Esta sɔs na'ab la sʋŋir
5
1 Daba atan' la nya'aŋ, Esta da yɛɛ o na'am fuugʋ kpɛn' na'ayir la pʋʋgʋ zi'en Na'ab la zɔŋ za'anɔɔr tuon. Na'ab la da zin' nɛ o na'am gbauŋ zug dɔɔg la pʋʋgin ka o nindaa kpa' zɔŋ la za'anɔɔr la. 2 On da nyɛ Esta ka o zi'e zakin la, Na'ab la ya'am da kpɛn' o ka o ziank o sanlima dansaar linɛ ka o zanl la tiel o san'an na. Ka Esta paae o tuonnɛ si'isi li zug la.3 Na'ab la da bu'os ye, “Esta, yɛlim fʋn bɔɔd si'el? Hali baa li zem nɛ m sʋ'ʋlim la pʋsʋkɔ, m na tisif.” 4 Ka Esta lɛbis o ye, “Naa, Na'aba, fʋ ya'a na siakin, fʋn nɛ Haman naan kɛɛn na di dikanɛ ka m maal ye m tisif la.” 5 Ka Na'ab la yɛl ye, “Mɔri Haman tɔ'ɔtɔ na ka ti niŋ Esta bɔɔd si'el la.”
Dinzug Na'ab la nɛ Haman da keŋ ye ba di dikanɛ ka Esta maal la. 6 Ban da bɛɛ ani nuud daam la, ka Na'ab la maligim yɛl Esta ye, “Yʋ'ʋn yɛlimim fʋn bɔɔd ye m maal si'eli tisif, ka m na maal. Bɔ kimm ka fʋ bɔɔda? Hali baa fʋn bɔɔd si'el la ya'a zem nɛ m sʋ'ʋlim la pʋsʋk m na tisif.” 7 Esta da lɛbis ye, “M sɔsʋg nɛ man bɔɔd si'el la anɛ anwa: 8 Naa, Na'aba, fʋ ya'a sid nɔŋim yɛla ka mɛ sid na maal man bɔɔd si'eli tisim, fʋn nɛ Haman kem bɛog na di dikanɛ ka m ye m maali tisi ya la. Ka m saa na gandig fʋn bu'osid man bɔɔd si'el la yɛla.”
Haman sʋnf duoe nɛ Modekaya
9 Haman da yina ka o sʋnf ma'ae nɛ hali. Amaa on da nyɛ Modekaya ka o zi'e Na'ab la za'anɔɔrin ka pʋ duoe zi'en ka kirid nɛ dabiem on Haman tuon la, o sʋnf da duoe nɛ Modekaya hali pamm. 10 La'am nɛ wala, Haman da nyaŋi gban'e o mɛŋ ka yii kul.
Ka buol o zuanamɛ la'as nɛ o pu'a onɛ yʋ'ʋri buon Zeres la, 11 ka nwɛ'ɛd nyɔ'ɔg nɛ on mɔr arezak si'em nɛ o biisi zem si'em nɛ Na'ab la na'asid o si'em ka tis o kpɛuŋʋ gaad o taaba banɛ wʋsa bɛ na'ayin la. 12 Haman da lɛn yɛli ba ye, “Ka' lin ma'aanɛ, man ma'aa ka Na'ab pu'a Esta buoli paas Na'ab la zug ka ti keŋ di dikanɛ ka o maali tis Na'ab la, ka lɛm buol man nɛ Na'ab la bɛog ya'as. 13 Amaa nɛ' wʋsa pʋ niŋim malisim, man nyɛ ka Modekaya zin' Na'ab la za'anɔɔr tuon la.” 14 Ka o pu'a nɛ o zuanam la wʋsa yɛl o ye, “Kɛl ka ba sɛ dabanɛ wa'am hali ka ba mɔri yun nidibi kʋʋd la, ka bɛog bɛkɛung ka fʋ saa sɔs Na'ab la ka o kɛ ka ba yul Modekaya ani n kʋʋ o. Ka fʋ nyaan dɔl Na'ab la keŋ di diib la ka li malisif.” Sa'al kaŋa da kpɛn' o kpakin ka o kɛ ka ba sɛ daad la.