋʋn ‑ka,
wa'a nɔ wa 'dɛɛ gbagbawɛlɩ ‑gʋ,
wa 'tɛ,
wa 'nɩ nyazɩdlɩ ‑ka.
32 Wa ‑yi ‑Lagɔɔ gbʋwʋbhubhue 'ji:
‑wa nʋa we 'sasʋkpa ‑gbʋ nɩ lɛ,
tlɩtlɩe ‑wa wa ‑nʋ.
We mɩ 'sa 'bhie,
‑zugba wa nʋ we lɛ,
'ɩn 'dɛbhie,
tɔlʋa ‑ka we lɛnʋda ‑mɩ,
'ɩn wa ŋwnunu 'yaa ‑maa.