13
1 ఓడె దొసొగొట్ట కొమ్క, సాతగొట్ట తార్కగట్టి, హారెఎ మూర్కొమిగట్టి జొంతొ, సమ్‍దురిటి పంగత వాతని మెస్తెఎఁ. ఏదని దొసొగొట్ట కొమ్కాఁణ, రో రో కొమ్ముతక్కి, రో రో టోపెరిక మన్ను. ఏదని తార్కాణ, రో రో త్రాయుఁత మహపురుఇఁ దుసొవి ఆని, రో రో దోర్క రాచ్చానఇ మన్ను.
2 నాను మెస్తి మూర్కొమిగట్టి జొంతొ, తీరీఁరఙణ క్డఇనిలేఁతయి. ఏదని పఅనయఁ ఒఇడి పఅనయఁలేఁతఇ, ఏదని గూతి కజ్జ క్డఇని గూత్తిలేఁతయి, హారెఎతి రాచ్చు తన్ని బ్డాయుతి, ఓడె తన్ని సింగసాణతి, హారెఎతి హుక్కొమితి హల్లేఁ ఏదనితక్కి హీతె.
3 ఏదఅఁటి రొండఅఁతక్కి, హానిలేఁతి మాడ్డ త్రాయుఁత ఆడ్డాఁచె, గాని ఏ మాడ్డ మాడ హచ్చె. ఇంజెఎ బూమిత మన్ని లోకు, ఏ మూర్కొమిగట్టి జొంతొ జేచ్చొ హజ్జిహిఁ, బమ్మ ఆహీఁచెరి.
4 ఏ మూర్కొమిగట్టి జొంతొతక్కి హుక్కొమితి హీహానకి, హారెఎతి ఏ రాచ్చుతి ఏవరి జొహొరి కిత్తెరి. ఓడె ఏవరి, “ఈ మూర్కొమిగట్టి జొంతొతొల్లె పాడ ఆతసి ఎంబఅసి, ఏదనితొల్లె పిత్తురి కిన్నసి ఎంబఅసి?” ఇంజీఁ వెస్పి ఆహీఁ, ఏ మూర్కొమిగట్టి జొంతొతి జొహొరి కిత్తెరి.
5 బోఁకిని కత్తయఁ, మహపురుఇఁ దుసొవి ఆహీఁ జోలిని గూతి, ఏదనకి హీహానయి, ఓడె దుయి కొడి రీ లేంజుతక్కి, తన్ని కమ్మయఁ కియ్యలి ఏదానకి హుక్కొమి హీహానయి.
6 ఇంజెఎ మహపురుఇఁ దుసొవి అయ్యలి, ఏవణి దోరుతి, ఏవణి బస్స టాయుతి, దేవుపురుతక్కి హెల్లితరఇఁ దుసొవి అయ్యలితక్కి, ఏది తన్ని గూత్తి దెత్తె.
7 ఓడె నెహాఁరితొల్లె పిత్తురి కిహఁ, ఏవరఇఁ అజ్జి కియ్యలితక్కి, బర్రె బేలియఁ ముహెఁ, ఆతిఆఅ జాతియఁ ముహెఁ, ఆతిఆఅ బాసయఁ జోలినరి ముహెఁ, బర్రె లోకుతి ముహెఁ ఏదానకి హుక్కొమి హీహానయి.
8 తాడెపురు మన్ని లోకు బర్రెజాణ, ఇచ్చిహిఁ, తాడెపురు రచ్చి ఆతి తాణటిఎ టూణ్హాని గొర్రిడాలుతి జీవుగట్టి, రో పుస్తకొముత ఎంబరి దోర్క రాచ్చాలయినొ, ఏవరి ఏ మూర్కొమిగట్టి జొంతొతి జొహొరి కిన్నెరి.
9 ఎంబఅసి ఇచ్చివ, వెంజహఁ ఎల్లెకియ్యలి మణుసు మన్నసి వెణెంబెసిదెఁ.
10 ఎంబఅసి ఇచ్చిహిఁ, రొఒణఇఁ కైదెత పండిఇఁ ఇన్నెసినొ, ఏవసిఎ కైదెత హన్నెసి. ఎంబఅసి ఇచ్చిహిఁ, రొఒణఇఁ కండతొల్లె పాయినెసినొ, ఏవణఇఁవ కండతొల్లెఎ పాయినెరి. ఈ కత్తతక్కి, మహపురుఇఁ నమ్మితరి సాస కిన్నయి, నమ్మకొము హల్లేఁ మన్నె.
11 ఓడె బూమిటి మూర్కొమిగట్టి ఓరొ జొంతొ పంగత వాతని మెస్తెఎఁ, గొర్రిడాలు కొమ్కలేఁతి జోడె కొమ్క ఏదానకి మచ్చు, ఏది రాచ్చులేఁ జోలీఁచె.
12 ఏది తొల్లితి మూర్కొమిగట్టి జొంతొతక్కి మన్ని, హుక్కొమిగట్టి సెట్హలికాణి బర్రె, ఏదని నోకిత కిహీనె. ఓడె హాకి మాడ్డ పాటాఁవ, హాని మాడ్డటి ఒడ్డాని ఏ తొల్లితి మూర్కొమిగట్టి జొంతొతి, బూమి, ఎంబఅఁ బత్కీనరి హల్లేఁ, జొహొరి కిన్నిలేఁకిఁ, ఏది గుత్త ఆహీనె.
13 ఏది హారెఎతి పుణ్కియఁ తోసీనె, లోకు నోకిత, లెక్కొ హాగుటి బూమిత హిచ్చు రేచ్చ వావి కిహీనె.
14 కండతొల్లె మాడ్డ పాటాఁవ బత్కీని మూర్కొమిగట్టి జొంతొతక్కి, బొమ్మ కేప్పితిదెఁ ఇంజీఁ, ఏది తాడెపురు బత్కీనరఇఁ వెస్సిహిఁ, ఏ మూర్కొమిగట్టి జొంతొ నోకిత, రుజువి కియ్యలితక్కి తంగొ హీహాఁచి కమ్మతొల్లె, తాడెపురు బత్కీనరఇఁ బొమ్మ కిహీనె.
15 ఓడె ఏ మూర్కొమిగట్టి జొంతొ బొమ్మతి జోలినిలేఁకిఁ, ఏ మూర్కొమిగట్టి జొంతొ బొమ్మతి జొహొరి కిఅగట్టరఇఁ పాయినిలేఁకిఁ, ఏ మూర్కొమిగట్టి జొంతొ బొమ్మతి జీవు కియ్యలితక్కి, ఏదనకి హుక్కొమి హీహానయి.
16 ఏదిఇదెఁ ఆఅన, కజ్జరి ఇచ్చివ, ఈచ్చరి ఇచ్చివ, సఙసారియఁ ఇచ్చివ, హక్కిగట్టరి ఇచ్చివ, గొత్తియఁ ఇచ్చవ, హక్కుగట్టరి ఇచ్చివ, బర్రెతి ఏవరి టిఇని కెయ్యుతపట్టఎ, ఎల్లఆఅతిఁ ముంజుతపట్టెఎ ముద్ర ఇట్టికిహకొడ్డినిలేఁకిఁ,
17 ఏ ముద్ర, ఇచ్చివ, ఏ మూర్కొమిగట్టి జొంతొ దోరు ఇచ్చివ, ఏదని దోరుతి అంకె ఇచ్చివ మన్నసి పిస్పె, ఓడె ఎంబఅరివ, ఏనఅఁ కొడ్డలి ఇచ్చివ, పార్చలి ఇచ్చివ, హుక్కొమి హిల్లఅరేటు కియ్యలితక్కి, ఏది ఏవరఇఁ గుత్త ఆహీనె.
18 బుద్దిగట్టి మణిసికి, ఏ మూర్కొమిగట్టి జొంతొతక్కి మన్ని అంకెతి ఎజ్జికియ్యలి హీము, ఏది రో మణిసి అంకెఎ. ఏ అంకె (666) సో వంద తీనికొడి సోహొ. ఇంబఅఁ బుద్ది మన్నె.