Piɛlɩ ‑yɔ Zaan wa kwaa Zuifʋʋ gbʋwliwʋdɩnya 'yu
4
Da Piɛlɩ ‑yɔ Zaan mɩa nyɩmaa ‑zlo ‑yla gbʋ gbada,
'ɩn ‑Lagɔbʋbɔnya klaa,
‑Lagɔbudu 'kadʋʋ ŋwɛkʋnyaa ‑kanyɔ ‑yɔ Sadusenyɩma yia ‑bha wa ylɩ.
2 'Ɩn wa yia 'cɛ 'pa,
da Piɛlɩ ‑yɔ Zaan 'sɔ mɩa nyɩmaa ‑zlo ‑sloluda nɩɩ,
‑Zezu ka tlɩtlɩnya glaa 'wʋsɔ,
mʋ slolua we nɩɩ,
tlɩtlɩnya mneni wa 'ka tlɩtlɩe lʋ 'wʋsɔ.
3 Wa kpaa wa,
jibhe ka zɔɔ 'gbʋ,
wa yia wa ‑kaslʋbudu zɔ ‑gueli.
4 ‑Mʋʋ bhla,
nyɩmaa ‑zlo ‑wa 'nʋa ‑Lagɔgbʋ,
yia we ‑yɔŋwnu.
Wa nyni sa nyɩmaa 'wlu glʋ ‑bhlo 'wlu gbu.
(5.000)
5 ‑Mʋʋ zlɩ zlɩa,
Zuifʋʋ 'yugalɩnya klaa,
nyɩma kpasɩ ‑yɔ ‑Lagɔɔ titee gwesanya yia 'wlugbeli ‑Zeluzalɛmʋ.
6 Nyɩma ‑wa mɩa ‑bha wa ŋnɩ nɩ:
‑Lagɔbʋbɔnyaa ‑kanyɔ 'kadʋ Anasɩ,
Kaifʋ,
Zaan,
Alɛzandlɩ we ‑yɔ ‑Lagɔbʋbɔnyaa ‑kanyɔ 'kadʋʋ zʋaylinyɩma weee.
7 'Ɩn wa yia Piɛlɩ ‑yɔ Zaan kwa wa 'yu,
'ɩn wa yia wa layɩbhaɛ:
«Se ‑mʋmʋ nya a jipe ɔɔ 'kukunyɔa?
'Ɩn nyɔɔ ka 'ŋnɩ ‑gʋ a nʋ we lɛa?»
8 Zuzu 'Pʋpa yea Piɛlɩ,
ɔ nɛɛ wa ‑ylaɛ:
«'Yugalɩnya,
nyɩma kpasɩ,
9 ‑a ka guzʋnyɔ ‑mɔnɩ zʋzɔnʋ ‑yla lɛnʋʋ 'gbʋ,
wa yɩbhaa ‑zɛɛn ylɩ nya ‑aɩn la,
sa ‑a jipeli ɔɔ nyɩmɛ 'wʋla?
10 A 'dɛ weee yibheli we 'ji,
'ɩn Izlaɛlɩnyɩma yibheli we 'jiɛ:
Nazalɛtɩyu ‑Zezu Klisɩ a kʋlʋa su ‑gʋ la,
'ɩn ‑Lagɔ 'bhua 'wʋ tlɩtlɩnya glaa,
ɔ 'ŋnɩ nya nyɩmɛ ‑mɔnɩ 'pʋa,
'ɩn ɔ 'yligbea da aɩn 'yu.
11 Nɩɩ,
we mɩ cɛlɩda ‑Lagɔsɛbhɛ 'wʋ ‑Zezuu daaɛ:
‹Tʋkpa ‑we amɩa ‑budusʋbhanya ‑saa kwnɛɛ,
mʋ ‑zɛa ‑buduu gwɩgwɩyli ‑tʋkpa ‑zɔnʋ.› »
12 Piɛlɩ nɛɛ 'yaɛ:
«Ɔ 'dɛbhlogbɔɔɔ ‑gbɛ wa yɩa 'pʋpʋe.
Nɩɩ,
dʋdʋ weee ‑gʋ,
nyɩma weee glaa,
‑Lagɔ 'nɩ nyɩmɛ ‑putuu 'ŋnɩ wla,
ɔ 'ka ‑aɩn gbʋ 'wʋsa.»
13 Da Zuifʋʋ gbʋwliwʋdɩnya 'yɩa Piɛlɩ ‑yɔ Zaaan dlɩ tɛlɔ ‑yɔ,
'ɩn ŋwɛgaga yia wa sʋbha.
'Ɩn wa yia we ‑yɔyɩ nɩɩ,
nyɩma ‑kpʋa ‑yɔ ‑wa 'nɩa 'sɛbhɛ ‑yi,
ma ‑wa.
'Ɩn wa ‑yi 'ya wa ‑Zezuu nɔnɔnya 'cɩn nya.
14 'Ɩn wa yi 'yaa nyɩmɛ ‑ɔ wa jipea ‑yɔyɩ 'yligbeda wa kwesi.
'Ɩn wa 'nɩ wɛlɩ ‑ka,
wa 'ka we 'bɩgʋpalɩ.
15 'Ɩn wa nɛɛ wa ‑ylaɛ:
«A 'tla gbʋwʋbhu ‑budu zɔ!»
'Ɩn wa 'dɛkpʋa yia kpɛlɩe bhli.
16 Wa nɛɛ:
«Sa ‑a 'ka waa nyɩma ‑manɩ nʋa?
Wa ka gwɛdigbʋ lɛnʋ,
‑Zeluzalɛmʋ ‑nyɩma weee ka ‑bha 'yɩ,
'ɩn ‑a 'nɩ mneni ‑a 'ka we kpɛlɩ.
17 Nɩɩ,
wee gbʋ ‑mɩnɩ yi lamneni nyɩma ‑nyɩdɩ ‑tapaa 'gbʋ,
‑a 'yligbeli wa ‑glawɛlɩ nya!
Nyɔɔo nyɔɔ ‑ɔ ‑ka ‑mɩ,
wa yi ɔ ‑yla gbʋ gba ‑Zezuu 'ŋnɩ nya.»
18 Wa laa Piɛlɩ ‑yɔ Zaan,
'ɩn wa nɛɛ wa ‑ylaɛ:
«A 'na gbalɩ nyɩma ‑yla gbʋ ‑Zezuu 'ŋnɩ nya ‑nɩ,
'ɩn a 'na ‑slolu wa gbʋ we nya 'mnumnu ‑nɩ.»
19 'Ɩn Piɛlɩ ‑yɔ Zaan nɛɛ wa ‑ylaɛ:
«A 'yɩbha ‑slɔ amɩaa 'dɛ la.
We nanɩ 'yli,
‑Lagɔ 'yu,
‑a zʋ amɩa 'nʋŋwɛ yaayɩɩ,
‑a zʋ ‑Lagɔ 'nʋŋwɛɛ?
20 'A!
Gbʋ ‑we ka da ‑a 'yɩa,
'ɩn ‑a 'nʋa,
‑a 'nɩ mneni,
‑a 'ka gba ‑a 'nɩa we gba.»
21 Gbʋwliwʋdɩnya yia wa 'cɛ ‑yɔ 'palɩ 'ya 'sɔ.
‑Mʋʋ 'bɩgʋ,
'ɩn wa yia wa 'yitide.
Gbʋ ‑we ka 'gbʋ wa 'kaa wa 'klɩyɩe 'wʋpalɩ,
wa 'nɩ we 'yɩ.
Nyɩma weee mɩ ‑Lagɔɔ 'ŋnɩ ‑mnɩnɩda,
‑we nʋa lɛɛ 'gbʋ.
22 Nyɩmɛ ‑ɔ 'pʋa gwɛdi sa,
ɔ ‑zʋ mneni we 'ka ‑zʋʋ glʋ 'sɔ ‑gʋzi.
‑Lagɔnyɩma bhubhoea ‑Lagɔ
23 Da wa 'tidea Piɛlɩ ‑yɔ Zaan 'yi,
'ɩn wa yia wa bheliaa ‑gbɛ mnɩ.
'Ɩn ‑we ‑Lagɔbʋbɔnyaa ‑cɩan ‑yɔ nyɩma kpasɩ gbaa wa ‑yla,
wa yia we ‑sa lʋdɩ nya.
24 Da waa ‑Lagɔbhelia 'nʋa gbʋ ‑mɩnɩ,
'ɩn ‑maa yia ‑Lagɔ bhubhoe bhli dabʋdʋ.
'Ɩn wa nɛɛ:
«‑Amɩaa ‑Kanyɔ,
‑mɩ nʋa yalɩ ‑yɔ dʋdʋ ‑yɔ gumunyu lɛ,
'ɩn ‑we weee mɩa we ‑gʋ ‑yɔ we nʋkplɛ,
‑mɩ nʋa we lɛ.
25 ‑Mɩ gbaa,
Zuzu 'Pʋpa nya,
‑amɩaa dʋkpasa ‑Davidɩ ‑ɔ ‑wa ‑na lubhonʋnyɔ,
ɔ ŋwɛ nyaɛ:
‹Lɛɛ ka 'gbʋ dʋdʋgʋ ‑nyɩma weee
dɩ ‑zlɛ la 'dɛɛ 'ylimanɩe nya?
Lɛɛ ka 'gbʋ wa pʋpalɩ gbʋ ‑kpʋa gbʋa?
26 Dʋdʋʋ 'wlulapɩlɩnya ‑sɔa 'wʋ tʋ nya,
'ɩn nyɩmaa 'yugalɩnya yia gwe 'pa,
Jejitapɛ ‑yɔ ɔ ‑Bhasanyɔ ‑yɔ.›
27 Nɩɩ,
gbʋzɔnʋ ‑wa,
‑na lubhonʋnyɔ ‑Zezu ‑ɔ mɩa ‑mɔwlʋda,
‑ɩn ‑saa ‑bha,
'ɩn ‑ɩn slua 'kpɩ 'wluo,
Ewlodʋ klaa,
Pɔnsɩ Pilatɩ klaa,
'lakpanya ‑yɔ Izlaɛlɩɩ zʋaylinyɩma ka ɔ ‑yɔ gwe 'palɩ,
wee dʋdʋ ‑gʋ.
28 ‑We weee ‑ɩn gbaa ‑na 'tɩtɛ ‑yɔ ‑na dʋmagbʋ nya pepe,
'mʋ wa nʋa dɛ lɛ.
29 'Ɩn Jejitapɛ,
sa wa 'palɩa ‑aɩn 'cɛ ‑yɔ,
‑ɩn yla we.
'Ɩn ‑ɩn 'tɛmanɩ ‑na lubhonʋnyaa dlɩ la,
wa 'ka ‑na gbʋ gba.
30 ‑Ɩn ‑glo ‑na sɔ 'wʋ,
'ɩn nyɩmaa jipee ‑yɔ gwɛdigbʋ ‑yɔ gbʋ 'kadɩ 'kadɩ nʋ lɛ,
‑na lubhonʋnyɔ ‑Zezu mɩa ‑mɔwlʋdaa 'ŋnɩ nya.
We ‑mɩ 'sa.»
31 Bhla ‑we nya wa bhɩa ‑Lagɔ bhubhoe,
da wa ‑dɩa la,
'ɩn ‑bha yia zuklu.
'Ɩn Zuzu 'Pʋpa yia wa 'dɛ weee ye,
tɔʋn,
wa yia ‑Lagɔwɛlɩ gbagbɩe bhli,
dlɩ tɛlɔ nya.
‑Lagɔnyɩma suslolua wa zʋzɔnʋli 'wʋ da yabhlo
32 Nyɩma weee ‑wa zʋa ‑Zezu dlɩ ‑gʋ,
wa dlɩ ‑yɔ wa 'wlukʋʋn lapʋpalɩe ‑bhlo.
'Ɩn nyɩmɛ yabhlogbɔɔ'ɔ gba nɩɩ,
ɔnʋʋ zʋzɔnʋnya mɩa,
ɔ 'dɛ ‑bhloo ‑nʋ ‑wa.
Nɩɩ,
wa zʋzɔnʋ weee mɩa,
'wʋ wa suslolua we da yabhlo.
33 'Tɩtɛ 'kadʋ yabhlo nya,
‑Zezuu tietienya gbaa Nyɩmaa ‑Kanyɔ ‑Zezuu 'wʋsɔgbʋ tlɩtlɩnya glaa.
'Ɩn ‑Lagɔɔ 'nanɩ 'kadʋ yia wa 'dɛ weee ‑gʋ kwlili.
34 Wa glaa bobabhanyɔ 'nɩ ‑mɩ.
‑Wa weee kaa kpaa ‑yɔ ‑budunya,
pɛlʋ wa paa we,
'ɩn wa ‑yɔ we ‑yɔgwɛzi yia.
35 'Ɩn wa ‑yɔ wee 'gwɛzi yia,
‑zugba wa nyɛ we ‑Zezuu tietienya yoo.
‑Mʋʋ 'bɩgʋ,
'ɩn ‑maa dlilia we wa 'wʋla ‑bhlo ‑bhlo,
sa wa ‑yɔgbʋ ‑ka ‑mɩ,
'ɩn wa bhɩa we.