Zugsɔb la Pʋ'ʋsim Yir zun'or
132
1 O Zugsɔba, tiɛnm David yɛlanɛ mugusʋg linɛ wʋsa paae o la.
2 O zi'el nɔɔri tis Zugsɔb la
ka pɔɔ zi'el onɛ an Jakob Paŋtita'ar Sɔb la ye,
3 “M kʋ kpɛn' m yin
bɛɛ digini m sɔŋinɛ.
4 M nini kʋ maligim zɛɛg gbɛɛm,
bɛɛ gbɛn'um nyaŋi m nini ka li umm,
5 hali nɛ man na ti nyɛ zin'igi tis Zugsɔb la;
zin'ikanɛ an Jakob Paŋtita'ar Sɔb din la.”
6 Ti wʋmi li yɛla Efirata teŋin,
ka nyɛɛ li Jaar sʋ'ʋlimin, ka yɛl ye,
7 “Kɛlli ka ti keŋ o bɛllim zin'igin la;
ka paae o na'am gbauŋ la tuonnɛ zun'e o.
8 Duom, O Zugsɔba, kemi fʋ vʋ'ʋsʋm zin'igin la na,
fʋn nɛ fʋ Nɔnaar Daka linɛ aan fʋ paŋ zanbin la.
9 Kɛl ka fʋ maanmaannib la yɛ pʋpielim wʋʋ fuugnɛ;
ka fʋ tʋmtʋmnib la yʋ'ʋm nɛ sumalisim.”
10 David onɛ da aan fʋ tʋmtʋm la zug,
da zan'asi ti na'ab
onɛ ka fʋ bu'oe malʋŋ kpaam niŋ o la.
11 Zugsɔb la pɔɔ zi'el David
ka kʋ yii o nɔpɔɔr la nya'aŋa. O yɛl ye,
“Fʋ mɛŋ yaas la yinne
ka m na zin'ili fʋ na'am gbauŋ la zug.
12 Fʋ biis la ya'a dɔlisidi m nɔnaar la
nɛ zi'ela banɛ ka m pa'ali ba la,
ba biis na zin'inɛ fʋ na'am gbauŋ la zug
saŋa linɛ ka' bɛnnɛ.”
13 Zugsɔb la gaŋ Zion Zuor la,
o bɔɔd ye li an o bɛllim zin'ig, ka yɛl ye,
14 “M vʋ'ʋsʋm zin'igi nwa saŋa linɛ ka' bɛnnɛ;
kpɛla ka m na zin' m na'am gbauŋ zug,
bɔzugɔ mam mɛŋi bɔɔdi li.
15 M na tis teŋ la bareka ka li na mɔr la'ad bɛdegʋ.
M na kɛ ka nɔŋ dim la dii tig.
16 M na kɛ ka o maanmaannib la yɛ faangir wʋʋ fuug nɛ,
ka o tʋmtʋmnib la na yʋ'ʋm nɛ sumalisim saŋa wʋsa.
17 Kpɛla ka m na kɛ ka na'atita'ar yi David gbinnin na,
ka kɛ ka man gaŋ sɔ' la nie wʋʋ bugum nɛ.
18 M na kɛ ka nyan dii o dataas,
ka o na'am la na bɛ saŋa wʋsa.”