Gbʋwʋbhunyɔ 'nyuu ‑yɔ ‑dʋgbaŋwnɔ
18
‑Mʋʋ 'bɩgʋ,
‑Zezu yia wa gbʋʋ nine 'palɩ,
ɔ 'ka we wa 'klʋslolu nɩɩ,
‑Lagɔ wa 'kaa bhubhoeda ‑tʋ 'kɔmʋʋ,
'kʋa 'na wlalɩ wa 'ylila ‑nɩ.
2 «Gbʋwʋbhunyɔ yabhlo mɩa 'gbe yabhlo 'wʋ,
ɔ'ɔ sɔ ‑Lagɔ,
'ɩn ɔ'ɔ zʋ nyɩmɛ yabhlogbɔɔ 'nʋŋwɛ.
3 Wee 'gbe ‑bhloo 'dɛ 'wʋ,
‑dʋgbaŋwnɔ yabhlo mɩ ‑bha 'ya.
'Kɔmʋʋ ɔ mnɩa ɔɔ gbʋwʋbhunyɔɔ ‑gbɛ,
'ɩn ɔ gbaa ɔ ‑ylaɛ:
‹‑Ɩn 'bhu ɩn ‑yɔ na tʋnyɔ 'sɔɔ nyɩdɩ gbʋ 'wʋ›.
4 «'Ylɩ weee nya,
ɔɔ gbʋwʋbhunyɔ'ɔ ŋwnu we ‑yɔ.
'Bhie,
'ylɩ yabhlo nya,
'ɩn ɔ yia 'wlukʋʋn lapʋpalɩ,
ɔ nɛɛ ɔ 'dɛɛ dlɩ zɔɛ:
‹Ɩ'ɩn sɔ ‑Lagɔ,
'ɩn ɩ'ɩn zʋ nyɩmɛ yabhlogbɔɔ 'nʋŋwɛ,
gbʋzɔnʋ ‑wa.
5 Nɩɩ,
‑dʋgbaŋwnɔ ‑mɔnɩ mɩ 'mɩ sɩalɩda duuun 'gbʋ,
ɔ gbʋ na yia 'wʋbhua.
We 'nɩ ‑mʋʋʋ,
'ɩn ɔ yia 'mɩ sɩalɩa 'ylɩ weee nya.› »
6 'Bhie,
Nyɩmaa ‑Kanyɔ yia we ‑gʋdɩɛ:
«‑We ɔɔ gbʋwʋbhunyɔ 'nyuu gbaa,
a pʋlʋ we yukwli!
7 'Ɩn ‑Lagɔ naa,
‑mɔɔ ‑bhasanya ‑ka ɔ gbɛgbɛɩn 'wʋkpɩda ‑mɩ zlʋkpɛ ‑yɔ jibheza,
‑mɔɔ 'na 'ka wa ‑yɔgbʋ 'wʋbhu tɩklɩɩ?
'Lee,
we 'bɩ ɔ yia 'wʋgwlɛlɩa yɩ?
8 Ɩn nɛɛ aɩn ‑ylaɛ:
‑ɩnnya,
wa gbʋ ɔ yia 'wʋbhua slʋɩ.
'Ɩn da Nyɩmɛɛ 'Yu ‑ka yi,
ɔ yi dlɩzʋnya dʋdʋ ‑gʋ ylɩɩ?»
Falizɩnyɩmɛ ‑yɔ nisʋn ‑gwɛzisanyɔɔ gbʋʋ nine
9 Nyɩma ‑wa yɩa wa 'dɛ tɩklɩɩ ‑Lagɔ 'yliya 'wʋ,
'ɩn wa tlilia nyɩma tɔlʋa 'ylila,
ma ‑yla ‑Zezu 'paa gbʋʋ nine ‑mɩnɩ:
10 «Nyɩma sɔ mnɩa ‑Lagɔbudu 'kadʋ zɔ ‑Lagɔ bhubhoea.
'Yabhlo ‑wa Falizɩnyɩmɛ,
'ɩn ‑bʋdʋ ‑wa nisʋn ‑gwɛzisanyɔ.
11 «'Ɩn Falizɩnyɩmɛ ‑mɔnɩ yia ‑Lagɔ bhubhoe ɔ 'dɛɛ dlɩ zɔɛ:
‹'Oo ‑Lagɔ,
nyɩma ‑tɔlʋa ‑wa 'wienya,
tɔlʋa 'nɩ ‑mɩ tɩklɩɩ,
'ɩn tɔlʋa ‑yɔ 'ŋwnɩ ‑putu dɩa ‑budu 'wʋ.
‑Amɩ 'nɩ ‑maa 'bhisa ‑mɩ,
'ɩn 'dɛbhie,
ɩn 'nɩ nisʋn ‑gwɛzisanyɔ ‑mɔnɩ 'bhisa mɩɩ 'gbʋ,
na paa ‑mɩ fuo.
12 Lɔkɔwlu ‑bhlo 'wʋ na pla 'sun 'ylɩ 'sɔ,
'ɩn ‑lu weee na yɩa,
'ɩn na nyɛa ‑mɩ we kugbua ‑gʋ ‑bhlonʋ.›
13 «Nisʋn ‑gwɛzisanyɔ ‑mɔɔ vlaa gwe,
ɔ 'nɩ 'yɩbha ɔ 'ka yalɩ yla,
ɔ kpaa 'wlu la,
'ɩn ɔ nɛɛ:
‹'Oo ‑Lagɔ,
‑ɩn 'yɩlɩ ‑amɩ gbʋnyuu ‑lɛnʋnyɔ nyazɩ.› »
14 'Ɩn ‑Zezu yia we ‑gʋdɩɛ:
«Ɩn nɛɛ aɩn ‑ylaɛ:
ɔɔ nyɩmɛ ‑mɔnɩ,
da ɔ mɩa ɔ ‑buduŋwɛɛ mnɩda,
ɔ ‑yɔ ‑Lagɔ ka wɛlɩ ‑bhlo,
we 'ka Falizɩnyɩmɛ ‑zi,
‑Lagɔ ka ɔ ‑yɔgbʋ 'wʋtɩɩ 'gbʋ.
Nɩɩ,
nyɩmɛ ‑ɔ ylimanɩa ɔ 'dɛ,
zɔ ‑Lagɔ yia ɔ bɛlɩa,
'ɩn nyɩmɛ ‑ɔ bɛlɩa ɔ 'dɛ zɔ,
'ylimanɩa ‑Lagɔ yia ɔ.»
‑Zezu ŋwnaa 'ylaasɩ 'nyu la
15 'Ylɩ yabhlo nya,
nyɩma yia ‑Zezu 'yuyolua ‑la,
ɔ 'ka wa 'nyulaŋwna,
wa kwɛ ‑gʋ lapalɩe nya.
‑Zezuu 'bɩnɔnya 'yɩa we ‑yɔ,
'ɩn wa yia waa nyɩma vuvue bhli wa 'wluo kpɩlɩe nya.
16 'Ɩn ‑Zezu yia waa 'yuyolua ɔ 'dɛ ‑yɔbɛlɩ,
'ɩn ɔ nɛɛ:
«A 'tide 'yua 'yi,
wa 'ka na ‑gbɛ yi,
a 'na ‑kʋlʋ wa 'yoo ‑nɩ.
Nɩɩ,
nyɩma mɩa sa 'ylaasɩ nɩ 'bhisa,
‑Lagɔɔ nyɩmaa 'wlulapɩlɩe mɩ ‑maa ‑nʋ nya.
17 Ɩn nɛɛ aɩn ‑yla gbʋzɔnʋ saɛ:
‑ɔ 'nɩ ‑Lagɔɔ nyɩmaa 'wlulapɩlɩgbʋ ‑yɔŋwnu 'yɩslɔkpilɛ 'bhisa,
ɔ 'na 'ka ‑Lagɔɔ ‑gbɛ pla.»
'Ŋnɩmnɩ nyimeslɔyu
18 'Ylɩ yabhlo nya,
Zuifʋʋ 'yugalɩnyɔ yabhlo 'yɩbhaa ‑Zezu laɛ:
«Na ‑slolunyɔ ‑zɔnʋ,
lɛɛ ‑lu ɩn 'ka lɛnʋ,
'bhie,
'yliyɔgagɩe ‑we 'nɩa bhloluda ‑ka,
'ɩn ɩn 'ka we 'yɩa?»
19 ‑Zezu yia we 'bɩgʋpalɩ ɔ ‑ylaɛ:
«Lɛɛ ‑lu ka 'gbʋ ‑na la 'mɩ nyɩmɛ ‑zɔnʋa?
We 'nɩ ‑Lagɔɔ 'dɛbhlogbɔɔ 'wʋbhʋ,
nyɩmɛ ‑zɔnʋ 'nɩ ‑mɩ.
20 ‑Ɩn ‑yi ‑Lagɔɔ titenya:
‹‑Ɩn ‑yɔ 'ŋwnɔ ‑putu 'na ‑dɩlɩ ‑budu 'wʋ ‑nɩa ,
‑ɩn 'na 'bhalɩ nyɩmɛ ‑nɩ,
‑ɩn 'na ylili 'wie ‑nɩ,
‑ɩn 'na zʋlʋ nyɩmɛ yo ‑yɔ ‑nɩ,
‑ɩn zʋ ‑bha ‑na dide ‑yɔ ‑na 'nyaa.› »
21 Ɔɔ nyɩmɛ nɛɛ:
«Na ‑kanyɔ,
ɩn mɩ nyimeslɔ nya,
'ɩn ɩn yia tite ‑mɩnɩ 'nʋŋwɛzʋzʋe bhli.»
22 ‑Zezu 'nʋa gbʋ ‑mɩnɩ,
'ɩn ɔ nɛɛ ɔ ‑ylaɛ:
«‑Lu ‑we ‑ɩn 'kaa lɛnʋ,
we ‑tʋ 'wʋ ‑bhlo:
‑ɩn 'pa ‑na zʋzɔnʋ weee pɛlʋ,
'ɩn ‑ɩn 'ka we 'gwɛzi bobabhanya 'wʋladlili.
'Ɩn ‑ɩn 'ka 'ŋnɩmnɩe 'yɩ ‑Lagɔɔ ‑gbɛ.
‑Ɩn ‑ka we lɛnʋe bhɩa,
‑ɩn yi 'mɩ 'bɩ.»
23 Nɩɩ,
ɔɔ nyɩmɛ 'nʋa wɛlɩ ‑mɩnɩ,
ɔ mɩ 'ŋnɩmnɩnyɔ 'kadʋ nyaa 'gbʋ,
'ɩn we yia ɔ dlɩ sumanɩ.
24 ‑Zezu 'yɩa we ‑yɔ nɩɩ,
ɔɔ nyɩmɛɛ dlɩ ka sumanɩ,
'ɩn ɔ nɛɛ:
«'Ŋnɩmnɩnya 'ka ‑Lagɔɔ nyɩmaa 'wlulapɩlɩgbe 'wʋ pla,
‑yɔ we ‑kalɩa!
25 'Ŋnɩmnɩnyɔ 'ka ‑Lagɔɔ nyɩmaa 'wlulapɩlɩgbe 'wʋ pla,
we ‑kalɩ ‑yɔ we ‑zi ‑nyɔmɛɛ seenɩɩ 'bhʋka 'wʋplɩlɩe.»
26 Nyɩma ‑wa mɩa ‑Zezu yukwli pʋlʋda,
wa nɛɛ ɔ ‑ylaɛ:
«Aya!
We ‑ka 'sa ‑mɩ,
nyɔɔ ‑mɔmɔ 'ka gbʋ 'wʋbhʋa?»
27 ‑Zezu yia we 'bɩgʋpalɩɛ:
«‑We ka lɛnʋe nyɩma 'nɩa mneni,
‑Lagɔ mneni we lɛnʋe.»
28 Tɔʋn,
Piɛlɩ nɛɛ ‑Zezu ‑yla:
«‑Ɩn ‑talɩ,
‑a ka ‑amɩaa ‑lu weee ‑bha tɩ,
'ɩn ‑a yia ‑mɩ 'bɩ yi.»
29 ‑Zezu nɛɛ wa ‑ylaɛ:
«Ɩn nɛɛ aɩn ‑yla gbʋzɔnʋ saɛ:
‑Lagɔɔ nyɩmaa 'wlulapɩlɩee 'gbʋ,
nyɔɔo nyɔɔ ‑ka ɔ ‑budu klaa,
ɔ 'ŋwnɔ klaa,
ɔ bhelia klaa,
ɔ didea ‑yɔ ɔ 'yua ‑bha tɩ,
30 ‑lu ‑duun ɔ yia 'yɩa bhla ‑mɩnɩ nya,
we 'ka ‑bha 'wʋzi.
'Ɩn ‑mʋʋ 'bɩgʋ,
bhla ‑we yia yia,
'ɩn ɔ yɩa 'yliyɔgagɩe ‑we 'nɩa bhloluda ‑ka.»
‑Zezuu ‑zakpa tanʋ gbaa ɔ tlɩtlɩe ‑yɔ ɔ 'wʋsɔ gbʋ
31 ‑Zezu ‑yɔ ɔ 'bɩnɔnya kugbua lɛ 'sɔ mɩ mnɩda,
'ɩn ɔ nɛɛ wa ‑ylaɛ:
«A ‑talɩ,
‑Zeluzalɛmʋ ‑a mnɩa da.
Gbʋ ‑we ‑Lagɔgbʋʋ ‑falɩpanya cɛlɩa Nyɩmɛɛ 'Yuu daa,
‑mɔ we yia lɛnʋa.
32‑33 Nɩɩ, nyɩma ‑wa 'nɩa ‑Lagɔ ‑yi, ‑maa ‑yla wa yia ɔ wlaa. 'Ɩn ‑maa 'ka ɔ gla palɩ, ‑maa 'ka ɔ vɛlɩ, 'ɩn ‑maa 'ka ɔ ‑dlɛ ‑gʋ slu. Sɛlɩa wa yia ɔ, 'ɩn wa 'ka ɔ 'bha, we 'ylɩ taa zlɩ, 'ɩn ɔ 'ka 'wʋsɔ tlɩtlɩnya glaa.»34 Nɩɩ,
wɛlɩ ‑we ‑Zezu gbaa,
we 'ji mɩ zizedaa 'gbʋ,
ɔ 'bɩnɔnya 'nɩ we 'wʋlanʋ.
‑Zezu jipea 'lɔlɔnyɔ yabhlo Zelikoo gbe nʋkplɛ
35 ‑Zezu 'ka Zelikoo kwesi bɛa yi,
'lɔlɔnyɔ ‑dɩ yoo ŋwɛ ‑yɔ la,
‑zugba ɔ zla.
36 Ɔɔ 'lɔlɔnyɔ 'nʋa 'plɩplɩnyaa wɛlɩ,
'ɩn ɔ yia layɩbha,
lɛɛ nʋ lɛa?
37 'Ɩn ‑maa nɛɛ ɔ ‑yla:
«Nazalɛtɩyu ‑Zezu mɩa 'plɩda.»
38 Tɔʋn,
ɔ yia 'wʋkpɩ:
«*‑Davidɩɩ 'Yu ‑Zezuɔɔ,
‑ɩn 'yɩlɩ 'mɩ nyazɩɔɔ!»
39 Nyɩma ‑wa mɩa ‑Zezu 'yu nɔda,
'ɩn ‑maa yia ɔ 'wluo 'kpɩlɩ,
wa nɛɛ ɔ ‑yla:
«'Mu ŋwɛ!»
'Ɩn ɔ yi 'yaa 'wʋkpɩ 'tɩtɛɛ:
«‑Davidɩɩ 'Yuɔɔ,
‑ɩn 'yɩlɩ 'mɩ nyazɩɔɔ!»
40 ‑Zezu 'yligbea,
'ɩn ɔ nɛɛ nyɩma ‑yla,
wa ‑yɔ ɔ 'sɔ yi.
Da 'lɔlɔnyɔ bɛa ɔ kwesi,
'ɩn ‑Zezu yia ɔ layɩbha:
41 «Lɛɛ ‑lu ‑ɩn 'yɩbha ɩn nʋ lɛ ‑mɩ ‑ylaa?»
‑Mɔɔ yia we 'bɩgʋpalɩɛ:
«Na ‑Kanyɔ,
‑ɩn ‑blo na 'yli,
ɩn 'ka layɩ lʋ.»