Yesu pian' Wina'am Pʋ'ʋsim Yir san'auŋ la yɛla
13
1 Yesu n da yit Wina'am Pʋ'ʋsim Yin la,
ka o nya'andɔlib la yinne yɛl ye,
“Pa'anna,
gɔsim ban nɔk kugbɛda mɛ dɔɔd la ka ba vɛnl si'em.”
2 Ka Yesu lɛbis o ye,
“Fʋ nyɛ dɔbɛdbama?
Hali kugir yinne kʋ ti kpɛlim li tiraan zuginɛɛ.
Ba na lɔbi li wʋsa bas teŋin.”
Wina'am nidib namisʋg la yɛla
3 Yesu da zin'inɛ Olif zuor zugʋ gɔsid Wina'am Pʋ'ʋsim Yir.
Ka Pita nɛ Jemes nɛ Joon nɛ Andrew ma'aa kɛɛn o san'an na.
4 Ka bu'os o ye,
“Yɛlimi ti saŋkanɛ ka nɛ'ɛnam na niŋ?
Ka zanbin bɔɔ na pa'al ye li saŋa paae ya ka si'el wʋsa na niŋɛ?”
5 Ka Yesu pin'ili sa'ali ba ye,
“Gu'usimi,
ka sɔ' da pan'asi ya ka ya dɔl suobɛ'ɛdɛ.
6 Nidib bɛdegʋ na ti nɔki m yʋ'ʋri kena ma'ad ye,
‘Manɛ an Kristo la,’
ka kɛ ka nidib bɛdegʋ dɔl suobɛ'ɛd.
7 Ya ya'a ti wʋm tanp vuud,
bɛɛ tanp labaar,
da kɛ ka dabiem kpɛn' yaa,
bɔzugɔ asɛɛ li wʋsa niŋ.
Amaa li pʋ pa'al ye dunia naar saŋa laa.
8 Buudi na zab nɛ buudi.
Ka sʋ'ʋlim yinne mɛ na zab nɛ o tiraan.
Ka teŋ na dam zin'is bɛdegʋ,
ka kɔ'ɔm na bɛ.
Nɛ'ɛŋa anɛ namisʋg la pin'ilʋg.”
9 “Gu'usimi ya mɛŋ,
ka nidib na gban'e ya keŋ banɛ kat saria tuon.
Ba na bʋ' ya la'asʋg dɔɔdin.
Man yɛla,
ya na zi'en gɔmenanam nɛ na'anam tuon,
ka tu'asi m labasʋŋ la.
10 Li anɛ tilas ye labasʋŋ la mɔɔl buudi wʋsa ni.
11 Ka ba ya'a ti gban'e ya mɔri keŋ banɛ kat saria tuon,
yanam da dɛŋi fabin yanamɛ na yɛl si'ela.
Amaa ya pian'ad saŋa ya'a ti paae,
yanam pian'am dinɛ kɛɛn ya pʋtɛn'ɛrin na.
Bɔzugɔ pian'akanɛ ka ya ye ya pian' la pʋ yiti ya mɛŋ nii,
li yitnɛ Wina'am Siig Kasi la ni na.
12 “Ba'abiig na zam o ba'abiig ka ba kʋʋ o.
Ka saamnam mɛ na niŋi ba biisi ala.
Biis na ki'isi ba saamnam nɛ ba manam nɔya,
ka kɛ ka ba kʋʋ ba.
13 Nidib bɛdegʋ na kisi ya m yʋ'ʋr zug.
Ka ninkanɛ mɔdigi paae li naar la na nyɛ faangir.”
Bʋn kisa la yɛla
14 Ya na ti nyɛ bʋnkisa linɛ san'amid si'elnam wʋsa,
ka li bɛ zin'ikanɛ pʋ nar ye li bɛɛ.
(Kɛlli ka onɛ karimi li gban'e li gbin.)
Banɛ bɛ Juda teŋin zɔm dʋ zuoya ni.
15 Ka ninkanɛ bɛ mɔpil zug da sigid ye o kpɛn' yinne nɔk si'ela.
16 Ka ninkanɛ bɛ pɔɔgin da kun yin ye o nɔk o fuugɔ.
17 Ka dabisban la na anɛ tɔɔgʋ tis pu'apʋʋs nɛ bimanam.
18 Sɔsimi Wina'am ka li da ti niŋ waad saŋaa.
19 Tɔtita'ar na bɛ dunia ni;
hali Wina'am maal dunia pin'ilʋgʋn ti paae zina,
li nan zi' bɛɛ,
ka kʋ maligim bɛ ya'asɛ.
20 Amaa Zugsɔb la ya'a pʋ sien dabisa la kallɛ,
sɔ' naan kʋ tiliginɛɛ.
Amaa nimbanɛ ka o gaans la zugʋ kɛ ka o sie dabisa la.
21 Ka sɔ' ya'a yɛl ye,
“Gɔsimi ka Kristo nwa!”
bɛɛ,
“Gɔsimi ka onɛ bɛ kpɛ'ɛsa la!”
Yanam da siakɛ.
22 Nidib na ma' ziri ye banɛ an Kristo la ka ziri nɔdi'esidib mɛ na kena,
ba na maal zanbina nɛ tʋʋmnyalima ye ba kɛ ka nimbanɛ ka Wina'am gaŋ la dɔl suobɛ'ɛd,
ba ya'a na nyaŋ.
23 M dɛŋin yɛli ya si'el wʋsa.
Alazug,
gu'usimi.
Ninsaal Biig la lɛbig na yɛla
24 “Amaa tɔɔg nwa dabisa ya'a ti gaad,
winnig na lieb zibisʋg ka nwadig mɛ kʋ nie.
25 Ka nwadbibis na naan agɔla lit teŋin na.
Paŋ dim banɛ bɛ agɔl na mi'im.
26 “Ka dunia nidib na nyɛ Ninsaal Biig la ka o kenna nɛ saŋgbana,
nɛ paŋ tita'ar nɛ o na'am ka li nyɛɛn pil-pil.
27 O na tʋm maliaknam ka ba la'as nimbanɛ ka Wina'am gaŋ la,
banɛ bɛ dunia lʋga anaasi la ni,
tuon nɛ nya'aŋ nɛ dagɔbʋg nɛ datiuŋ la wʋsa.”
Kekaŋ n pa'an si'em la yɛla
28 “Kpansimi kekaŋ ka zamisi ya'am.
Li wila ya'a ti busid vanpɔla la,
ya mi' ye sigir li'el ya.
29 Ala mɛn ya ya'a nyɛ nɛ'ɛnam wʋsa ya na baŋ ye Ninsaal Biig la lɛbig li'elnɛ,
hali li kʋ lɛn yuugɛ.
30 Asida ka m yɛti ya ye,
zʋmaaŋ kaŋa nwa nidib kʋ gaadɛ,
asɛɛ nɛ'ɛnam wʋsa naam.
31 Saazug nɛ dunia na gaad,
amaa man pian'ad la kʋ maligim gaadɛ.
Sɔ' kae mi' Yesu ken dabisir nɛ li saŋa la
32 “Nid baa yinne kae mi' dabisir la bɛɛ saŋa la.
Baa maliaknam banɛ bɛ arezana ni bɛɛ Biig laa,
asɛɛ Ba' la gʋllim.
33 Gu'usimi sʋ'ʋŋa ka guri bɔzugɔ,
ya zi' dabisir la nɛ saŋa laa.
34 Li nwɛnɛ dau na nwiɛnd ka zaŋ o yiri gu'ul o tʋmtʋmnib ka pʋdig sɔ' wʋsa nɛ o tʋʋma,
ka yɛl za'anɔgur la ye o gur.