క్రీస్తు, యెరూసలేముత హచ్చయి
21
1 డాయు యెరూసలేముత హజ్జిహిఁ, ఒలీవమార్కగట్టి హోరు దరిత మన్ని బేత్పగే ఇన్ని నాయుఁత వాత్తెరి. యేసు తన్ని రిఅరి శిశూఁణి పండిహిఁ ఏవరఇఁ ఇల్లె ఇచ్చెసి.
2 “మీ నోకిత చోంజ ఆహిని నాయుఁత హజ్జు. దొసాని రో గాడ్దె, ఏదని డాలు హల్లేఁ, హల్లువు రేటుఎ మింగొ చోంజ అయ్యను. మీరు ఏవఅఁ హుక్హఁ నా తాణ పేర్హ తద్దు.
3 ఎంబఅసిపట్టెఎ ఏనఅఁపట్టెఎ ఇంజసరి, ఈవఅఁ రజ్జకి అవుసురొమి ఇంజిఁ వెహ్దు. ఎచ్చెటిఎ ఏవసి పేర్హ ఓదు ఇంజనెసి” ఇంజిఁ వెస్స పండితెసి.
4 ప్రవక్త వెస్తఇ పూర్తి ఆనిలేఁకిఁ ఈది ఆతె.
5 ఏది ఏనయి ఇచ్చిహిఁ, “హేరికిమ్ము, నీ రజ్జ, సాదగట్టసి ఆహఁ, ఊణ గాడ్దెడాలు లెక్కొ హోచ్చహఁ, నీ తాణ వాహినెసి ఇంజిఁ సీయోను మాంగని వెహ్దు ఇన్నయిఎ.”+
6 యేసు, తమ్మఅఁ వెస్తిలేఁకిఁఎ శిశుయఁ హజ్జహఁ కిత్తెరి.
7 ఏవరి గాడ్దెతి, డాలుతి హల్లేఁ చచ్చహఁ, గాడ్దె లెక్కొ హొంబొరిక పాస్తెరి. ఏవసి ఏదఅఁ లెక్కొ హోచహఁ కుగ్గితెసి.
8 జనలోకుటి మెహ్నరి, తాంబు డేకాఁచి హొంబొరికాణి జియ్యుటి వర్సె పాస్తెరి. కొచ్చెజాణ మార్కగొచ్చయఁ టూణ్హఁ జియ్యుటి వర్సె పాస్తెరి.
9 జనలోకు, ఏవణి నోకిత హజీఁచరి, డాయు వాహీఁచరి, “హోసన్న, దావీదు మీరెఎణకి జెయెమి! రజ్జ దోరుతొల్లె వాహీనణఇఁ పొగ్డపెరిదెఁ. హారెఎ లెక్కొ మన్ని బర్రె టాంగఁణ జెయెమి.”+ ఇంజిఁ కిల్లెడి కిహీఁచెరి.
10 ఏవసి యెరూసలేము గాడత హచ్చెసి. ఏ గాడతరి బర్రెజాణ బమ్మ ఆహఁ, “ఈవసి ఎంబఅసి?” ఇంజిఁ రొఒణితొల్లె రొఒసి వెస్పి ఆహిఁచెరి.
11 ఎంబఅఁ మచ్చి లోకు బర్రెజాణ, “ఈవసి గలిలయత మన్ని నజరేతు ఇన్ని నాయుఁతి ప్రవక్త ఆతి యేసు” ఇంజిఁ వెస్తెరి.
యేసు, మహపురుగూడిత హన్నయి
12 యేసు, మహపురుగూడిత హజ్జహఁ, ఎంబఅఁ పార్చిఁచరఇఁ, కొడ్డీఁచరఇఁ పండస్తెసి. టక్కయఁ మాస్కిని బల్లయఁ, పార్వపొట్టయఁ పార్చిఁచి జోంబాఁణి తిరిమిణ్పహస్తెసి.
13 “నా గూడితి ప్రాదన గూడి ఇంజిఁ రాచ్చితయి మన్నె”,+ గాని “మీరు ఏదని డొఙయఁ పావులేఁకిఁ కిహీఁజెరి.”+ ఇచ్చెసి.
14 సొట్టయఁ, కాణయఁ, గూడిత మన్ని ఏవణి తాణ వాతెరి. ఏవసి ఏవరఇఁ ఒట్హెసి.
15 కజ్జ పూజెరంగఎ, మోసే హీతి ఆడ్రయఁ జాప్నరిఎ, ఏవసి కిత్తి బమ్మ హోపెతి కమ్మతి మెస్సహఁ, ఓడె, కొక్కరిడాల్క “దావీదు మీరెఎణకి హోసన్న.” ఇంజిఁ గూడి డూకుటి కిల్లెడి కిత్తని మెస్సహఁ కోప ఆతెరి.
16 ఏవరి ఏవణఇఁ, “ఈ ఈచ్చిఇచ్చరి వెస్సీఁజనని నీను వెంజిఇఁజికి.” ఇచ్చెరి. యేసు, “హఓ వెంజి మఇఁ, ‘ఈచ్చిఇచ్చరిటి, పాలు పిహఅతి ఈచ్చిఇచ్చరి గూతిటి, నీను పొగ్డి ఆనతి ఇంజిఁ రాచ్చానని మీరు ఎచ్చెల సద్వాలొఒతెరికి?’”+ ఇంజిఁ ఏవరఇఁ వెస్తెసి.
17 ఏవరఇఁ పిస్సహఁ, ఏ గాడటి హజ్జహఁ, బేతనియ నాయుఁత బస్స కిత్తెసి.
అంజురి మార్ను వాయినయి
18 ఓడె లాఇసెఎ, యెరూసలేము గాడత హజ్జీఁచటి, యేసు హక్కి ఆతెసి.
19 ఇంజఁ జియ్యు దరిత మన్ని రో అంజురి మార్నుతి మెస్సహఁ డోఇక హజ్జహఁ హేరికిత్తెసి. ఆక్క పిస్పె ఏనయి చోంజ ఆఅలిఎ. “నీను ఎచ్చెలవ పాడెక ఆయొతిదెఁ” ఇచ్చెసి. ఏది జేచ్చొఎ వాయహచ్చె.
20 శిశుయఁ ఏదఅఁ మెస్సహఁ బమ్మ ఆహఁ, “అంజురి మార్ను ఇచ్చె గాడెకెఎ ఏనికిఁ వాయహచ్చె” ఇంజిఁ జోల్కి ఆతెరి.
21 యేసు ఏవరఇఁ, “ఈ అంజురి మార్నుదెఁ ఆఎ. అన్నమన ఆఅన నమ్మకొముతొల్లె, మీరు ఈ హోరుతి ఇంబటిఎ నింగఁ, సమ్‍దురిత రీకము ఇచ్చిసరి, ఎల్లెకీఁఎ ఆనె ఇంజిఁ అస్సలెఎ మిమ్మఅఁ వెస్సీఁజఇఁ.
22 ఓడె మీరు ఏనఅఁతక్కిపట్టెఎ ప్రాదన కిన్నటి ఏదఅఁ బెట్ట ఆహన్నొమి ఇంజిఁ నమ్మిసరి ఎల్లెకీఁఎ బెట్ట ఆదెరి” ఇంజిఁ ఏవరఇఁ వెస్తెసి.
ఎంబఅసి హుక్కొమి హియ్యతెసి
23 మహపురుగూడిత, యేసు జాప్హిఁచటి, కజ్జ పూజెరంగ, జాతితి కజ్జరి ఏవణి తాణ వాహఁ, “ఏని హుక్కొమితొల్లె నీను ఈ కమ్మయఁ కిహీఁజి? ఎంబఅసి ఈ హుక్కొమి హియ్యతెసి?” ఇంజిఁ వెచ్చెరి.
24 ఇంజఁ యేసు, “నానువ మిమ్మఅఁ రో కత్త వెంజఇఁ. మీరు నన్నఅఁ వెస్తసరి, నాను ఏని హుక్కొమితొల్లె ఏ కమ్మయఁ కిహిమఇఁ ఇన్నని నాను వెస్తఇ.
25 యోహాను కిత్తి బూడు ఎంబిటి వాతయి? దేవుపురుటికి, లోకుతాణటి వాతయి?” ఇంజిఁ ఏవరఇఁ వెచ్చెసి. ఏవరి తమ్‍గొ తాంబుఎ, “మారొ, దేవుపురుటి వాతయి ఇచ్చిసరి ఏవసి, అతిహిఁ ఏనఅఁతక్కి యోహానుఇఁ నమ్మఅతెరి?” ఇంజిఁ వెంజనెసి.
26 “లోకుతాణటి వాతయి ఇంజిఁ మారొ వెహ్నయి, లోకుతక్కి అజ్జీనయి. ఏనఅఁతక్కి ఇచ్చిహిఁ, యోహానుఇఁ ప్రవక్త ఇంజిఁ బర్రెజాణఎ వెస్సీనెరి” ఇంజిఁ జోల్కి ఆహఁ, “మాంబు పుంజాలొఒమి.” ఇంజిఁ యేసుఇఁ వెస్తెరి.
27 ఏవసి, “నానువ ఏని హుక్కొమితొల్లె ఈ కమ్మయఁ కిహిమఇఁనొ మిమ్మఅఁ వెస్తొఒఁ” ఇచ్చెసి.
చంజి కత్త వెచ్చి మీరెఎణి బఅన
28 “మీరు ఏనఅఁ ఒణిపీఁజెరి? రొఒణకి రిఅరి మీర్క మచ్చెరి. ఏవసి రొఒణితాణ హజ్జహఁ, ‘మీరెఎణా, నీను నీంజు ద్రాక్సటోటత హజ్జహఁ కమ్మ కిమ్ము.’ ఇచ్చెసి.
29 ఏవసి, ‘నాను కూఉఁ’, ఇచ్చెసి. గాని డాయు మణుసు మారి కిహఁ హచ్చెసి.
30 ఏవసి ఓరొఒణితాణ హజ్జఁ ఎల్లెకీఁఎ వెస్తెసి. ఏవసి, ‘ఆబ నాను హఇఁ’ ఇచ్చెసి. గాని హల్లఆతెసి. ఈ రిఅరిటి చంజి ఇస్టొమి ఆతిలేఁకిఁ ఎంబఅసి కిత్తెసి?” ఇంజిఁ ఏవరఇఁ వెచ్చెసి.
31 ఇంజఁ ఏవరి, “తొల్లితసిఎ” ఇచ్చెరి. యేసు ఏవరఇఁ, “సాని కమ్మయఁ కిన్నరి, సిస్తు రీహ్నరి, మీ కిహఁ తొల్లిఎ మహపురురాజి హన్నెరి ఇంజిఁ అస్సలెఎ మిమ్మఅఁ వెస్సీఁజఇఁ.
32 మింగొ నీతి జియ్యు తోసలి, యోహాను మీ తాణ వాతెసి. మీరు ఏవణఇఁ నమ్మఅతెరి. గాని సాని కమ్మయఁ కిన్నరి, సిస్తు రీహ్నరి ఏవణఇఁ నమ్మితెరి. ఏదఅఁ మెస్సావ మీరు ఏవణఇఁ నమ్మినిలేఁకిఁ మణుసు మారి కిఅతెరి”.
ద్రాక్సటోట అద్ది అసాని కమ్మగట్టణి బఅన
33 “రొ బఅన వెస్తఇఁ వెంజు. ఇల్లుచంజి రొఒసి మచ్చెసి. ఏవసి ద్రాక్సటోట ఉహికిత్తెసి. ఇంజఁ ఏదఅఁ సుట్టుల బెయిఁ కెర్వి కిహఁ ఎంబఅఁ ద్రాక్సపాడెక రస్స రెజ్జలి, రో గానుగు కివికిత్తెసి. కాచ్చలి రో గూడ దొస్పి కిత్తెసి. ఇంజఁ కమ్మగట్టరకి అద్ది హీహఁ హెక్కొ రాజి హతుస్తెసి.
34 పాడెక కంబిని కాలొమి వయ్యలిఎ, తన్ని గొత్తీఁణి నా ఓడ్డు తక్కహజ్జు ఇంజిఁ, అద్ది అసానరితాణ పండితెసి.
35 అద్ది అసానరి, ఏవణి గొత్తీఁణి అస్సహఁ, రొఒణఇఁ వేత్తెరి, రొఒణఇఁ పాయితెరి, ఓరొఒణఇఁ వల్కతొల్లె ఇర్హెరి.
36 ఓడె ఏవసి తన్ని గొత్తీఁణి తొల్లితరి కిహఁ గడ్డుజాణతి పండితెసి. ఏవరి హజ్జలిఎ ఏవరఇఁవ ఎల్లెకీఁఎ కిత్తెరి.
37 ‘నా మీరెఎణఇఁ ఏవరి గవెరెమితొల్లె హేరికిన్నెరి.’ ఇంజిఁ, తన్ని మీరెఎణఇఁ ఏవరి తాణ పండితెసి.
38 ఏ అద్ది అసాఁచరి మీరెఎగట్టణఇఁ మెస్సహఁ, ‘ఊవసి టోటతక్కి హక్కుగట్టసి. వాదు మారొ ఏవణఇఁ పాయహఁ టోట మంగొ ఇట్టకొడ్డినొవ.’ ఇంజిఁ తమ్‍గొ తాంబు జోల్కి ఆతెరి.
39 ఏవరి ఏవణఇఁ అస్సహఁ ద్రాక్సటోటటి పంగత చచ్చహఁ, డడికిహఁ పాయితెరి.
40 ఎచ్చెటిఎ ఏ ద్రాక్సటోటగట్టి ఆబ వాహఁ, ఏ అద్ది అసానరఇఁ ఏని కిన్నెసి?” ఇచ్చెసి.
41 ఏవరి, “ఏ లగ్గెఎతరఇఁ హారెఎ డొండొ కిహిఁ పాయి కిన్నెసి. ఎచ్చెటిఎ పాడెక కంబిని కాలొమిత తన్ని ఓడ్డుతి, తంగొ హీని కమ్మగట్టరకి ద్రాక్సటోటతి అద్ది హీనెసి” ఇచ్చెరి.
42 యేసు, ఏవరఇఁ, “ఇల్లు దొహ్నరి మ్ణీఅగట్టయి ఇంజిఁ కుతుస్తి వల్లిఎ, ఇల్లుతక్కి మూలవల్లి ఆతె. ఈది రజ్జతాణటిఎ ఆతె. ఈది మా కణ్కకి బమ్మ ఆతయి ఇంజిఁ రాచ్చాని మహపురుకత్తతి మీరు ఎచ్చెలవ సద్వాలొఒతెరికి?” +
43 “ఇంజెఎ మహపురురాజితి మీ తాణటి రెజ్జహఁ, ఏ రాజితక్కి సరి ఆతి పలొమి హీనరకి హియ్యలి ఆనె ఇంజిఁ మిమ్మఅఁ వెస్సీఁజఇఁ.
44 ఈ వల్లి లెక్కొ ఎంబఅసిపట్టెఎ రీతిసరి గండ్ర ఆహానెసి. ఈ వల్లి ఎంబఅరి లెక్కొపట్టెఎ రీతిసరి గుండుగండ కిన్నె.” ఇంజి వెస్తెసి.
45 కజ్జ పూజెరంగ, పరిసయుయఁ, యేసు వెస్తి బఅన వెంజహఁ ఈవఅఁ తమ్మి బాటెఎ వెస్తెసి ఇంజిఁ పుచ్చెరి.
46 ఏవరి ఏవణఇఁ దొస్పలి వేల హేరికిహీఁచెరి, గాని లోకు బర్రెజాణ ఈవసి ప్రవక్త ఇంజీఁచకి లోకుతక్కి అజ్జితెరి.