Esta lieb na'apu'a
2
1 Lina nya'aŋ, Na'ab Zeesis sʋnfʋ yʋ'ʋn da ma'ae la, o da tiɛn Vasiti n da maal si'el nɛ on gban'e si'el o yɛla. 2 O na'ayikpɛm banɛ da sa'an o la da yɛl ye, “Naa, kɛl ka ba iee paam pu'asadbanɛ zi' dau na tisif. 3 Kɛl ka Na'ab gaans kpɛɛmnam zin'ig wʋsa ka ba zi'en o nɔba zugʋ gaans pu'asadvɛnla mɔri kɛn Susa teŋin na. Naa, kɛl ka fʋ tʋmtʋm onɛ ka ba fuo o ka o yʋ'ʋr buon Hegai ka o gur pu'ab la sʋ'oe ba ka gɔti ba vɛnlim yɛla. 4 Ka kɛ ka pu'asadir kanɛ ka Na'ab ya'am kpɛn' la di'e Vasiti zin'igi lieb na'apu'a.” Sa'al kaŋa da malis Na'ab la ka o sid da niŋ ala.5 Saŋkan la ka Jew nid da bɛ Susa teŋin, ka o yʋ'ʋr buon Modekaya, ka o saam yʋ'ʋr buon Jair ka o yaanam an Simie nɛ Kis. O da anɛ Benjamin dɔɔg nid. 6 Babilon Na'ab Nebukadnɛza da gban'e Juda Na'ab Jehoyakim nɛ o nidibi yi Jerusalem kena maali ba yammis la, o da anɛ ba nid yinne. 7 Modekaya saam pitʋ biig da bɛɛ o san'an, ka o da ugus o bɔzugɔ o da ka' saam bɛɛ maa. O da anɛ bipuŋ ka o yʋ'ʋr buon Hadasaa bɛɛ Esta. O da anɛ onɛ vɛnl ka o zi'esim an sʋ'ʋŋa. O ma nɛ o saam da kpinɛ ka Modekaya nɔk o maal o mɛŋ biig.
8 Ban da mɔɔl Na'ab la tɔlʋŋ zin'ig wʋsa la, ba da mɔr pu'asada bɛdegʋ kɛn Susa teŋin na ka Hegai guri ba. Ba mɛ da mɔr Esta n kɛn Na'ab la yin na mɛ gu'ul Hegai onɛ da gur zin'ikanɛ ka pu'ab la'asi bɛ la. 9 O nini da tig Esta ka o bɔɔd o yɛla hali. Linzug o da bɔ duorim la'adi tis o, nɛ disʋma linɛ bɛɛ li kɔn'. O da gaans bipumis ayɔpɔi yi na'ayin la ye ba gɔsid o yɛla, ka nɔk on nɛ o tʋmtʋm bipumis la bɛ zin'isi'a la tɔɔm niŋ zin'isʋŋin.
10 Esta da pʋ pa'al o buudi nɛ o tuŋʋ bɔzugɔ, Modekaya da pʋ siak ye o niŋ alaa. 11 Daar wʋsa Modekaya da kaalim pu'ab la bɛ zin'isi'a la gɔsid Esta an si'em nɛ ban maan o si'em.
12 Pu'asadir ya'a na kpɛn' Na'ab Zeesis san'an, asɛɛ ka ba dɛŋin nɔk nwadis pii nɛ ayi' maal o ka o vɛnl wʋʋ ban pa'al si'em la. Ba na zaŋ nwadis ayuobʋ suoɛn o kpaam nɛ tiim linɛ ka ba buon mir la, ka lɛn nɔk nwadis ayuobʋ kanɛ kpɛlim la niŋ o tudaari nɛ li buudi wʋsa. 13 Pu'asadir ya'a da ye o yi pu'asada la bɛ zin'isi'a la kpɛn' Na'ab la san'an ka yɛl ye o bɔɔd si'el wʋsa, ba nɔkid nɛ tisid o ka o mɔri ken Na'ab la dɔɔgin. 14 O ɛɛnti kpɛn' nɛ Na'ab la san'an zaam, ka lɛb bɛkɛung na tɔɔm zin'isi'a pu'ab la zin'igin la, ka kpɛm bɛ Saasgas onɛ ka ba fuo o ka o gɔt pu'abibis la nu'ugin. Pu'asadir la kʋ lɛn lɛb Na'ab la san'anɛ ya'a ka' o ya'am ti lɛb o san'an ka o buol o yʋ'ʋr ye ba mɔr o naa.
15 Saŋa da paae ye Esta (pu'asadir kanɛ an Abihel biig ka lɛn an Modekaya taʋn bil onɛ ka o da nɔk o gɔt la) keŋ Na'ab la san'an, o da pʋ sɔs si'eli gaad linɛ ka Hegai onɛ da guri ba la da pa'al ye o mɔri keŋ la. Banɛ da nyɛ Esta la wʋsa ya'am da kpɛn' o nɛ. 16 Ba da mɔr o kɛn Na'ab Zeesis san'an na, o na'am la yʋma ayɔpɔi saŋa li nwadis piiga linɛ ka ba buon Tebɛf la ni.
17 Na'ab la ya'am da kpɛn' Esta gaad pu'ab la wʋsa, ka o zug di Na'ab la gat pu'asada banɛ kpɛlim la wʋsa. Ka o nɔk na'am zupibigi pid o zug ka faaɛn Vasiti na'am la diis o. 18 Ka Na'ab la maal diib bɛdegʋ Esta na'am diib yɛla tis nidib la wʋsa, la'am nɛ o ya'am dim nɛ o kpɛɛmnam la wʋsa. O da mɔɔl vʋ'ʋsʋm dabisire tis o sʋ'ʋlim nidib la wʋsa ka tis nidib la piinsʋma bɛdegʋ.
Modekaya tilig na'ab la nyɔɔr
19 Ban da lɛn la'as pu'asada la, Modekaya da zin'inɛ Na'ab la zɔŋŋin. 20 Amaa Esta da pʋ pa'al o buudi nɛ o tuŋ yɛla wʋʋ Modekaya da sa'al o si'em la, bɔzugɔ o da nan kpɛm mɔr sa'al kanɛ ka Modekaya da sa'al o wʋʋ on da nan ugus o saŋsi'a la.
21 Bigitana nɛ Teris da bɛɛ ani, ka an Na'ab la kpɛɛmnam banɛ gur za'anɔɔr linɛ kpɛn'ɛd la. Saŋa kanɛ ka Modekaya da zin' Na'ab la zɔŋŋin la, ba sʋnf da duoe hali ka ba gban'e ye ba kʋ Na'ab Zeesis. 22 Modekaya da wʋm ban gban'e si'em la ka yɛl Esta, ka on mɛ nɔki yɛl Na'ab la, ka li kɛ ka Modekaya paam yʋ'ʋr. 23 Ka ban da vɛɛnsi nyɛ ka li an sida la, ba da yul nidiba ayi' la nɛ nwiisi kʋ. Nɛ'ɛŋa wʋsa da sɔbi niŋ Na'anam Labaya Gbana la ni Na'ab la nini ni.