Joon tʋm o nya'andɔlib Yesu san'an
11
1 Ka Yesu n pa'al o nya'andɔlib pii nɛ ayi' la naae la,
o yi zin'ikanɛ keŋ tembanɛ kpi'e la mɔɔn Wina'am labaar ka pa'an nidib la.
2 Ka Joon n da bɛ sanrega ni la ka wʋm Kristo tʋʋma labaar,
ka tʋm o nya'andɔlib Yesu san'an,
3 ye ba bu'os ye,
“Fʋnɛ an onɛ na kena la bɛɛ ti gur sɔ' nya'aŋa?”
4 Ka Yesu lɛbis ye,
“Kem yɛli Joon yanamɛ wʋm ka nyɛ si'el:
5 zʋnzɔɔs nyɛt ka pɔnda ken ka kʋkɔma nyɛ laafi,
ka banɛ an tʋbkpida wʋm ka banɛ kpi vʋ'ʋg,
ka ba mɔɔn labasʋŋ la tisid nɔŋ dim.
6 Albareka bɛ nɛ onɛ pʋ bi'esidi ma.”
Yesu pa'an Joon yɛla
7 Joon nya'andɔlib la daa lɛbid la,
ka Yesu pian'adi pa'an nidib la Joon yɛla ye,
“Bɔ ka ya daa keŋ mɔɔgin ye ya gɔsɛ?
Ya daa keŋ ye ya gɔs mɔkanɛ ka sisi'em daad la bɛɛ?
8 Ka li ya'a ka' ala,
bɔ yɛla ka ya daa keŋɛ?
Ya daa keŋnɛ ye ya gɔs dau kanɛ yɛ fusʋma bɛɛ?
Tɛn'ɛsimi ye,
banɛ yɛ fusʋma la bɛ nɛ na'anam yaan.
9 Ka bɔ yɛla ka ya keŋɛ?
Ya daa keŋnɛ ye ya gɔs Wina'am nɔdi'es la bɛɛ?
M yɛti ya nɛ ye,
ɛɛn,
asida.
Onɛ ka ya keŋ gɔs la gaad Wina'am nɔdi'es.
10 Dau kaŋa yɛla ka li da sɔb ye,
“ ‘M na tʋmi m tʋmtʋm ka o dɛŋi fʋ tuonnɛ maal suosʋŋi fʋ zug la.’ ”
11 Ka Yesu yɛl ye,
“Asida sida ka m yɛti ya ye,
sɔ' kae ka ba du'a o ka o gaad Joon nɛ.
Amaa onɛ an kpaanr Wina'am sʋ'ʋlimin la gaad Joon.”
12 Joon labaar mɔɔlʋg saŋa la ti paae nannanna nwa,
nidib daa mugusidi ba mɛŋ ye ba paam Wina'am sʋ'ʋlim la kpɛn'.
Ka zigid ye ba keŋ tuonnɛ kpɛn'.
13 Wina'am nɔdi'esidib wʋsa nɛ wada kanɛ ka Moses da tis la sɔbnɛ sʋ'ʋlim la yɛla hali ka Joon nan kae.
14 Ya ya'a bɔɔd ye ya siaki li,
Joon anɛ Elaja onɛ na kena la.
15 Onɛ mɔr tʋba na wʋm,
kɛl ka o wʋm.
16 “Bɔ ka m na zaŋi mak ka li nwɛnɛ zʋmaaŋ kaŋa nidiba?
Ba nwɛnɛ biisi zin' da'ani buonnɛ ba taaba ye,
17 ‘Ti piebid wiis ka ya pʋ wa'ada,
ka kaasid kʋʋr ka ya pʋ fabin na.’
18 Ka Joon kena lɔɔd nɔɔr ka pʋ nuud daam ka ba yɛl ye,
‘Kikirisi dɔl o.’
19 Ka Ninsaal Biig la kena dit ka nuud ka ba yɛl ye,
‘O anɛ diis nɛ danuud,
ka o zuanam an lampɔdi'esidib nɛ ninyɔɔd.’
Ya'am sɔb tʋʋmaa pa'an ye o mɔr ya'am.”
Yesu sa'al tɛɛns banɛ pʋ niŋ o yadda la
20 Yesu da zɛrig tɛɛns banɛ ka o tʋm tʋʋmnyalima bɛdegʋ ka ba pʋ tiaki ba tʋʋmbɛ'ɛd la.
Ka yɛl ye,
21 “Korazin dima,
yɛltɔɔg bɛɛ ya zug.
Besaida dima,
yɛltɔɔg bɛɛ ya zug mɛn.
Bɔzugɔ tʋʋmnyalima linɛ tʋmi ya san'an nwa ya'a da tʋmin Taya nɛ Sidon tɛɛnsin ba naan tiakin ka yɛ bɔto fuud ka bug tampɛligim linɛ pa'al ye ba tiakya.
22 Alazug ka m yɛti ya ye,
Wina'am sariakadib daar la,
li na tɔi tisi ya gaad Taya nɛ Sidon dim la.
23 Nɛ yanam Kapeenum dima,
ya bɔɔd ye ya dʋ'ʋsi ya mɛŋ arezana nii?
Ya na sig kum zin'igin.
Tʋʋmnyalima linɛ ka m tʋm ya san'an nwa ya'a da tʋmin Sodom teŋin li naan kpɛn bɛɛn paae zina nwa.
24 M yɛti ya ye Wina'am sariakadib daar la,
li na tɔi tisi yaa gaad Sodom dim.”
Yesu pa'an Ba' la nɛ Biig la yɛla
25 Saŋkan la ka Yesu da yɛl Wina'am ye,
“M Ba' onɛ an arezana nɛ dunia Zugsɔba,
m pʋ'ʋsif nɛ fʋn su'ad yɛla nwa ka ya'am dim nɛ baŋidib kʋ baŋi li gbin la,
amaa fʋ kɛ ka biis baŋi li.
26 Ɛɛn m Ba',
li anɛ fʋ mɛŋ ya'am bɔɔdim.”
27 Ka Yesu yɛl nidib la ye,
“M Ba' pʋn tisim si'el wʋsa.
Sɔ' zi' Biig laa,
asɛɛ Ba' la.
Ka sɔ' mɛ zi' Ba' laa,
asɛɛ Biig la nɛ ban ka Biig la bɔɔd ye o nie o Ba' la pa'ali ba la.
Yesu buol nidib o san'an ye ba nyɛ vʋ'ʋsʋm