Ezra
Na'ab Sarus bas Israel dim ka ba lɛbi ba teŋin
1
1-2 Pesia na'ab Sarus n da di na'am yʋʋm si'a la, o da kɛ ka ba mɔɔli tis Pesia teŋ dim wʋsa ka mɛ sɔbi li digil ye,Pesia na'ab Sarus n yɛl si'eli nwa ye,
Zugsɔb onɛ an Arezana Wina'am la tisim dunia sʋ'ʋlim wʋsa, ka gaŋim ye m mɛ' o Pʋ'ʋsim Yir Jerusalem tempʋʋgin linɛ bɛ Juda sʋ'ʋlimin la.
Zugsɔb la da si'is Na'ab Sarus sʋnf ye o sɔbi li. Nɛ'ɛŋa da niŋnɛ ye li kɛ ka Jeremia da di'e Wina'am pian'adi pian' la niŋi amɛŋa.
Ka Sarus da lɛn sɔbi pɛ'ɛs ye,
3 Yanam banɛ an Zugsɔb nidib ka siaki ye ya na lɛb Jerusalem dinɛ bɛ Juda mɛ' Israel Wina'am yir la, kemi ka ya Wina'am la na bɛ nɛ ya. 4 Ka Israel nimbanɛ nam bɛ zin'isi'a wʋsa ka kʋ keŋi, bam mɔr anzurifa nɛ sanlima nɛ bʋnkɔnbid nɛ la'ad na tisi ya, ka mɛ tisi ya linɛ na maal ya'amlɛog maan Wina'am yin dinɛ bɛ Jerusalem la.
5 Ka Juda nɛ Benjamin kpɛɛmnam nɛ maanmaannib nɛ Levi dim nɛ banɛ wʋsa ka Wina'am si'isi ba sʋnf da ti'eb ye ba keŋ Jerusalem mɛ' Zugsɔb yir la.
6 Ka banɛ kpɛlim la wʋsa sid da sʋŋi ba nɛ sanlima nɛ anzurifa nɛ la'asieba nɛ bʋnkɔnbid nɛ piinsʋma, la'am nɛ ba ya'amlɛog piini. 7 Dinɛ lɛm paas la, Na'ab Sarus da yis la'abanɛ ka Nebukadnɛza da faaɛn Wina'am Pʋ'ʋsim Yin Jerusalem ka zii kuli kpɛn'ɛsi o mɛŋ win dɔɔgin la. 8 O da kɛ ka Mitredaf onɛ aan o ligidgur la mɔr la'ad la na kaali tis Siesibaza onɛ an Juda na'abiig la. 9 La'ad la kalli nwa: sanlima laas pistan' nɛ anzurifa laas tusir nɛ anzurifa labɛda pisi nɛ awai 10 nɛ sanlima kurubanam pistan' nɛ anzurifa kurubanam banɛ nwɛnɛ taaba kɔbisnaasi nɛ piiga nɛ la'asieba tusir.
11 Sanlima nɛ anzurifa la'ad la wʋsa da la'as nɛ tusa anu nɛ kɔbisnaasi (5,400).
Siesibaza da mɔr la'abama dɔl nimbanɛ ka ba da gban'e ba keŋ Babilon la lɛb Jerusalem na.