سَنت لُوقا نِي طرف ٿِي لِکل خوشي نِي کٻيرِ 19

پرڀُو يسوع هانَ زڪئِي ناڪُون لِيڌا واۯو

‏1 زار پرڀُو يسوع يريحو شھر مانئين ٿِي زاتا تا را. ‏2 تو اَڃين ناڪُون لِيڌا واۯان نو ايڪ اڳواڻ ھتو زين نُون نام زڪئِي هتُون هانَ اِي گھڻو شاهوڪار آۮمي هتو۔ ‏3 اين نين پرڀُو يسوع نان ۮرشن ڪروان تان. پَڻ اين نُون قد نانُون ھتُون هانَ کلڪ الاهِي ھتِي تين مان اِي اين نين ڀاۯِي نتو ڪيتو. ‏4 اين هارُو اُو ڌوڙِينَ ٿوڙوڪ آڳۯ جھو هانَ ايڪ انجير نا زاڙکا ماٿي سڙِي جھو زي اِي رستا ماٿي هتُون زائِينَ ٿِي پرڀُو يسوع نين مٽوون تُون. ‏5 زار پرڀُو يسوع اَڃين پوتيا، تار اُونسي زوئينَ زڪئِي نين ڪيڌُون ڪي، ”زڪئِي، جلڌِي نِيسو اُوترِي آئي چمڪي آز مُون تارو مزمان سُون.“ ‏6 اِي هانمڀۯِينَ زڪئِي اَلاهي خوش ڇو هانَ جلڌِي نيسو اُوترِي آيو، هانَ پرڀُو يسوع نين پنهنجِي گھري تيڙِي جھو. ‏7 زار مَنکانئي اِي ڀاۯيُون تو آپس مان ڪيوا مانڏيان ڪي، ”زوو اُو ايڪ پاپي نِي گھري جھو سي؟“

‏8 پسي زڪئِي پوتان نا گھر مان اُوڀو ٿئِينَ پرڀُو يسوع نين ڪيڌُون ڪي، ”اي پرڀُو، زوو مُون مارا مال مليڪت مانئين ٿِي اَڌ حصو ڳرِيٻان نين ويراوِي لاڇوش هانَ زي مين ڪوئي ٿِي ٺڳِي ڪرِينَ وڌاري ليڌُون سي تو اين نين مُون چئوڻو واپس آليوش پرُون.“ ‏9 تار پرڀُو يسوعئي ڪيڌُون ڪي، ”آز آ گھر نان مُڳتي آوِي سي چمڪي آ پَڻ پوتان نا پڙ ڏاڏا اِڀرهام نا زَم اِيشوَر ماٿي وشواس لايو سي، ‏10 جڳت نو ست گرُو زي کوورائي جھان سي اِيئان نين ڳوتوا هانَ مُڳتي آلوا آيو سي.“

سونَ نان سِڪان نِي مِثال

متِي ۲۵‏:۱۴‏–۳۰

‏11 زار پرڀُو يسوع يروشلم شھر نين ڍُوڪڙا هتا هانَ تار مَنک اِي سوچتان تان ڪي اِيشوَر نِي بادشاهي همڻي ظاهر ٿئي زاشي۔ تار پرڀُو يسوعئي اَڃين موجود مَنکان نين آ مِثال آلِي ڪي، ‏12 ”ايڪ امِير آۮمي ھتو۔ اُو پنهنجا علاقا نِي حڪومت نو اختيار ليڌا هارُو بادشاه ڪنين جھو. ‏13 پَڻ جھا ٿِي مورِ اينڻي پوتان نان نوڪران مانئين ٿِي ۮه زڻان نين تيڙاوينَ ھر ايڪ نين ايڪُوڪو سونَ نو سڪو آليو هانَ اِيئان نين ڪيڌُون ڪي، ’ زيٽلي هُوڌِي مُون واپس وۯِي نا آوون، ايٽلِي هُوڌِي اين ٿِي واپار ڪرزو.‘ ‏14 اِي علاقا نان مَنک اِي امِير آۮمي ٿِي ۮشمڻو راکتان تان۔ اين هارُو اين نين زايا چيڙِ اِيئانئي پنهنجان مَنکان نين اِي ڪئين بادشاه ڪنين ميليان ڪي، ’اَمين خُوش نٿِي ڪي آ آۮمي اَمارو حاڪم ٿائي.‘

‏15 پسي زار اِي آۮمي حڪومت نو اختيار لئِينَ واپس آيو تار اينڻي اِي نوڪران نين تيڙايا زين نين اينڻي سونَ نا سِڪا آليا تا اين هارُو ڪي اِيئان ڪنين ٿِي کٻيرِ لي ڪي ايئانئي واپار ڪرِينَ چيٽلا ڪماڻا سي؟ ‏16 پيهرين نوڪري آوينَ ڪيڌُون ڪي، ’سائين، تمين زي ايڪ سِڪو آليو تو، مين اين مانئين ٿِي ۮوه ٻِيزان سونَ نا سِڪا ڪماڻو سُون.‘ ‏17 بادشاهئي اين ڪيڌُون ڪي، ’شاباش، تين ٿوڙاڪ مان اِيمانداري وتاڙِي سي تين مان ھوي مُون تُون نين ۮوه شھران نُون اڳواڻ ٺاهُون سُون.‘ ‏18 پسي ٻِيزي نوڪري آوينَ ڪيڌُون ڪي، ’سائين، تمين زي ايڪ سِڪو آليو تو، مين اين مانئين ٿِي پانس ٻِيزان سونَ نا سِڪا ڪماڻو سُون.‘ ‏19 تو بادشاهئي اين نين ڪيڌُون ڪي، ’مُون تُون نين پانس شھران نُون اڳواڻ ٺاهُون سُون.‘ ‏20 پسي ترِيزي نوڪري پَڻ آوينَ ڪيڌُون ڪي، ’سائين، تمين زي ايڪ سِڪو آليو تو، مين اين نين رُومال مان ٻانڌِينَ ميليو ٺو تو. ‏21 تمين آڪرا آۮمي سو اين هارُو مُون تمان ٿِي ٻِيئاڻو تو۔چمڪي زي تمين ڀيۯو نٿِي ڪرتا اين نين لئي لو سو هانَ زي تمين نٿِي وايُون اين نين لڻِي لو سو.‘ ‏22 تار بادشاهئي اين نين ڪيڌُون ڪي، ’اي ڀُڇڙا نوڪر، مُون تارِيز واتان ٿِي تُون نين ۮوهارِي ڪرُون سُون. تُون منين اُوۯکتو تو ڪي مُون چيوو آڪرو آۮمي سُون هانَ زي مين ڀيۯُون نٿِي ڪريُون اين نين لئي لُون سُون هانَ زي مين وايُون نٿِي اِي مُون لڻِي لُون سُون. ‏23 توئي پَڻ تين مارو سِڪو وياج ماٿِي چم نا ميچو ڪي مُون آوِينَ اين ڪنين ٿِي وياج سميت لئي لوت؟‘ ‏24 پسي اينڻي پوتان نان مَنکان نين ڪيڌُون ڪي، ’اِي سِڪو اين ڪنين ٿِي لئِينَ ۮوه سِڪان واۯا نين آلو پرو.‘ ‏25 تار مَنکانئي ڪِيڌُون ڪي، ’سائين، اين ڪنين تو اڳيئي ۮوه سِڪا سي،‘ ‏26 بادشاهئي ڪيڌُون ڪي، ’مُون تمان نين ڪُون سُون ڪي زي ڪنين الاهِي سي اين نين هزِي وڌِيڪ زڙشي هانَ زين ڪنين گھٽ سي اين ڪنين ٿِي اِيئي ليشي رُون زي اين ڪنين سي. ‏27 ھوي تمين ماران ڌُشمنان نين مارِي آڳۯِ لاوو هانَ اِيئان نين مارِي لاکو زين نين مرضِي نتِي ڪي مُون اِيئان ماٿي حڪومت ڪرُون.‘ “

پرڀُو يسوع نو يروشليم مان آۮرمان

متِي ۲۱‏:۱‏–۱۱، مرقس ۱۱‏:۱‏–۱۱، يوحنا ۱۲‏:۱۲‏–۱۹

‏28 پسي پرڀُو يسوع اِي واتُون ڪرِينَ يروشلم شھر ڪور مَنکان نِي آڳۯِ ھينڏوا مانڏيا. ‏29 زار اِي زيتُونَ نامين جبل ڪنين بيت فگي ڳام ھانَ بيت عنيا ڳام ڍُوڪڙان پوتيا تو اِيئانئي ٻي سيلان نين آم ڪئِينَ پوتا ٿِي مورِ ميليا ڪي، ‏30 ”هانمليا ڳام مان زو هانَ زاتاز تمين ايڪ وڇيرُون ٻانڌل مۯشي زين ماٿي ڪۮِي ڪوئي آۮمي سوار نين ڇو هوئي۔ اين نين سوڙِينَ لاوو رُون. ‏31 زي ڪوئي تمان ڪنين ٿِي پُوسي ڪي ’اين نين شاھارُو سوڙو سو؟‘ تو تمين ڪيزو ڪي، ’پرڀُو نين آئي نِي ضرُورت سي.‘ “

‏32 پسي سيلانئي زائِينَ ايمز ڀاۯيُون زَم اِيئان نين ڪيڌُون تُون. ‏33 زار اِي وڇيرا نين سوڙتا تا تار اين نين ڌڻِيئي پُوسيُون ڪي، ”اين نين شاھارُو سوڙو را سو؟“ ‏34 تو اِيئانئي ڪيڌُون ڪي، ”پرڀُو نين آئي نِي ضرُورت سي.“ ‏35 پسي سيلا اِي وڇيرا نين پرڀُو يسوع ڪنين لئِينَ آيا ھانَ اين ماٿي پوتا نا ٽوئال لاڇِينَ پرڀُو يسوع نين ماٿي سڙايا. ‏36 زار پرڀُو يسوع زاتا تا تار مَنک اِيئان نِي آڳۯ رستا ماٿي پوتا نا ٽوئال پاٿرتان زاتان تان.

‏37 پسي زار پرڀُو يسوع يروشلم شھر ڍُوڪڙا زيتُونَ نامين جبل ٿِي نيسا اوتريا واۯا رستا ڪن پوتيا تار اِيئان نان ٻڌانئين شيوَڪانئي اُو ٻڌائي چمتڪاران هارُو ڪرِينَ زي اِيئانئي ڀاۯيا تا، خوش ٿئِينَ اِيشوَر نان وَکاڻ ڪروا مانڏيا ھانَ ھاڪلا ڪرِينَ نعرا ھاڻوا مانڏيان ڪي،

‏38 ”اِيشوَر نو آشرواۮ آ ٻادشاھ ماٿي ھوئي،

زي اين نا نام ٿِي آوي سي.

آڪاش مان شانتِي ھوئي،

ھانَ سرڳ مان اِيشوَر نان وَکاڻ ٿائي.“

‏39 خلقت مانئين ٿِي فرِيسِي پنٿ نان ڪانڪ مَنکانئي پرڀُو يسوع نين ڪيڌُون ڪي، ”ڳرُو زِي، پوتان نان شيوَڪان نين نا پاڙو ڪي اُو نعرا نا ھاڻي.“

‏40 تو پرڀُو يسوعئي اِيئان نين ڪيڌُون ڪي، ”مُون تمان نين ڪُون سُون ڪي زي اِي سانا ريا تو پسي پٿر مارا نعرا ھڻوا مانڏشي.“

پرڀُو يسوع يروشلم شھر نان مَنکان ھارُو روئي سي

‏41 زار پرڀُو يسوع يروشلم شھر ڍُوڪڙا پوتا، تار شھر نين زوئيِنَ روئِي جھا، ‏42 ھانَ ڪيڌُون ڪي، ”اي يروشلم شھر واۯو، زي تمين آز نين ۮاڙي اِي واتُون زاڻتان هوت زي شانتِي آلي سي، تو چيڏلُون هڌرُون ھوت، پَڻ ھوي اِي واتُون تمارا همزيا ٿِي ٻاري سي. ‏43 چمڪي اِي ۮاڙا آيا واۯا سي، زار تمارا ڌُشمن تمان نين چاري ڪور ٿِي گھيرو ڪرِينَ مورچا ٺاھشي، ھانَ ٻڌانئي پاسان ٿِي ھوڙان ڪرشي. ‏44 اِي تمان نين هانَ تماران ٻار ٻچان نين مارِي لاکشي ھانَ تمارا شھر نين اِيم تباه ڪرشي ڪي ڪوئي پٿرو پٿرا ماٿي باقي نين راکي۔ چمڪي تمين اِي ٽانڻا نين نا اوۯڇُون زار اِيشوَر تمان نين ڀچاوا آيو تو.“

پرڀُو يسوع موٽا منۮر مان ٿِي واپاريان نين تڳڙي سي

‏45 زار پرڀُو يسوع يروشلم مان پوتيا تو اُو اِيشوَر نا گھر مان جھا۔ پسي اُو مَنکانين ٻاري ڪاڍوا مانڏيا زي اَڃين واپار ڪرتا تان۔ ‏46 پرڀُو يسوعئي ڪيڌُون ڪي، ”شاستر مان لکل سي ڪي،

’مارُون گھر ڀڳتِي ھارُو ھشي،‘

پَڻ تمين اين نين ڌاڙيلان نِي پٿارِي ٺاھِي لاڇِي سي.“

‏47 پسي پرڀُو يسوع هر روز ايشوَر گھر مان زائِينَ اِيشوَر نيُون واتُون شِيکاڙتا. پَڻ موٽا پُوزارِي، شاستر نين زاڻيا واۯا هانَ اِسرائيلِي قوم نا ٻِيزا موٽا اڳواڻ اين نين ماريا هارُو ڪرتا تا را. ‏48 پَڻ اِيئان نين ڀُل نتو زڙتو چمڪي چارُون طرف مَنک هوتا زي پرڀُو يسوع نيُون واتُون ڌيانَ آلِينَ هانمڀۯتان.