Da ‑Zezuu gbʋlɛnʋ se 'bhʋlʋa?
20
'Ylɩ yabhlo nya,
‑Zezu mɩ nyɩma gbʋ ‑sloluda ‑Lagɔbudu 'kadʋ zɔ,
‑zugba ɔ gba wa ‑yla ‑Lagɔgbʋ.
'Ɩn ‑Lagɔbʋbɔnyaa ‑cɩan klaa,
‑Lagɔɔ titee gwesanya ‑yɔ Zuifʋʋ nyɩma kpasɩ yia ɔ ‑gbɛ yi.
2 'Ɩn wa yia ɔ layɩbhaɛ:
«Se ‑mʋmʋ nya ‑na nʋ gbʋnya ‑mɩnɩ lɛa,
‑ɩn gba we ‑aɩn ‑yla.
'Ɩn nyɔɔ 'nyɛ ‑mɩ we lɛnʋ sea?»
3 ‑Zezu yia we 'bɩgʋpalɩ wa ‑ylaɛ:
«Gbʋʋ gɔ ‑bhlo na yi 'yaa amɩa layɩbhaa.
4 Nyɔɔ tie Zaan ɔ batizee nyɩma,
‑Lagɔ ‑wa yaayɩɩ,
nyɩma ‑wa yɩ?
A gba 'mɩ ‑yla we.»
5 'Ɩn wa yia we ‑gʋ kpɛlɩe bhli wa 'dɛkpʋa nyɩdɩ,
'ɩn wa nɛɛ:
«‑A ‑ka gba,
‹‑Lagɔ tiea ɔ›,
'ɩn ɔ yɩbhaa ‑aɩn laɛ:
‹Lɛɛ ka 'gbʋ a 'nɩ Zaaan wɛlɩ 'wʋŋwnua?›
6 'Ɩn ‑a ‑ka gba:
‹Nyɩmɛ tiea ɔ›,
'ɩn nyɩmaa ‑zlo bhaa ‑aɩn gbɔkʋ 'wʋ.
‑We ka gbʋ ‑wa,
nyɩma ‑yi we 'ji nɩɩ,
Zaan mɩ ‑Lagɔgbʋʋ ‑falɩpanyɔ nya.»
7 We 'gbʋ,
wa yia we 'bɩgʋpalɩ ‑Zezu ‑ylaɛ:
«‑Ɔ tiea Zaan,
‑a 'nɩ ɔ ‑yi.»
8 'Ɩn ‑Zezu nɛɛ wa ‑ylaɛ:
«‑Aa.
We ‑ka 'sa ‑mɩ,
‑ɔ 'nyɛa 'mɩ wee gbʋnya ‑mɩnɩɩ lɛnʋ se,
‑amɩ 'na 'ka 'ya ‑mɔɔ ‑kanyɔɔ 'ŋnɩ aɩn ‑yla gba.»
Nʋkplɛ 'ylinyunonya ‑wa nʋa ‑dlɔkpaa lubho
9 ‑Mʋʋ 'bɩgʋ,
‑Zezu yia nyɩmaa ‑zlo gbʋʋ nine ‑mɩnɩ 'palɩ:
«Nyɩmɛ yabhlo 'paa ‑dlɔkpaa,
'ɩn ɔ yia we ‑gʋ ‑busalubhonʋnya lapalɩ.
'Ɩn ɔ yia ‑mɔ ‑gwlɛ ‑lakpa 'wʋ mnɩ.
10 Da ‑dlɔya ‑sa bhla nynia,
'ɩn ɔ yia ɔ zɔlubhonʋnyɔ yabhlo tie ‑busalubhonʋnya 'bɩ,
wa 'ka ɔ ‑nʋ wla.
'Ɩn waa ‑busalubhonʋnya ‑manɩ yia ɔɔ zɔlubhonʋnyɔ ‑mɔnɩ bhɩtɩ,
'bhie,
wa yia ɔ vu kwɛ klo nya.
11 'Ɩn ɔɔ kpaaa ‑kanyɔ yi 'yaa ɔ zɔlubhonʋnyɔ ‑putu tie.
'Ɩn waa ‑busalubhonʋnya yi 'yaa ‑mɔɔ bhɩtɩ,
wa yia ɔ vɛlɩ,
'ɩn wa yia ɔ vu kwɛ klo nya.
12 Ɔ yi 'yaa ɔ zɔlubhonʋnyaa tanʋ tie.
Wa nʋ 'yaa ‑mɔɔ lɛ,
'ɩn wa yia ‑mɔɔ kpaa ‑gnima viteli.
13 «Ɔɔ ‑dlɔkpaa ‑kanyɔ nɛɛ:
‹Sa ɩn 'ka nʋa?
Na yu,
‑ɔ ka zɛ ɩn ‑kalɩa,
'mɔ na yia tiea.
Na dlɩ zɔ nɩɩ,
‑bha wa yia ɔ zʋa.›
14 «Nɩɩ,
da ‑busalubhonʋnya 'yɩa ɔɔ 'yu,
wa nɛɛ wa 'dɛkpʋa nyɩdɩɛ:
‹‑Ɔ 'kaa cɩ ɔɔ kpaaa ‑kanyɔɔ 'bɩ li,
mɔ nɩ.
‑A 'bha ɔ,
'ɩn wee kpaa 'ka ‑amɩaa ‑nʋ ‑zɛ.›
15 'Ɩn wa yia ɔ kpaa ‑gnima viteli,
'ɩn wa yia ɔ 'bha.»
'Ɩn ‑Zezu yia layɩbhaɛ:
«'Lee,
sa ɔɔ ‑dlɔkpaa ‑kanyɔ 'ka wa nʋa?
16 Yia ɔ yia,
ɔ 'ka ɔ ‑busalubhonʋnya ‑manɩ 'bha,
'ɩn ɔ 'ka wee kpaa nyɩma ‑putu yoo 'nyɛ.»
Da nyɩma 'nʋa wee wɛlɩ ‑mɩnɩ,
'ɩn wa nɛɛ:
«‑Gbaa!
‑Mʋʋ 'na 'ka lɛnʋ!»
17 'Ɩn ‑Zezu ylaa wa,
ɔ nɛɛ:
«Wɛlɩ mɩa da cɛlɩda,
sa we 'ji mɩa?
‹Tʋkpa ‑we ‑budusʋbhanya ‑saa kwnɛɛ,
mʋ ‑zɛa ‑buduu gwɩgwɩyli ‑tʋkpa ‑zɔnʋ›.
18 Nyɔɔo nyɔɔ ‑ka wee tʋkpa ‑mɩnɩ ‑gʋ bhlili,
la ɔ wʋwlalɩa.
'Ɩn wee tʋkpa ‑ka nyɔɔ ‑gʋ bhlili,
ɔ tɔpʋ we saa.»
Nisʋn ‑gwɛzii plʋlʋe Sezaa kwɛɛ
19 ‑Lagɔɔ titee gwesanya klaa,
‑Lagɔbʋbɔnyaa ‑cɩan klaa,
wa ka we 'jiyibheli nɩɩ,
ma ‑yɔ ‑Zezu ‑saa wee gbʋʋ nine.
Wa mɩ 'klɩ 'yɩda,
wa 'ka ‑Zezu kpa ‑bha ‑bhlokpadɛ,
'ɩn wa yia nyɩmaa ‑zlo sɔ.
20 Wa mɩ sa ‑Zezu ‑kʋda,
‑mʋʋ 'bɩgʋ,
'ɩn wa yia ɔ 'wiemɩ gbʋʋ lɛnʋnya yoo 'pa,
‑wa nʋa wa 'dɛ nyɩma tɩklɩɩ 'bhisa.
Waa nyɩma ‑manɩ 'ka ɔ zɔbhli,
ɔ layɩbhɩe nya.
'Ɩn wɛlɩ ‑kpʋa ‑ka ɔ ŋwɛɛ 'tla,
wa 'ka ɔ gbʋ 'wlu dɩ,
'ɩn dʋdʋʋ 'wlulapɩlɩnyɔ kaa 'tɩtɛ ‑yɔ se,
wa 'ka ɔ ‑mɔɔ yoo 'nyɛ.
21 'Ɩn wa yia ɔ gbʋ ‑mɩnɩ layɩbhaɛ:
«‑Amɩaa ‑Slolunyɔ,
‑we ‑na gbaa,
'ɩn ‑na slolua,
‑a ‑yi we 'ji nɩɩ,
we tɩklɩɩ.
‑Ɩ'ɩn yla nyɩmɛɛ ‑kwɩkwɩ.
Sa ‑Lagɔ 'yɩbhaa nyɩmɛ ‑mɩ,
'mʋ ‑na slolua gbʋzɔnʋ sa.
22 'Yoo ‑amɩaa tite nyɛ ‑aɩn,
‑a plʋlʋ Sezaa kwɛɛ nisʋn ‑gwɛzi yaayɩɩ,
‑a 'na plʋlʋ we ‑nɩɩ?»
23 ‑Zezu yibhelia wa ‑dawlii 'ji,
'ɩn ɔ nɛɛ wa ‑ylaɛ:
24 «A ‑slolu 'mɩ Wlɔmʋ ‑tama yabhlo 'klʋ.
Nyɔɔ ka 'wlu ‑yɔ ɔ ŋnɩ mɩ we ‑gʋa?»
'Ɩn wa nɛɛ:
«Sezaa ‑wa.»
25 'Ɩn ɔ nɛɛ wa ‑ylaɛ:
«‑We ‑ka Sezaaa ‑nʋ,
a 'nyɛ we Sezaa yoo.
'Ɩn ‑we ‑ka ‑Lagɔɔ ‑nʋ,
a 'nyɛ we ‑Lagɔ yoo.»
26 Wɛlɩ ‑we ɔ mɩa gbada nyɩmaa ‑zlo 'yu,
we ‑mʋmʋ ‑gʋ wa 'kaa ɔ kpalɩ,
‑mʋʋ 'nɩ 'yɩ.
Nɩɩ,
ɔ gbʋʋ 'bɩgʋpalɩ wɛlɩ ka wa ŋwɛgaga ‑sʋbhalɩɩ 'gbʋ,
wa yia ŋwɛ 'muda ‑tʋ.
'Lee, tlɩtlɩnya yi 'wʋsɔɔ?
27 *Sadusenyɩma,
‑wa gbaa tlɩtlɩnya 'nɩ mneni wa 'ka tlɩtlɩe lʋ 'wʋsɔ,
ma bɛa ‑Zezu kwesi,
'ɩn wa nɛɛ ɔ ‑ylaɛ:
28 «‑Amɩaa ‑kanyɔ,
Moizɩ ka we cɛlɩ ‑aɩn ‑yla titee 'sɛbhɛ 'wʋɛ:
‹Nyɩmɛ ‑ka 'ŋwnɔ ‑ka,
ɔ ‑ka tlɩ,
ɔ 'nɩ 'yu ‑ka,
ɔ bheli kwa ɔ ‑dʋgbadaa.
'Ɩn ɔ ‑yɔ ɔɔ 'ŋwnɔ 'sɔ 'ka ɔ bhelii zʋa lala,
'ɩn ‑mɔɔ 'ŋnɩ 'ka dʋdʋ ‑gʋ ‑tʋ.›
29 Nɩɩ,
zlɩmɛ nyɩmɛ yabhlo ka nʋkpasuyua gbesɔ.
Wa kpasa kwaa 'ŋwnɔ,
ɔ 'nɩ gwalɩ,
'ɩn ɔ yia tlɩ.
30 Wa 'sɔnʋ yia ɔɔ 'ŋwnɔ kwa.
31 'Bhie,
wa tanʋ yia ɔ kwa.
'Sa we nʋa waa bhelia gbesɔɔ ‑nʋ nya,
wa 'dɛ weee ‑yɔ ɔ 'nɩ gwalɩ,
'ɩn wa yia tlɩ.
32 Wanʋʋ 'bɩgʋ,
'ɩn ɔɔ 'ŋwnɔ ‑mɔɔ yi 'yaa tlɩ.
33 Nɩɩ,
waa bhelia gbesɔ ka ɔɔ 'ŋwnɔ ‑mɔnɩ kwa ‑bhlo ‑bhlo.
'Ɩn 'ylɩ ‑we nya tlɩtlɩnya yia 'wʋsɔa,
nyɔɔ ka 'ŋwnɔ ɔ ‑mɩa?»
34 'Ɩn ‑Zezu yia we 'bɩgʋpalɩ wa ‑ylaɛ:
«Bhla ‑mɩnɩɩ nyɩma mɩ kʋkwalɩda.
35 Nɩɩ,
nyɩma ‑wa ‑Lagɔ ‑saa ‑bha,
'ɩn ‑wa kaa we 'klʋ,
wa 'ka 'wʋsɔ tlɩtlɩnya glaa,
'ɩn wa 'ka dʋdʋ lolu ‑gʋ mnɩ,
wa 'na 'ka kʋkwalɩ.
36 Nɩɩ,
wa 'nɩ ‑slɛɛn mneni wa 'ka tlɩ,
‑we ka gbʋ ‑wa,
wa 'wlʋ ‑Lagɔɔ 'anzɩnya.
Wa mɩ ‑Lagɔɔ 'yua nya.
‑Lagɔ ka wa 'wʋbhu tlɩtlɩnya lʋ,
'ɩn wa yia 'yliyɔgagɩe 'yɩ.
37 Moizɩ ka we ‑slolu vaa,
nɩɩ,
tlɩtlɩnya yia 'wʋsɔa,
'ɩn wa 'ka 'yliyɔgagɩe 'yɩ.
Da misagʋsu pilɛɛ ‑bhoa 'yli,
'ɩn ɔ yia Jejitapɛ la:
‹Ablaamʋʋ ‑Lagɔ,
Izakɩɩ ‑Lagɔ,
Zakɔbʋʋ ‑Lagɔ.› »
38 'Ɩn ‑Zezu yia we ‑gʋdɩɛ:
«Wɛlɩ ‑mɩnɩ slolua nɩɩ,
‑Lagɔ mɩa,
'yliyɔganyaa ‑Lagɔ ‑wa,
ɔ 'nɩ tlɩtlɩnyaa ‑Lagɔ.
Nɩɩ,
wa 'dɛ weee mɩ 'yliyɔganya nya ‑Lagɔ 'yliya 'wʋ.»
39 ‑Lagɔɔ titee gwesanya tɔlʋa nɛɛ ‑Zezu ‑ylaɛ:
«‑Amɩaa ‑slolunyɔ,
‑we ‑ɩn gbaa,
gbʋzɔnʋ ‑wa.»
40 'Ɩn waa nyɩma 'nɩ 'maslɛɛn 'yɩbha,
wa 'ka gbʋ ‑putu ɔ layɩbha.
‑Lagɔɔ ‑Bhasanyɔ mɩ ‑Davidɩɩ ‑Kanyɔ nya
41 ‑Zezu nɛɛ wa ‑ylaɛ:
«Lɛɛ ka 'gbʋ wa gba ‑Lagɔɔ ‑Bhasanyɔ mɩa,
‑Davidɩɩ yu ‑wa?
42 Nɩɩ,
‑Davidɩɩ 'dɛbhie ‑gbolu nɛɛ Lʋʋsɛbhɛ 'wʋɛ:
‹Jejitapɛ nɛɛ na ‑Kanyɔ ‑ylaɛ:
«‑Ɩn ‑dɩ da la na lilisɔlʋ.
43 'Ɩn ɩn 'ka ‑na tʋnyɩma ‑na bhʋ zɔ lapalɩ,
‑ɩn 'ka wa ‑gʋ nɔ.» ›
44 Nɩɩ,
sa ɔɔ ‑Lagɔɔ ‑Bhasanyɔ 'ka 'ya ‑Davidɩɩ 'yu ‑zɛa?»
A 'na nʋnʋ ‑Lagɔɔ titee gwesanyaa lɛnʋgbʋ lɛ ‑nɩ
45 Da nyɩma weee ‑wa mɩa ‑bha,
wa mɩa ‑Zezu yukwli pʋlʋda,
'ɩn ɔ nɛɛ ɔ 'bɩnɔnya ‑ylaɛ:
46 «A zʋ amɩaa 'dɛ 'yliyɔ ‑Lagɔɔ titee gwesanyaa gbɛgbɛɩn.
Wa 'yɩbha tlʋlo ‑bana 'kadɩ 'wʋplaplɩe,
‑zugba wa zie we nya.
'Ɩn wa 'yɩbha wa ‑sa wa fʋ,
wa 'nʋŋwɛzʋzʋe nya ‑zejila 'wʋ.
‑Lagɔbudu zɔ ‑yɔ 'fɛtɩnya ‑gʋ,
'yugbɛɩn ladɩdɩe wa 'yɩbhaa kpe ‑zɔnʋnya ‑gʋ.
47 ‑Dʋgbaŋwnɩ wa saa ‑maa ‑lu weee kwɛɛ.
'Ɩn wa bhubhoea ‑Lagɔ nyɩma 'yliya 'wʋ kpokpo,
nyɩma tɩklɩɩ 'bhisa.
We 'gbʋ,
‑Lagɔ yia wa ‑yɔgbʋ 'wʋbhua,
'ɩn wanʋʋ ‑kaslʋ 'ka nyɩma tɔlʋaa ‑nʋ 'wʋzi.»