बपतिस्मा देवेवोला यूहन्ना के परचार
(मत्ती )
3
1 इ उहे घरी के घटल हई, जखनी महाराजा तिबिरियुस रोमी सामराज में पंदरह साल से राज करत हलई, आऊ जखनी पुन्तियुस पिलातुस यहूदिया इलाका के राजपाल हलई, आऊ हेरोदेस अन्तिपास इहे गलील इलाका में राज करत हलई, आऊ ओकर भाई फिलिप्पुस इतूरइया आऊ तरखोनीतिस इलाका में राज करत हलई, आऊ लिसानियास इहे अबिलेने इलाका में राज करत हलई, 2 आऊ जखनी हन्ना आऊ काइफा महा याजकवन हलथीन, तखनी परमेस्वर जकरयाह के बेटा यूहन्ना के खबर देलथीन, जे उहे घरी बिरान जगह में रहत हलई । 3 तखनी यूहन्ना यरदन नदी के अगल-बगल के सब इलाका में जाके इ परचार करे लगलई कि “तोहिन आपन सब पाप काम छोड़ देहीं, परमेस्वर भीरा आ जाहीं, आऊ बपतिस्मा लेहीं, तखनी परमेस्वर तोहिन के सब पाप के छेमा करतथीन । 4 परमेस्वर देने से बोलेवोला यसायाह यूहन्ना के बारे में इ सब पहिलही से लिख के रखले हलई:“बिरान जगह में एगो पुकारेवोला के बोली सुनाई देवत हई कि
‘परभु के डहर तइयार करा,
आऊ उनकर खातिर डहर सोझे बनावा ।
5 एक-एक घाट के भर देहीं,
आऊ एक-एक पहाड़ आऊ उबड़-खाबड़ समथीर करा ।
आऊ टेढ़ डहर सोझे,
आऊ उबड़-खाबड़ डहर समथीर बनावा ।
6 आऊ हर एक आदमीन परमेस्वर के मुक्ती के डहर के देखतई’a ।”
7 जेकिन बपतिस्मा लेवेला यूहन्ना भीर अलथीन, ओकिन से उ अइसन परचार करलई, “हे फनिका के बचवन, परमेस्वर के आवेवोला बड़का डड़ से बच के भागेला कवन तोहिन से बता देलई ? 8 तोहिन आपन जिन्गी से साबित कर देहीं कि तोहिन सच में आपन पाप के छोड़ देले हां, आऊ परमेस्वर देने आपन मन लगउले हां । अइसन नई सोचिहां कि हमिन के कोई डर नइखे, काहेकि हमिन अबराहम के संतान हियई, आऊ परमेस्वर के चुनल लोगन हियई । एकरा से कुछो नई होतऊ, काहेकि परमेस्वर इ पखलवन से अबराहम खातिर बाल-बच्चा जन्मा सका हथीन । 9 अभियो परमेस्वर के डड़ के टांगा तोहिन के जरियन से कांट-फेके खातिर सहियार के रखल हई, काहेकि जे भी रुख बढ़िया फर नई देतई, ओकरा जरी से कांट के आगी में झोकल जतई ।”
10 तखनी अदमिनियन उनकरा से पुछलथीन, “त परमेस्वर के इ डड़ से बचे खातिर हमिन के का करेला चाही ?” 11 यूहन्ना ओकिन से कहलई, “जवन भीर दूगो कुरता हई, उ दूनो ओकरा साथे बांट ला जेकरा भीर कुछो नखई, आऊ जवन भीर खायेला हई, उहो अइसही करेला चाही ।"
12 कर लेवेवोला करमचरिया लोगनो बपतिस्मा लेवे अलथीन, आऊ ओकिन उनकरा से पूछलथीन, “हे गुरु, हमिन का करियई ?” 13 यूहन्ना ओकिन से कहलई, “जेतना रोमी सरकार ठहरउले हऊ, ओकरा से जादे नई लिहें ।
14 कुछ सिपहियनो ओकरा से इ पूछलथीन, “हमिन के का करेला चाही ?” तखनी यूहन्ना ओकिन से कहलई, “केकरो पर रंगदारी नई करिहें, आऊ झूठ-मूठ के दोस नई लगइहें, आऊ आपन बेतन पर सबर करिहें ।”
15 जखनी अदमिनियन आवेवोला मसीह के आसरा लगा के बाट जोहत हलथीन, आऊ सब आपन आपन मन में यूहन्ना के बारे में सोचे लगलथीन कि का इहे त मसीह नखई ? 16 त यूहन्ना ओकिन सब से कहलई, “हम त तोहिन के पानी से बपतिस्मा देवा हिवा, बाकि एगो आवेवोला हथीन, उ हमरो से सक्तिमान हथीन, हम त उनकर जूता के फिता खोलेवोला एगो गुलामी भी बने जुकुर नइखी । उ तोहिन के पबितर आत्मा आऊ आगी से बपतिस्मा देतथीन । 17 उनकर सूप उनकर हाथ में हई, आऊ उ आपन खरिहान बढ़िया तरी से साफ करतथीन, आऊ गोहुम के आपन कोठी में जमा करतथीन, बाकि भूसा के उ आगी में जरा देतथीन जे कहियो नई मिहतई । ओइसही उ सब अदमिनियन के नयाय करे आवत हथीन । 18 यूहन्ना इहे तरी ढेरे चेतावनी देलई, आऊ मसीह के आवे के बढ़िया खबर सुनावत हलथीन ।
19 हेरोदेस राजा आपन भाई फिलिप्पुस के मेहरारु हेरोदियास के आपन भीर रखलई, आऊ एकर साथे साथ आऊ ढेर कुछ बुराई के काम करले हलई । यूहन्ना सब के सामने हेरोदेस राजा के डाटलई । 20 इहेसे हेरोदेस राजा यूहन्ना के जेल में डाल देलई । इ ओकर सब से बढ़का बुराई के काम बनलई ।
यूहन्ना यीसु के बपतिस्मा देवत हई
21 जेल में जाय से अगाड़ी, एक दिन जखनी यूहन्ना अदमिनियन के बपतिस्मा देवत हलई, तखनी यीसु भी बपतिस्मा लेलथीन, आऊ बपतिस्मा लेके जखनी यीसु पराथना करत हलथीन, त आसमान खुल गलई । 22 आऊ पबितर आत्मा परेवा जइसन देह रूप में यीसु पर उतरलथीन, आऊ आसमान से परमेस्वर के आवाज सुनाई देलई, “तू हमर दुलरुवा बेटा हई, आऊ तोहरा से हम ढेर खुस हियऊ ।
यीसु के वंसावली
23 जखनी यीसु आपन सेवा के सुरु करलथीन त उ लगभग तीस साल के उमर में हलथीन, आऊ अदमिनियन उनकरा यूसुफ के बेटा समझत हथीन, यूसुफ त एली के बेटा हलई, 24 एली मत्तात के बेटा, मत्तात लेवी के बेटा, लेवी मलकी के बेटा, मलकी थन्ना के बेटा, थन्ना यूसुफ के बेटा, 25 यूसुफ मत्ततियाह के बेटा, मत्ततियाह आमोस के बेटा, आमोस नहूम के बेटा, नहूम एसली के बेटा, एसली नोगह के बेटा, 26 नोगह मात के बेटा, मात मत्ततियाह के बेटा, मत्ततियाह सिमी के बेटा, सिमी योसेख के बेटा, योसेख योदाह के बेटा, 27 योदाह यूहन्ना के बेटा, यूहन्ना रेसा के बेटा, रेसा जरुबाबिल के बेटा, जरुबाबिल सलतियेल के बेटा, सलतियेल नेरी के बेटा, 28 नेरी मलकी के बेटा, मलकी अधी के बेटा, अधी कोसाम के बेटा, कोसाम इलमोदाद के बेटा, इलमोदाद एर के बेटा, 29 एर येसु के बेटा, येसु एलीएजेर के बेटा, एलीएजेर योरीम के बेटा, योरीम मत्तात के बेटा, मत्तात लेवी के बेटा, 30 लेवी समोन के बेटा, समोन यहूदाह के बेटा, यहूदाह यूसुफ के बेटा, यूसुफ योनान के बेटा, योनान एलियाकीम के बेटा, 31 एलियाकीम मलेयाह के बेटा, मलेयाह मिन्नाह के बेटा, मिन्नाह मत्तता के बेटा, मत्तता नातान के बेटा, नातान दाऊद के बेटा, 32 दाऊद यिसऊ के बेटा, यिसऊ ओबेद के बेटा, ओबेद बोअज के बेटा, बोअज सलमोन के बेटा, सलमोन नहसोन के बेटा, 33 नहसोन अम्मीनादाब के बेटा, अम्मीनादाब आदमीन के बेटा, आदमीन अरनी के बेटा, अरनी हिस्रोन के बेटा, हिस्रोन फिरिस के बेटा, फिरिस यहूदाह के बेटा, 34 यहूदाह याकूब के बेटा, याकूब इसहाक के बेटा, इसहाक अबराहाम के बेटा, अबराहाम तिरह के बेटा, तिरह नाहोर के बेटा, 35 नाहोर सरूग के बेटा, सरूग रऊ के बेटा, रऊ फिलिग के बेटा, फिलिग एबिर के बेटा, एबिर सेलाह के बेटा, 36 सेलाह केनान के बेटा, केनान अरफक्साद के बेटा, अरफक्साद सेम के बेटा, सेम नूह के बेटा, नूह लिमिक के बेटा, 37 लिमिक मथूसिलह के बेटा, मथूसिलह हनोक के बेटा, हनोक यिरिद के बेटा, यिरिद महललेल के बेटा, महललेल केनान के बेटा, 38 केनान एनोस के बेटा, एनोस सेत के बेटा, सेत आदम के बेटा, आऊ आदम परमेस्वर के हलई ।