سَنت لُوقا نِي طرف ٿِي لِکل خوشي نِي کٻيرِ 5

پرڀُو يسوع نا شروع واۯا سيلا

‏1 ايڪ ۮاڙو پرڀُو يسوع گنيسرت نۮِي نين ڪپي اُوڀو تو، اَڃين الاھي مَنک اين ڪنَ ٿِي اِيشوَر نِي واتُون ھانمڀۯوا ھارُو ڀيۯان ڇان۔ مَنک ايٽلان گھڻان ھتان ڪي اِي پرڀُو يسوع ماٿي پڙتان تان ران۔ ‏2 تار پرڀُو يسوعئي نۮِي نا ڪپ ماٿي ٻي ٻيڙيُون اُوڀيُون ڀاۯيُون، زين مانئين ٿِي مونھاڻا اُوترِينَ زاۯ ڌوتا تا۔ ‏3 پسي پرڀُو يسوع پاڻ ايڪ ٻيڙِي مانئين سڙِينَ ٻيٺو ٺو۔ اِي ٻيڙِي شمعُون نِي ھتِي، اينڻي شمعُون نين ڪيڌُون ڪي، ”ٻيڙِي نين ڪپي ٿِي ٿوڙيڪ آڳۯ ڪر۔“ پسي پرڀُو يسوع ٻيڙِي مان ٻيشِينَ مَنکانين اِيشوَر نُون وچنَ شکاڙوا ماڏيا.

‏4 زار پرڀُو يسوعئي وچنَ ھنمڀۯوِي ليڌُون تار اينڻي شمعُون نين ڪيڌُون ڪي، ”ٻيڙِي نين اُونڏا پاڻي مان لئي ري۔ اَڃين تمين مسيُون ڳروا ھارُو زاۯ لاکو۔“ ‏5 شمعُونئي وَۯتِي آلي ڪي، ”گُرو زِي، اَمين ھارِي راچ مٿيا سان پَڻ اَماري ھاٿ ڪانين نٿِي آيُون۔ توئي زي تمين ڪو سو تو وَرِي زاۯ لاکُون سُون۔“ ‏6 زار شمعُون ھانَ اين نان ساٿيانئي زاۯ لاڇو تو ايٽليُون مسيُون فاسيُون ڪي زاۯ ٽُوٽوا مانڏيا۔ ‏7 تار اِيئانئين پنهنجان ساٿيان نين، زي ٻيزِي ٻيڙِي مان ھتا، اِيئان نين اِشارا ڪرِينَ مدد ھارُو تيڙايا۔ اُو آيا ھانَ ٻڌانئي مسيان ٿِي ٻئي ٻيڙيان مسيان نين ايٽليُون ڀريُون ڪي ٻيڙيُون ٻُوڏوا ماڏيُون۔

‏8 زار شمعُون زين نين پطرس پَڻ ڪيتا اِي پرسو ڀاۯيو تو اِي پرڀُو يسوع نان پڳي پڙِينَ ڪيوا مانڏيو ڪي، ”پرڀُو زِي، مُون تو پاپِي مَنک سُون، مُون اِي لائق نٿِي ڪي تُون ڍُوڪڙو رُون “ ‏9 زار شمعُون ھانَ اين نان ٻڌانئين ساٿيانئي ايٽليُون ٻڌيُون مسيُون زاۯ مان فاٿل ڀاۯيُون تار اِيئان نان مُونڍان ڦاٽي جھان۔ ‏10 شمعُون نا ساٿِي زبدي نا سوڪرا يعقُوب ھانَ يوحنا پَڻ حيرت مان پڙِي جھا۔ پسي پرڀُو يسوعئي شمعُون نين ڪيڌُون ڪي، ”تُون متَ ٻيئا، آز ٿِي تُون مسيُون نِي جڳائي مَنکان نين ڳوتِينَ مارا سيلا ڪرِيش۔“ ‏11 پسي اِي ٻيڙيان نين نۮِي نين ڪپي لئِينَ آيا ھانَ پنهنجُون سب ڪُجھ ميلِينَ پرڀُو يسوع نا سيلا ٿئِي جھا ھانَ اين نِي چيڙي ھيڏوا ماڏيا۔

پرڀُو يسوع ايڪ ڪوڍيا نين ھازو ڪري سي

‏12 زار پرڀُو يسوع ايڪ شھر مان جھو تو اَڄين ايڪ ايوو آۮمِي اين ڪنين آيو زي ڪوڍ ٿِي ڀَرل ھتو۔ زار ڪوڍئي پرڀُو يسوع نين ڀاۯيو تار پرڀُو يسوع نين پڳي پڙِينَ وينتي ڪروا مانڏيو ڪي، ”پرڀُو زي، زي تمارِي مرضي ھوئي، تو تمنين منين ھازو نروو ڪرِي ڪو سو۔“ ‏13 تو پرڀُو يسوعئي پوتان نو ھاٿ اين ماٿي راڇِينَ ڪيڌُون ڪي، ” مارِي مرضِي سي ڪي تُون ھازو نروو ٿئِي زا۔“ اِيز ٽانڻي اين نو ڪوڍ مٽِي جھو۔ ‏14 پرڀُو يسوعئي اين نين حڪم آليو ڪي، ” آ وات چائيني نا ھنمڀۯاوزي پَڻ سيدو يروشيلم شھر مان اِيشوَر نا گھر مان زائِينَ پنهنجُون ڏِيل پوزارِي نين وتاڙِ، ھانَ پويتر ٿايا ھارُو اِي ٻليۮان ڪرِ زين نا بارام سنت موسا نا لِکل شاستر مان لکل سي زين ٿِي ٻڌانئين مَنکان نين کٻير پڙي ڪي تُون پويتر ٿئِي جھو سي۔“

‏15 پرڀُو يسوع نِي واتُون ھانَ پرسا ھر جڳائي مشھور ٿا تا جھا، ھانَ مَنکان نان موٽان موٽان ٽوۯان پرڀُو يسوع ڪنين آوا ماڏيان، ڪي اين نيُون واتُون ھانمڀۯي ھانَ بيماران ٿِي ھازان نروان ٿائي۔ ‏16 پَڻ پرڀُو يسوع اِيئان ٿِي الڳ ٿئِينَ جھنڳل مان جھو ھانَ پراٿنا ڪروا مانڏيو۔

پرڀُو يسوع ايڪ اڌرنڳ واۯا نين ٺيڪ ڪري سي

‏17 ايڪ ۮاڙو زار پرڀُو يسوع پرچار ڪرتو تو، تار ڪانڪ فريسي پنٿ نا ڌرمِي پنڍت ھانَ شاستر نين زانڻيا واۯا پَڻ اَڃين ٻيٺل ھتا زي گليل ھانَ يھوديا نان ڳام مانئين ٿِي ھانَ يروشلم شھر مانئين ٿِي آيا تا۔ اِيشوَر ني شڳتِي پرڀُو يسوع ڀيۯي ھتي ھانَ اِي بيماران نين ٺيڪ ڪرتو تٿو۔ ‏18 اِيز ٽانڻي ڪانڪ مَنک ايڪ آۮمِي نين ڊوليا مان اُوپاڙِينَ لئي آيان، زين نين اَڌرنڳ ٿل ھتو ھانَ اِي ھينڏِي ڦرِي نا ڪيتو۔ اِيئانئي اِي آۮمِي نين پرڀُو يسوع ڪنين مانئين لئِي زايا نِي ڪوشش ڪرِي، ‏19 پَڻ مَنکان نا رَش ٿِي ڪرينَ اِي پرڀُو يسوع ڪنين پوتي نا چا۔ پسي اُو بيمار نين اُوپاڙِينَ ڪوٺِي ماٿي لئين جھا ھانَ اِي ڪوٺِي نِي ڇت کولِينَ بيمار نين ڊوليا ھوتو مَنکان نِي وَس مانئين ٿِي پرڀُو يسوع نِي آڳۯ اُوتاريو۔ ‏20 زار پرڀُو يسوعئي اِيئان نُون ايٽلو وشواس ڀاۯيو تار اَڌرنڳِي نين ڪيڌُون ڪي، ”ڀائِي، تاران پاپ ميٽ ٿئِي جھا سي۔“ ‏21 اِي وات ماٿي ڌرمِي پنڍت ھانَ فريسي ايڪ ٻيزان ڪنَ پُوسوا مانڏيا ڪي، ’آ ڪُونڻ سي؟ زي اِيشوَر نين خلاف واتان ڪري رو سي؟ چمڪي اِيشوَر وَڳير ڪوئي پاپ معاف نٿِي ڪري ڪيتو۔‘

‏22 پرڀُو يسوع اِيئان نِي واتُون ھزمي جھو ھانَ اِيئان نين ڪيڌُون ڪي، ”تمين ايوِي واتان چم سوچو سو؟ ‏23 شُون ايم چيوون ھورُون سي ڪي، تمارا پاپ معاف ٿئي جھا يان ايم چيوون ڪي، اُوٺِينَ گُم ڦرِ؟ ‏24 مُون تمان نين ثابت ڪرِينَ وتاڙيوش ڪي، جڳت نو ست ڳُرو نين پَڻ ۮوھ معاف ڪريا نو اَڌيڪار سي۔“ پسي پرڀُو يسوعئي اَڌرنڳ واۯا نين ڪيڌُون ڪي، ”مُون تُون نين ڪُون سُون ڪي اُوٺِ ھانَ پوتان نو ڍوليو اُوپاڙِ ھانَ پوتان نِي گِھري زا“ ‏25 ھانَ اِي آۮمِي اِيئان نين آڳۯ ايڪدم اُوٺيو ھانَ زي ڍُوليا ماٿي اُونجھو پڙيو تو اين نين کوي اُوپاڙِينَ اِيشوَر نان وَکاڻ ڪرتو ڪرتو پوتان نين گِھري زاتو ريو۔ ‏26 اِي زوئِينَ ٻڌانئي مَنک حيران ٿئِي جھان ھانَ پرڀُو يسوع نِي شڳتِي ھانَ اَڌيڪار نين ڀاڙِينَ اِيشوَر نان وَکاڻ ڪروا مانڏيان ھانَ ڪيوا مانڏيان ڪي، ” آز اَمين چيوي عجيب وات زوئي سي۔“

لاوي پرڀُو يسوع نو سيلو ٿائي سي

‏27 اين چيڙِ پرڀُو يسوع ٻاري نيھريو تو اينڻي ايڪ ناڪُون ليڌا واۯو آۮمِي ڀاۯيو زين نُون نام لاوي ھتُون ھانَ اُو اِي ٽانڻي پنهنجِي ناڪُون ليڌا نِي جڳا مان ٻيٺو تو، پرڀُو يسوع اين نين ڪيڌُون ڪي، ”مارِي چيڙي آئي رو۔“ ‏28 لاوي اُوٺيو ھانَ پنهنجُون سب ڪُجھ ملِينَ پرڀُو يسوع ني چيڙي ھينڏو پرو۔

‏29 پسي لاويئي پوتان نا گھر مان پرڀُو يسوع نِي موٽِي دعوت ڪرِي۔ اِي دعوت مانئين گھڻائي ناڪُون ليڌا واۯا ھانَ ٻيزان پَڻ اَلاھِي مَنک اِيئان ڀيۯان کاوا زموا ھارُو ٻيٺان تان۔ ‏30 تار فريسي ھانَ اِيئان نان ڌرمي پنڍتائي پرڀُو يسوع نان سيلان نين ساني گھوڌي ڪيڌُون ڪي، ”تمين شاھارُو ڍل ليڌا واۯان ھانَ پاپيان ڀيۯُون کو پيئو سو؟“ ‏31 پرڀُو يسوعئي اِيئان نين مثال آلي ڪي، ”ھازان ھوران نين ڍاڪٽر نِي ضرورت نٿِي ھوتي، پَڻ بيماران نين ڍاڪٽر نِي ضرورت ھوئي سي۔ ‏32 مُون اِي مَنکان ھارُو نٿِي آيو زي پنهنجو پاڻ نين ڌرمي مَنک ھمزي سي پَڻ اُو مَنکان ھارُو آيو سُون زي پنهنجو پاڻ نين پاپي ھمزي سي ڪي، اِي پنهنجان پاپان ٿِي توبان ڪري ھانَ اِيشوَر نِي واتان ماٿي ھينڏي۔“ ‏33 اِيئانئي پرڀُو يسوع نين ڪيڌُون ڪي، ”يوحنا پويتر سنان آليا واۯا نا سيلا تو گھڻُون ڪرِينَ وَرت راکي سي ھانَ پراٿنا پَڻ ڪري سي، ھانَ فريسيان نا سيلا پَڻ ايم نُون ايم ڪري سي۔ پَڻ شاھارُو تمارا سيلا کاتا پيتا ري سي؟“ ‏34 پرڀُو يسوعئي اِيئان نين وَۯتِي آلي ڪي، ”زيٽلي ھُڌِي لاڏو زانيان ڀيڙو سي، ايٽلِي ھُوڌِي تمنين اِيئان نين وَرت رَکاوِي ڪي شو؟۔ ‏35 پَڻ ايوو وقت آوشي زار لاڏو اِيئان ٿِي ڌار ڪريو زاشي، پسي اِي پَڻ وَرت راکشي۔“

‏36 پرڀُو يسوعئي اِيئان نين آ مثال پَڻ ھنمڀۯاوي ڪي، ”ڪوئي پَڻ مَنک نوا لگڙا نين ڪاترِينَ زونا لگڙا مان ٿيڳڙان نٿِي آلتُون۔ زي اِي ايم ڪرشي تو نوون لگڙُون ڪوئي ڪام نُون نين ري ھانَ زونا لگڙا ماٿي پَڻ نوون ٿيڳڙُون ھڌرُون نين لاڳي۔

‏37 ايوي ريچ ڪوئي پَڻ مَنک نوو ٺاھل اَنگوران نو رَس سانٻڙا نِي زوني سنۮارِي مان نين ڀري، زي اُو ڀرشي تو اَنگوران نو نوو رَس پاڪو ٿاتانز زونِي سنۮارِي ڦولِينَ ڦاٽِي زاشي ھانَ اين ٿِي سنۮارِي ھانَ اَنگوران نو رَس ٻئي کراٻ ٿئي زاشي۔ ‏38 اين ھارُو اَنگوران نو نوو رَس تو نوِي سنۮارِي مان ڀروو زوئي۔ ‏39 ھان زي مَنک زُونان اَنگوران نو رَس پيڌي ڍاڻ سي، اين نين نوو اَنگوران نو رَس نين وَنڻي، ھانَ اُو ڪيشي ڪي، زي زُونو اَنگوران نو رَس سي اِيز ھڌرو سي۔