23
Pɔlʋ ylaa gbʋwliwʋdɩnya flɩlɩɩ,
ɔ nɛɛ:
«Bheliaɩn,
ɩn ka ‑Lagɔ 'yu nɔ 'nanʋʋ,
na dlɩ 'nɩ 'mɩ gbʋ 'nyɛ,
'ɩn we yia ‑zɛɛn ylɩ ‑mɩnɩ ylɩ.»
2 'Ɩn ‑Lagɔbʋbɔnyaa ‑kanyɔ 'kadʋ Ananiasɩ nɛɛ ‑wa mɩa Pɔlʋ kwesi ‑ylaɛ:
«A 'pa ɔ ŋwɛ ‑gʋ ‑lu!»
3 Tɔʋn,
Pɔlʋ nɛɛ ɔ ‑ylaɛ:
«Wɛlɩ 'sɔ ‑nyɩmɛ,
‑mɩ ‑Lagɔ yia bhɩtɩa!
‑Bha ‑ɩn ‑dɩa la,
‑zugba ‑na bhu na ‑yɔgbʋ 'wʋ titee sɔlʋ,
'ɩn ‑ɩn nɛɛ,
wa bhɩtɩ 'mɩ.
Tite 'nɩ 'sa gba.»
4 ‑Wa mɩa Pɔlʋ kwesi,
‑maa nɛɛ ɔ ‑ylaɛ:
«‑Lagɔbʋbɔnyaa ‑kanyɔ 'kadʋ ‑na vɛlɩa yɩ?»
5 Pɔlʋ yia we 'bɩgʋpalɩɛ:
«Na bhelia,
ɩn 'nɩ we 'ji ‑yi nɩɩ,
‑Lagɔbʋbɔnyaa ‑kanyɔ 'kadʋ ɔ ‑mɩa.
Nɩɩ,
we mɩ cɛlɩda ‑Lagɔsɛbhɛ 'wʋɛ:
‹‑Ɩn 'na gbalɩ gbʋnyuu ‑na nyɩmaa 'yugalɩnyɔ ‑yla ‑nɩ!› »
6 Pɔlʋ ‑yi we 'ji nɩɩ,
nyɩmaa ‑zakpa sɔ ‑wa gbʋwliwʋdɩnya.
‑Zakpa ‑bhlo ‑wa Sadusenyɩma,
'ɩn ‑zakpa 'sɔnʋ ‑wa Falizɩnyɩma.
We 'dɛɛ 'gbʋ ɔ yia 'wʋkpɩ 'tɩtɛɛ wa 'yuɛ:
«Bhelia,
Falizɩnyɩmɛ ɩn ‑mɩa,
'ɩn Falizɩnyɩmɛɛ 'yu ɩn ‑mɩa.
Tlɩtlɩnyaa 'wʋsɔsʋe ɩn dɩa dlɩ 'wʋʋ 'gbʋ,
wa mɩa da na ‑yɔgbʋ 'wʋbhuda.»
7 Da Pɔlʋ gba 'saa,
Falizɩnyɩma ‑yɔ Sadusenyɩma yia kpɛlɩe bhli,
'ɩn wa yia 'wʋdo 'sɔ.
8 Nɩɩ,
Sadusenyɩma nɛɛ,
tlɩtlɩnyaa 'wʋsɔsʋe 'nɩ ‑mɩ,
'anzɩnya ‑yɔ zuzu 'nɩ la ‑mɩ,
'ɩn ‑zugba Falizɩnyɩma yibhelia we nɩɩ,
we 'dɛ weee mɩ la.
9 'Ɩn nyɩmaa ‑zlo mɩ 'wʋkpɩda 'tɩtɛɛ,
'ɩn Falizɩnyɩmaa tɔlʋa ‑wa ‑wa ‑Lagɔɔ titee gwesanya,
‑maa yia Pɔlʋ lʋpa 'kʋa 'tɩtɛ nya.
Wa nɛɛ:
«‑A yɩ we ‑yɔ nɩɩ,
nyɩmɛ ‑mɔnɩ 'nɩ gbʋnyuu yabhlogbɔɔ lɛnʋ.
‑De zuzu yabhloo,
‑de 'anzɩ yabhlo gba ɔ ‑yla gbʋʋ,
nyɔɔ ‑yi we 'jia?»
10 Wee ‑zlɛ kpʋkpalɩa 'wʋ,
wa yi Pɔlʋ 'ylisɩsalɩɩ 'gbʋ,
nyanɔ yia 'slʋjaa ‑kanyɔ 'kadʋ dlɩɩ slo.
'Ɩn ɔ nɛɛ ɔ 'slʋja ‑ylaɛ,
‑maa ‑sa Pɔlʋ wa nyɩdɩ,
wa kwa ɔ 'slʋjaa ‑budu 'kadʋ zɔ lʋ.
11 ‑Mʋʋ 'bɩgʋʋ sabɔ bɛa,
Nyɩmaa ‑Kanyɔ yia Pɔlʋ 'klʋtlalɩ,
'ɩn ɔ nɛɛ ɔ ‑ylaɛ:
«‑Ɩn 'tɛmanɩ dlɩ!
‑Ɩn ka na gbʋ gba ‑seli ‑Zeluzalɛmʋ,
we mɩ nɩɩ,
‑ɩn gba 'ya we Wlɔmʋgbe nʋkplɛ.»
Zuifʋ zʋa Pɔlʋʋ 'bhabhagbʋ
12 ‑Mʋʋ zlɩ zlɩa zlʋkpɛ,
Zuifʋʋ ‑zakpa ‑bhlo yia wɛlɩ ‑bhlo bhlɩ,
'ɩn wa yia bi ‑Lagɔ 'yu nɩɩ,
wa 'nɩ ‑slɔ Pɔlʋ 'bha,
wa 'na 'ka li 'ɩn wa 'na 'ka 'ma.
13 Nyɩma ‑wa bhlɩa wɛlɩ ‑mɩnɩ,
wa ka nyɩmaa glʋ 'sɔ ‑gʋzi.
14 'Ɩn wa yia ‑Lagɔbʋbɔnyaa ‑cɩan ‑yɔ nyɩma kpasɩɩ ‑gbɛ mnɩ.
'Ɩn wa nɛɛ ‑maa ‑ylaɛ:
«‑A ka bi ‑Lagɔ 'yu,
nɩɩ,
‑a 'nɩ ‑slɔ Pɔlʋ 'bha,
‑a 'na 'ka ‑lu yabhlogbɔɔ li.
15 'Ɩn ‑slɛɛn,
amɩa ‑yɔ gbʋwliwʋdɩnya bhlɩ wɛlɩ ‑bhlo,
'ɩn a 'ka 'slʋjaa ‑kanyɔ 'kadʋ ‑yla gba nɩɩ,
ɔ ‑la aɩn Pɔlʋ ‑dawli nya,
a 'yɩbha a 'ka ɔ ‑yɔgbʋ 'wʋsɩsalɩ tɩklɩɩ.
We ‑ka ‑amɩa,
‑a ka ‑amɩaa 'dɛ lamnazɩ ‑a 'ka ɔ 'bha,
'bhie,
ɔ 'ka ‑seli nyni.»
16 'Ɩn wɛlɩ wa bhlɩa Pɔlʋ daa,
ɔ bhɔlɔɔ 'yu 'nʋa we,
'ɩn ɔ yia 'slʋjaa ‑budu 'kadʋ zɔ Pɔlʋ 'dɩ ‑salɩa mnɩ.
17 Tɔʋn,
Pɔlʋ laa 'slʋjaa glʋ gbuu 'yugalɩnyɔ yabhlo,
'ɩn ɔ nɛɛ ɔ ‑ylaɛ:
«‑Ɩn kwa nyimeslɔyu nɩ 'slʋjaa ‑kanyɔ 'kadʋʋ ‑gbɛ,
nɩɩ,
ɔ ka gbʋ yabhlo ɔ 'ka we gba ɔ ‑yla.»
18 Ɔɔ 'slʋja ‑yɔ ɔɔ nyimeslɔyu yia 'slʋjaa ‑kanyɔ 'kadʋʋ ‑gbɛ mnɩ,
'ɩn ɔ nɛɛ ɔ ‑ylaɛ:
«‑Kaslʋnyɩmɛ Pɔlʋ laa 'mɩ,
ɔ nɛɛ:
ɩn ‑la ‑mɩ nyimeslɔyu nɩ.
‑Mɔɔ ka gbʋ yabhlo ɔ 'ka ‑mɩ ‑yla we gba.»
19 'Slʋjaa ‑kanyɔ 'kadʋ kpaa nyimeslɔyuu sɔ la,
ɔ ‑yɔ ɔ vlaa gwe ‑sɛ,
'ɩn ɔ yia ɔ layɩbhaɛ:
«Lɛɛ ‑gbʋ ‑ɩn 'yɩbha ‑ɩn 'ka 'mɩ ‑yla gbaa?»
20 'Ɩn nyimeslɔyu yia we 'bɩgʋpalɩɛ:
«Zuifʋ ka wɛlɩ ‑bhlo bhlɩ nɩɩ,
‑ɩn kwa cɩzɩ Pɔlʋ gbʋwliwʋdɩnya 'yu.
Gbaa wa yia ‑dawli nya nɩɩ,
gbʋwliwʋdɩnya 'yɩbha wa 'ka ɔ ‑yɔgbʋ 'wʋsɩsalɩ tɩklɩɩ.
21 'Ɩn ‑ɩn 'na 'nʋnʋ wa wɛlɩ ‑nɩ!
Nɩɩ,
‑wa zizea ɔ 'bhabhɩee 'gbʋ,
wa mneni nyɩmaa glʋ 'sɔ ‑gʋzi.
Wa ka bi ‑Lagɔ 'yu,
wa nɛɛ,
wa 'nɩ ‑slɔ Pɔlʋ 'bha,
wa 'na 'ka li,
'ɩn wa 'na 'ka 'ma.
Nɩɩ,
‑slɛɛn,
wa ka lamnazɩ,
‑na wɛlɩ wa mɩa wʋda.»
22 Da ɔɔ 'slʋjaa ‑kanyɔ 'kadʋ gbaa nyimeslɔyu ‑yla nɩɩ:
«‑We ‑ɩn gbaa da 'mɩ ‑yla,
‑ɩn 'na gbalɩ we nyɩmɛ yabhlogbɔɔ ‑yla ‑nɩ.»
'Bhie,
ɔ yia ‑mɔɔ 'yitide,
'ɩn ‑mɔɔ yia mnɩ.
'Slʋjaa ‑kanyɔ 'kadʋ kwaa Pɔlʋ Felisɩɩ ‑gbɛ
23 ‑Mʋʋ 'bɩgʋ,
'slʋjaa ‑kanyɔ 'kadʋ laa ɔ 'slʋjaa glʋ gbuu 'yugalɩnya 'sɔ,
'ɩn ɔ nɛɛ wa ‑ylaɛ:
«'Slʋjaa 'wlu ‑bhlo (200) klaa,
nɩmɛsʋʋn ‑gʋʋ 'slʋjaa glʋ ta 'ya kugbua (70) ‑yɔ 'slʋjaa 'wlu ‑bhlo kaa 'li kwɛɛ,
a gbeli da wa 'wlu.
'Ɩn a 'dɛ weee mnazɩ la,
jibheza lɛlɩɩ gbomnʋanʋ nya,
a 'ka Sezalegbe nʋkplɛ mnɩ.
24 A mnazɩ nɩmasʋʋn ‑yɔ,
'ɩn a 'ka Pɔlʋ 'wʋbhu we ‑gʋ,
'ɩn a 'ka ɔ dʋdʋʋ 'wlulapɩlɩnyɔ Felisɩɩ ‑gbɛ kwa ‑dlɔɔ.»
25 'Ɩn ɔ yia 'sɛbhɛ cɛlɩɛ:
26 Dʋdʋʋ 'wlulapɩlɩnyɔ Felisɩ 'kadʋ,
‑amɩ Klodʋ Liziasɩ saa ‑mɩ fʋ.
27 Nyɩmɛ ‑ɔ ɩn 'paa dɛ ‑mɩ yoo,
Zuifʋ ka ɔ kpa,
wa 'ka ɔ 'bha.
'Ɩn da ɩn 'nʋa nɩɩ,
Wlɔmʋ ‑dʋdʋwlakpɛ ‑wa,
'ɩn ɩn ‑yɔ na 'slʋja yia mnɩ,
ɩn yia ɔ wa kwɛɛ ‑sa.
28 Ɩn 'yɩbha gbʋ ‑we Zuifʋ dɩa ɔ 'wlu,
ɩn 'ka we 'ji 'nʋ.
We 'gbʋ,
ɩn yia ɔ wa gbʋwliwʋdɩnya 'yu kwa.
29 Ɩn ka we ‑yɔyɩ nɩɩ,
wa 'dɛɛ titee 'gbʋ,
wa dɩa ɔ gbʋ 'wlu.
'Ɩn wa 'nɩ mneni wa 'ka ɔ gbʋ yabhlogbɔɔ ‑yla lapalɩ,
‑we ka 'gbʋ wa 'kaa ɔ 'bha,
'ɩn wa 'kaa ɔ ‑kaslʋ 'wʋpa,
we 'nɩ 'yɩe.
30 'Bhie,
wa yia 'mɩ wɛlɩ kwaɛ,
Zuifʋ ka ɔ ‑yɔgbʋ zʋ.
‑Bha ‑bhlokpadɛ,
ɩn 'paa ɔ yoo ‑na ‑gbɛ.
'Ɩn ɩn nɛɛ ɔ gbʋwludɩnya ‑ylaɛ,
wa 'kla ɔ ‑na ‑gbɛ.
31 ‑We 'slʋjaa ‑kanyɔ 'kadʋ gbaa,
ɔ 'slʋja ka we lɛnʋ.
Wa 'bhua Pɔlʋ 'wʋ sabɔ,
'ɩn wa ‑yɔ ɔ yia Antipatlisɩgbe nʋkplɛ mnɩ.
32 ‑Mʋʋ zlɩ zlɩa,
'ɩn 'slʋja mɩa bhʋ ‑gʋ nɔda,
‑maa yia 'slʋjaa ‑budu 'kadʋ zɔ lʋbhiti.
'Ɩn wa yia 'slʋja mɩa nɩmasʋʋn ‑gʋ 'yitide,
‑maa ‑yɔ Pɔlʋ yia 'yoo 'yliyɔzʋ.
33 'Slʋja mɩa nɩmasʋʋn ‑gʋ nynia Sezalee,
'ɩn wa yia dʋdʋʋ 'wlulapɩlɩnyɔ 'sɛbhɛ yoo 'nyɛ,
'bhie,
wa yia ɔ Pɔlʋ 'klʋslolu.
34 Dʋdʋʋ 'wlulapɩlɩnyɔ zɛlɩa wee 'sɛbhɛ,
'ɩn ɔ yia Pɔlʋ layɩbha:
«Dʋdʋ ‑mʋmʋ ka nyɩmɛ ‑ɩn ‑mɩa?»
'Ɩn Pɔlʋ yia we 'bɩgʋpalɩɛ:
«Silisi ‑nyɩmɛ ɩn ‑mɩa.»
35 'Ɩn ɔ nɛɛ ɔ ‑ylaɛ:
«‑Wa dɩa ‑mɩ gbʋ 'wlu,
wa ‑ka yi,
'ɩn na yɩbhaa ‑mɩ la.»
'Ɩn ɔ nɛɛ,
wa kwa Pɔlʋ Ewlodʋʋ gbʋwʋbhubudu 'kadʋ zɔ.