పూర్తి నెహిఁ కిహకొడ్డినయి
7
1 జీవుతి తోణెయఁతెరి, మహపురు మంగొ హియ్యతి ఈ కత్తయఁ మన్ను. ఇంజెఎ మహపురు ముహెఁ అజ్జితొల్లె, మహపురుకి హెల్లితి నెహఁనితొల్లె, మారొ పూర్తి నెహిఁ కిహకొడ్డిహిఁ, అంగతక్కి, జీవుతక్కి వాతి లగ్గెఎతి ఆతిఆఅటి నెహిఁకిహకొడ్డినొ.
2 మమ్మఅఁ మీ హిఁయాఁణ ఓపదు. మాంబు ఎంబఅరఇఁవ అన్నెమి కిహాలొఒమి, ఎంబఅరఇఁవ లగ్గెఎతి జియ్యుత తాకి కిహాలొఒమి. ఎంబఅరఇఁ బొమ్మ కిహాలొఒమి.
3 మీ ముహెఁ నింద గేట్హతిదెఁ ఇంజిఁ నాను ఇల్లెకిఁ జోలీఁజొఒఁ. మా హిఁయాఁణ ఏనికిఁ మిమ్మఅఁ ఓపతొమినొ ఈదఅఁ కిహఁ తొల్లిఎ వెస్తతెఎఁ. మాంబు మీతొల్లె బత్కలివ, మీతొల్లె హయ్యలివ తెర్కడ ఆహానొమి.
4 మిమ్మఅఁ, నాను హారెఎ నమ్మహఁ, మీ బాట హారెఎ దయెరెమితొల్లె జోలీఁజఇఁ. మీ పాయిఁ నాను హారెఎ గవురొమి ఆహిమఇఁ. మీ తాణటి మా జీవుత బల్మి పాటి పాయిఁ, మా డొండొయఁ కిహఁ అగ్గడతి హారెఎతి రాఁహఁతొల్లె నెంజానొమి.
5 మాంబు మాసిదోనియ రాజిత వాహాఁవ రో గాడెస్కెఎ జోమఅతొమి. ఎంబియ మచ్చివ, మంగొ ఆతిఆఅ డొండొయెఁఎ వాతు. పంగట్టి టంటయఁ అయ్యతెరి, మా బిత్ర అజ్జి మచ్చె.
6 ఇచ్చిహిఁవ, హీణి ఆతరఇఁ బల్మి కిన్ని మహపురు, తీతుఇఁ మా తాణ పండహఁ, మమ్మఅఁ సాయెమి కిహఁ బల్మి కియ్యతెసి.
7 తీతు వయ్యలిఎదెఁ ఆఅన, తాను మీ తాణటి బెట్ట ఆతి బల్మితొల్లె, మమ్మఅఁవ బల్మి కియ్యతెసి. నా బాట మీరు ఆహీని ఆసతి, మీ కొహొరితి, మీరు నా పాయిఁ ఆతి హారెఎ రాఁహఁతి బాట ఏవసి వెస్తతని వెంజిహీఁ, నాను ఓడె హారెఎ రాఁహఁ ఆతెఎఁ.
8 నాను రాచ్చితి ఉత్రొమితొల్లె మిమ్మఅఁ కొహొరి కియ్యతి బాట నాను బాదఆఒఁ. నాను బాదఆతివ, ఏ ఉత్రొమి మిమ్మఅఁ గాడెకెఎదెఁ కొహొరి కియ్యనె ఇంజిఁ పుంజిమఇఁ.
9 మీరు కొహొరి ఆతెరి ఇంజిఁ నాను రాఁహఁ ఆహీలొఒఁ, గాని మీరు కొహొరి ఆహఁ, మణుసు మారి కిత్తెరి ఇంజిఁ నెఎటి రాఁహఁ ఆహిమఇఁ. ఏనఅఁతక్కి ఇచ్చిహిఁ, మహపురు ఒణిపితిలేఁకిఁఎ మీరు కొహొరి ఆతెరి, గాని మా తాణటి ఏనఅఁ పాయిఁవ, ఏనఅఁ బాటవ, అన్నెమి ఆహాలొఒతెరి.
10 డాయు ఈదఅఁటి మారొ కొహొరి ఆఅయి, మహపురు ఒణిపితిలేఁకిఁ వాని కొహొరి, మణుసుతి మారి కివికిహఁ గెల్హలితక్కి ఒయ్యనె. గాని తాడెపురుతక్కి హెల్లితి కొహొరి హాకితి తన్నె.
11 మహపురు ఒణిపితిలేఁకిఁ మింగొ వాతి కొహొరిటి, మింగొ ఎచ్చెక నెహఁయి వాత్తెనొ ఒణపదు. మీరు ఎచ్చెక జాగెరితతొల్లె మన్నతెరి ఆతెరినో, దోహొ హిల్లఅగట్టతెరి ఇంజిఁ తోసలితక్కి, ఎచ్చెక ఆసఆతెరినొ, పాపొమి ముహెఁ ఎచ్చెక కోప ఆతెరినొ, మహపురు పాయిఁ ఎచ్చెక అజ్జి పుచ్చెరినొ, హారెఎతి ఆసతి, సక్కతతి, పాపొమి బాట నాయెఁమితొల్లె లాగలితక్కి, మిమ్మఅఁ ఎచ్చెక తెర్కడ కియ్యతెనొ ఒణపదు. ఏదఅఁటి మీరు ఆతిఆఅ తాణటి కల్తి హిల్లఅగట్టతెరి ఆహిఁ రుజువి కిహకొడ్డితెరి.
12 నాను ఈ ఉత్రొమి రాచ్చితయి, మీ తాణ లగ్గెఎతి కమ్మ కిత్తణి బాట ఆఎ, ఏవణితాణటి లగ్గెఎతి కమ్మ పాటణి బాటవ ఆఎ. గాని మీరు ఎచ్చెకెఎనొ సక్కతతొల్లె, మమ్మఅఁ కేర్హీఁజని బాట, మహపురు నోకితవ, మీ మద్దివ చోంజ అయ్యలితక్కిఎ నాను రాచ్చితెఎఁ.
తీతు బాట
13 ఈదఅఁ బాట మాంబు దయెరెమి పాటొమి. ఏదిఎదెఁ ఆఎ, గాని మంగొ దయెరెమి వాతటి, తీతుజీవు మీ బర్రెతి పాడియటి జోమితి పాయిఁ, ఏవణి రాఁహఁతి మెస్సహఁ, ఓడె మాంబు హారెఎ రాఁహఁ ఆతొమ్మి.
14 ఏనయి ఇచ్చీఁకి, నాను ఏవణి నోకిత మీ బాట పొగ్డిహిఁ వెస్తివ, మీ బాట నాను లజ్జ పాటాలొఒఁ. మాంబు మిమ్మఅఁ వెస్తతి కత్తయఁ బర్రె ఏనికిఁ అస్సలతఇనొ, ఎల్లెకీఁఎ మాంబు మీ బాట పొగ్డిహిఁ, ఏవణఇఁ వెస్తఇ అస్సలెఎ ఇంజిఁ చోంజ ఆతు.
15 ఓడె మీరు అజ్జితొల్లె డగ్గిహిఁ, తన్నఅఁ ఓపితెరి ఇంజిఁ, తంగొ లొఙితి మీ బర్రెజాణతి ఏవసి ఒణిపిహిఁ, మీ పాయిఁ తన్ని బిత్ర రుడ్డె రాఁహఁ ఆహీనెసి.
16 ఆతిఆఅటి మీ పాడియటి నంగొ దయెరెమి వాహీనె, ఇంజెఎ రాఁహఁ ఆహిమఇఁ.