लूका के लिखल बढ़िया खबर
इ किताब के परिचय
इ बढ़िया खबर लूका के चलते लिखल गइल हई । लूका एगो डाक्टर आऊ यीसु मसीह के बढ़िया खबर के एगो परचारकवो हलई । इ किताब में परभु सब अदमिनियन खातिर यीसु मसीह के मुक्ती देवेवोला के रूप में बतावल गइल हई । इ बढ़िया खबर के मुख्य बतिया इ हई कि परभू यीसु मसीह सब अदमिनियन खातिर एगो आदमीन के रूप में इ दुनिया में आइल हथीन । अदमिनियन आपन आपन पाप छेमा खातिर मुक्ती देवेवोला यीसु पर बिसवास करतथीन, त ओकिन मुक्ती पउतथीन । ओकिन खातिर इ एगो बढ़िया खबर हई ।
इ किताब में अउरतियन, लइका-लइकियन आऊ गरीबकन परे बड़ी धेयान देवल गइल हई । लूका लिखत हई कि "गरीबकन के बढ़िया खबर सुनावे खातिर परमेस्वर के आत्मा यीसु के चुनले हथीन । इहेसे इ बढ़िया खबर सब तरी के बिमारी में पड़ल लोगन खातिर सांती आऊ मुक्ती देवे के बढ़िया खबर हई ।
लूका इ किताब के थियुफिलुस नाम के एगो आदमीन खातिर लिखले हई, आऊ अइसन चाहलई कि थियुफिलुस यीसु के बारे में बढ़िया तरी से जान जतई ।
इ बढ़िया खबर के सुरुवात में यीसु के आवे के बारे में लिखल गइल हई, आऊ आखिरी में यीसु के सरग गइला के बारे में लिखल हई । लूका लिखत हई कि यीसु के जन्म के समय में सरगदूतवन गीत गउलथीन आऊ चरवाहवन उनकरा देखेला गलथीन ।
इ बढ़िया खबर में किसिम-किसिम के कथा बतावल गइल हई, जइसे दयालु सामरी, दयालू पिता के कथा, बीज के कथा आऊ भुलाइल भेड़ी के कथा ।
इस भुलाइल भेड़ी के कथा में परमेस्वर इ बतावत हथीन कि सब अदमिनियन परमेस्वर भीरा से भुलाइल भेड़ी के जइसन भुलाइल हथीन, इ भुलाइल भेड़ी के, जइसे एगो चरवाहा खोज के लानलई, ओइसही यीसु मसीह परमेस्वर भीरा से भुलाइल अदमिनियन के खोजे खातिर आइल हथीन ।
यीसु के चलते पाप के छेमा कइसे मिलतई, ओकर खातिर ढेर जोर देके लूका इ किताब में लिखले हई, आऊ इहो लिखले हई कि अदमिनियन आपन जिन्गी के बुराई के कइसे छोड़ सका हथीन, आऊ कइसे परमेस्वर के सन्तान बन सका हथीन ।
रूप-रेखा
परिचय 1: 1-4
यूहन्ना बपतिस्मा देवेवोला आऊ यीसु के जन्म 1:5-2:52
बपतिस्मा देवेवोला यूहन्ना डहर तइयार करा हई 3: 1-20
यीसु के बपतिस्मा आऊ परीक्छा 3:21-4:13
गलील में यीसु के सेवकाई
गलील से यरूसलेम तक यात्रा
यरूसलेम में आखिरी सप्ताह
परभू के जी उठेला, दिखाई देवेला आऊ सरग जाएला