Jew dim paam paŋ
9
1 Nwadkanɛ paasid pii nɛ ayi' ka ba buon Ada la, li dabisa pii nɛ atan' la daar, ka ba da ye ba nɔk Na'ab la tis nɔsi'a la tʋm. Daakan la Jew dim la dataas la da tɛn'ɛs ye ba na nyaŋi ba, amaa li da tulig nɛ ka Jew dim la lɛɛ nyaŋi ba dataas la. 2 Jew dim la da la'as taaba ban bɛ zin'isi'a wʋsa Na'ab Zeesis sʋ'ʋlimin la ye ba zab nɛ banɛ mɔɔdi ba san'auŋ yɛla la, sɔ' kae da nyaŋi zi'en nɛ ba, bɔzugɔ buudi la wʋsa da zɔti ba nɛ. 3 Nimbɛda banɛ da bɛ teŋin la wʋsa, nɛ Gɔmenanam nɛ tuongatib nɛ na'ayir kpɛɛmnam la wʋsa da kpɛn'ɛd nɛ Jew dim la zug, bɔzugɔ ba wʋsa da zɔti Modekaya dabiem. 4 Modekaya yʋ'ʋn da lieb nintita'ar na'ayin la, ka o yʋ'ʋr tiig teŋ la wʋsa, ka o paŋ paasid daar wʋsa.5 Jew dim la da san'am ka kʋʋ ba dataas la wʋsa nɛ sʋ'ʋg, ka maal banɛ kisi ba la wʋsa ban bɔɔd si'em. 6 Susa tempʋʋgin la, Jew dim la da kʋ dap kɔbisnu. 7 Ba mɛ da kʋ Pasandata nɛ Dalifon nɛ Asipata, 8 nɛ Porata nɛ Adalia nɛ Aridata, 9 nɛ Parimasita nɛ Arisai nɛ Aridaae nɛ Vaae-zata, 10 banɛ an Haman biis piiga, Haman onɛ da an Jew dim la dataa, ka o saam an Hamedata la. Amaa ka lɛɛ pʋ nɔki ba nu'ugʋ si'isi ba la'adɛ.
11 Banɛ da kpi Susa tempʋʋgin la, ba da yɛl Na'ab la daakan nɔɔ. 12 Na'ab la da yɛl Na'apu'a Esta ye, “Jew dim la kʋ dap kɔbisnu nɛ Haman biis piiga Susa tempʋʋgin la. Ka ba yʋ'ʋn maal wala sʋ'ʋlim bama la ni? Nannanna fʋ bɔɔdim an bɔ? Sɔsim ka fʋ na nyɛ. Bɔ ka fʋ bɔɔd ye m lɛm maali tisi fɔ? Yɛlim ka m na maali tisif.” 13 Esta da lɛbis ye, “Naa, Na'aba, fʋ ya'a na siak, fʋn tisim Jew dim banɛ bɛ Susa la nɔɔr ka bɛog ba saa na tʋm wʋʋ ban pa'a tʋm kpɛla zina si'em la, ka yul Haman biis piiga la daba'ada la zug.” 14 Na'ab la da tis nɔɔr ye ba sid niŋ ala, ka ba da bas nɔɔr la Susa teŋin. Ka ba ya'al Haman biis piiga la daba'ada la zug. 15 Jew dim banɛ bɛ Susa teŋin la da la'as Ada nwadig la dabisa pii nɛ anaasi daare kʋ dap kɔbistan' amaa ka pʋ nɔki ba nu'ugi si'isi ba laukɔ.
16 Jew dim banɛ da kpɛlim Na'ab la sʋ'ʋlimin la da la'asi gu' ba mɛŋ ka nyɛ vʋ'ʋsʋm ba dataas la ni. Ba da kʋ nidib tusa pisyɔpɔi nɛ anu (75,000) amaa ka lɛɛ pʋ nɔki ba nu'ugʋ si'isi ba laukɔ. 17 Nɛ'ɛŋa da niŋnɛ Ada nwadig la dabis pii nɛ atan' daar, ka dabis pii nɛ anaasi daar la ka ba nɔki vʋ'ʋs ka li an diib nɛ di'ema dabisir.
Purim Di'ema Malʋŋ
18 Jew dim banɛ da bɛ Susa la on da la'as taaba nɛ dabis pii nɛ atan' nɛ pii nɛ anaasi la daar ka nɔk dabis pii nɛ anu daar la vʋ'ʋs ka li an diib nɛ di'ema daar.
19 Linɛ kɛ ka Jew dim banɛ bɛ teŋkpɛmis la nɔk Ada nwadig la dabis pii nɛ anaasi daar ka li an sumalisim nɛ diib dabisir nɛ dabiskanɛ ka ba tisid taaba piini.
20 Modekaya da sɔb bʋmbama digil ka tɔlim gbana tis Jew dim banɛ bɛ Na'ab Zeesis teŋin la wʋsa, banɛ bɛ yamma bɛɛ lalli, 21 ye o kɛ ka ba nɔk Ada nwadig dabis pii nɛ anaasi nɛ pii nɛ anu daar la wʋsa ka li an di'ema dabisa tisi ba, 22 pa'an saŋa kanɛ ka Jew dim la paam yɔlisim yii ba dataas nu'usin la, nɛ nwadkanɛ ka ba sʋnsa'aŋ lieb sumalisim, ka ba kukuma lieb la'ad. O da sɔbi tisi ba ye ba mɔ ka dabisban la, ba na dit ka maan sumalisim ka tisid taaba diib ka tisid nɔŋ dim piini.
23 Jew dim la siak ye ba na maan ala saŋa wʋsa wʋʋ ban pin'il si'em la, ka tʋm wʋʋ Modekaya n sɔb si'em tisi ba la. 24 Bɔzugɔ Haman onɛ saamme an Hamedata ka o an Agag buudi ka an Jew dim dataa la da gban'e bɛ'ɛd ka maal pur linɛ an bʋgʋlʋm-bʋgʋlʋm ye o baŋ dabiskanɛ ka na san'am Jew dim la. 25 Amaa Esta da keŋ Na'ab la san'an la, Na'ab la da tis nɔɔr ye gban'abɛ'ɛd kanɛ ka Haman gban'e Jew dim la yɛla la na lɛb o mɛŋ zugin, ka ye on nɛ o biis la, ba na yuli ba nɛ dabanɛ ka o ba'a la zug. 26 Dinzug ba da buon dabisban ye, Purim ka li yinɛ pian'ʋk kanɛ ka ba buon pur la ni na. Bʋn linɛ wʋsa sɔb gbauŋʋn la nɛ ban nyɛ si'el nɛ linɛ maal la zug 27 ka Jew dim la da gban'e ye ba na kɛ ka li liebi ba malʋŋ ka ban nɛ ba biis nɛ banɛ bɛ nɛ ba na tiɛnd dabisbama ayi' la yɛla yʋʋm wʋsa ka da gʋ'ʋŋɛ. Ba na maannɛ li ka li dɔlli li suor nɛ saŋa kanɛ nar ye li maal la. 28 Dabisbama nar ye zʋmaaŋ wʋsa nɛ yir wʋsa nɛ sʋ'ʋlim nɛ tempʋʋg wʋsa tiɛndi li yɛla. Purim dabisa nwa nar ye Jew dim wʋsa maal di'ema li daar, ka da vi' bɛɛ kɛ ka li yɛla kpi ba yaas san'anɛ.
29 Alazug Na'apu'a Esta onɛ an Abihel biig la nɛ Modekaya onɛ an Jew nid la da sɔb nɛ kpi'euŋʋ paas gbauŋ kanɛ paasida ayi' la zaŋi ken Purim la yɛla. 30 Modekaya da tɔlim gbana la tis Jew dim banɛ bɛ Na'ab Zeesis sʋ'ʋlim tɛɛns kɔbiga nɛ pisi nɛ ayɔpɔi (127) la ni wʋsa. Linɛ da sɔb gbauŋʋn la da anɛ pian'asʋma ka yɛt ye ba zi'e ba nya'aŋ. 31 Ka ye ba mɔɔm ka Purim dabisa la zi'en wʋʋ lin nar si'em ka dɔl wʋʋ Modekaya onɛ an Jew nid la nɛ Na'apu'a Esta gban'e si'em tisi ba la, nɛ ban zi'eli li si'em tisi ba mɛŋ nɛ ba yaas dɔl wʋʋ saŋa kanɛ ka ba lɔɔd nɔɔr ka maan sʋnsa'aŋ la. 32 Esta gban'ar la da kɛ ka Purim malima la zi'en, ka ba sɔbi li niŋ gbana nii digil.