జాంగితి గొర్రితి బఅన
15
1 యేసు జాప్నని వెంజలితక్కి సిస్తు రీహ్ని బర్రెజాణ, పాపొమిగట్టరి హల్లేఁ, రో నేచ్చు ఏవణి తాణ వాతెరి.
2 పరిసయుయఁ, మోసే హీతి ఆడ్రయఁ జాప్నరి ఏదఅఁ మెస్సహఁ, “ఈవసి, పాపొమిగట్టరఇఁ దరిత కిహకొడ్డఁ, ఏవరితొల్లె కల్హఁ రాంద చింజీఁనెసి.” ఇంజిఁ హారెఎ గోస్స ఆహీఁచెరి.
3 ఇంజెఎ ఏవసి, ఏవరఇఁ ఈ బఅన వెస్తెసి.
4 “మీ తాణటి ఎమ్మిని మణిసికిపట్టెఎ పాస కొడి గొర్రియఁ మంజఁ, ఏవఅఁటి రొండి జాంగిసరి, ఏవసి రొండి ఊణ పాస కొడి (99) గొర్రీఁణి గవినిత పిస్సహఁ, జాంగితని బెట్ట ఆని పత్తెక ఏదని పర్రలి హల్లొఒస్కి?
5 ఏదని బెట్ట ఆతిసరి, రాఁహఁతొల్లె ఏదని తన్ని బొమ్మిత డేకహఁ ఇజ్జొ చచ్చహఁ, తన్ని తోణెఁణి, పాడితరఇఁ హాటినెసి.
6 ఇంజఁ మీరువ నాతొల్లె రాఁహఁ ఆదు. జాంగాఁచి నా గొర్రితి బెట్ట ఆతెఎఁ ఇంజిఁ ఏవరఇఁ వెహ్నెసిమ.
7 ఎల్లెకీఁఎ మణుసు మారి కియ్యలి అవుసురొమి హిల్లఅ నీతిగట్టి రొండి ఊణ పాస కొడిజాణతి (99) పాయిఁ మన్ని రాఁహఁ కిహఁ, మణుసు మారి కిన్ని పాపొమిగట్టి రొఒణి పాయిఁ దేవుపురురాజిత హారెఎ రాఁహఁ మన్నె.”
జాక్హి వెండి టక్కతి బఅన
8 “ఎమ్మిని ఇయ్యనకిపట్టెఎ దొసొగొట్ట వెండి టక్కయఁ (అద్లి) మంజఁ, ఏవఅఁటి రొండఅఁ జాక్హిసరి, ఏ ఇయ్య దీఁవుఁ డీసహఁ ఇల్లు హేపిహిఁ, ఏదని బెట్ట ఆని పత్తెక నెహిఁకిఁ పర్రెఎకి?
9 ఏదని బెట్ట ఆతిసరి రేటుఎ తన్ని తోణెణిస్కాణి, పాడితరఇఁ హాటహఁ, ఏవరఇఁ నాను జాక్హాఁచి టక్కతి బెట్ట ఆతెఎఁ. ఇంజెఎ నాతొల్లె కల్హఁ రాఁహఁ ఆదు ఇంజిఁ వెహ్నెమ.
10 ఎల్లెకీఁఎ మణుసు మారి కిన్ని పాపొమిగట్టి రొఒణి పాయిఁ మహపురుదూతయఁ రాఁహఁ ఆనెరి ఇంజిఁ మిమ్మఅఁ వెస్సీఁజఇఁ.”
జాంగితి మీరెఎణి బఅన
11 ఓడె యేసు ఇల్లె ఇచ్చెసి. “రో మణిసికి రిఅరి మీర్క మచ్చెరి.
12 ఏవరి తాణటి ఈచ్చసి వాహఁ చంజి, నీను గాణిఁచితి ఆస్తిటి నంగొ వాని వాట్ట హియ్యము ఇంజిఁ తన్ని చంజిఇఁ రీసలిఎ, ఏవసి ఏవరకి తన్ని ఆస్తితి బాటి కిహ హీతెసి.”
13 “కొచ్చె దిన్నయఁ డాయు ఏ ఈచ్చి మీరెఎసి ఆస్తి బర్రె కూడి కిహఁ కొడ్డహఁ, హెక్కొ రాజి పయెనెమి హచ్చెసి. ఎంబఅఁ తన్ని ఆస్తితి ఏనికిఁ ఇచ్చిఁ ఎల్లెకిఁ పాడు కిత్తెసి.
14 ఏదఅఁ బర్రె కర్చు కిత్తి డాయు ఏ రాజి కజ్జ కరువు వయ్యలిఎ, ఏవసి హక్కిబాదతొల్లె హజ్జహఁ ఏ రాజితి రొఒణితాణ కమ్మ కిహిఁ మచ్చెసి.
15 ఏవసి, ఏవణఇఁ పజ్జియఁ మెచ్చలితక్కి తన్ని సొబాణ పండితెసి.
16 ఏవసి పజ్జియఁ తిన్ని పోడుతొల్లె తన్ని బండిపంజి కిహకొడ్డలి ఆస ఆతెసి. గాని ఎంబఅసివ ఏవణకి ఏనఅఁవ హీఅతెసి.”
17 “ఇంజెఎ ఏవణకి బుద్ది వయ్యలిఎ ఇల్లె ఇంజిఁ ఒణిపితెసి. ‘నా చంజి తాణ ఉచ్చొరజాణ కూలిగట్టరక్కి పుస్టినంగ రాంద మన్నె, గాని నానుజె ఇంబఅఁ హక్కి హాహిమఇఁ.
18 నాను నింగహఁ నా చంజి తాణ హజ్జహఁ, చంజి, నాను దేవుపురుతక్కి ఓజఅరేటు నీ నోకిత పాపొమి కిత్తెఎఁ.
19 ఇంబటిఎ నీ మీరెఎణతెఎఁ ఇణింబి కిహకొడ్డలివ పాడఆతత్తెఎఁ ఆఎ, గాని నన్నఅఁ నీ కూలిగట్టి రొఒణిలేఁకిఁ ఇట్టకొడ్డము ఇంజిఁ ఏవణఇఁ వెహిఇఁ.’ ఇంజిఁ నింగహఁ చంజిగట్టణితాణ హచ్చెసి.”
20 “ఏవసి హెక్కొ మచ్చటిఎ చంజిగట్టసి ఏవణఇఁ మెస్సహఁ, కర్మ ఆహఁ హొటిహిఁ హజ్జహఁ, ఏవణఇఁ పొమ్మహఁ నొండితెసి.”
21 “ఎచ్చెటిఎ ఏ మీరెఎగట్టసి ఏవణఇఁ, ‘చంజి, నాను దేవుపురుతక్కి ఓజఅరేటు నీ నోకిత పాపొమి కిత్తెఎఁ. ఇంబటిఎ నీ మీరెఎణతెఎఁ ఇణింబి కిహకొడ్డలివ పాడఆతత్తెఎఁ ఆఎ.’ ఇచ్చెసి.
22 గాని చంజిగట్టసి తన్ని గొత్తీఁణి హేరికిహఁ, నెహిఁ సొక్కయఁ తొబ్బె చచ్చహఁ ఏవణఇఁ తుర్వి కిహఁ, వంజుత ముద్ది, పఅనాణ సెపుయఁ తుర్వి కిదు.
23 అంగ ఆతి కోడ్డిడాలుతి చచ్చహఁ టూణ్దు. చింజఁ మారొ రాఁహఁ ఆనొ.
24 నా ఈచ్చి మీరెఎణఇఁ హాహచ్చెసి ఇచ్చయి గాని జీవుతొల్లెఎ మన్నెసిగట్టె. జాంగ హచ్చెసి ఇచ్చయి, గాని ఓడె బెట్ట ఆతయి ఇచ్చెసి. ఎచ్చెటిఎ ఏవరి రాఁహఁ అయ్యలి మాట్హెరి.”
25 “ఎచ్చెటిఎ ఏవణి కజ్జ మీరెఎసి సొబాణ మచ్చెసి. ఏవసి ఇజ్జొ వాహీఁచటి, డప్పుయఁ వేచ్చిహిఁ ఏందిని సాడితి వెచ్చెసి.
26 ఏవసి గొత్తీఁటి రొఒణఇఁ హాటహఁ ఏనయి ఆహీనె ఇంజిఁ వెచ్చెసి.
27 ఏ గొత్తి, ఏవణఇఁ నీ బోవ వాహానెసి. ఏవసి నెహిఁకిఁ తన్ని తాణ వాత్తకి నీ చంజి అంగ ఆతి కోడ్డిడాలుతి టూణ్హాఁనెసి ఇచ్చెసి.
28 ఏవసి, కోప ఆహఁ బిత్ర హజ్జలి కుయ్యలిఎ, ఏవణి చంజి పంగత వాహఁ బిత్ర వాము ఇంజిఁ గుత్త ఆతెసి.
29 ఏవసి తన్ని చంజిఇఁ, ‘హేరికిమ్ము, నాను నీ తొల్లె కల్హఁ ఇచ్చొర బర్సాఁటి నీ పాయిఁ గొత్తిలేఁకిఁ కమ్మ కిహిమఇఁమ, ఎచ్చెలవ నీ ఆడ్రతి మెడ్డాలొఒఁ. గాని బోజి కిహఁ నా తోణెసంగతొల్లె రాఁహఁ ఆనిలేఁకిఁ నీను నంగొ ఎచ్చెలవ రో గొర్రిడాలుతివ హీహఁజొఒతి.
30 గాని నీ ఆస్తితి సానెణిస్కతొల్లె పాడు కిత్తి ఈ నీ మీరెఎసి వయ్యలిఎ, ఈవణి పాయిఁ అంగ ఆతి కోడ్డిడాలుతి టూణ్హి.’ ఇచ్చెసి.”