21
पुना मेर्ख़ा अरा पुना ख़ॆख़ेल
1 फेन ऎन पुना मेर्ख़ा अरा पुना ख़ॆख़लन ईरकन, पच्चा मेर्ख़ा अरा पच्चा ख़ॆख़ेल गा छप मंजा केरा, अरा समुदर हूँ गुछरा केरा।† 2 फेन ऎन नेम्हा नगरे पुना येरुसलॆमन धर्मेस तरती मेर्ख़ा ती एत्तना ईरकन। आद तंग्है मॆतस गे सिंगरारकी झबरारकी र'अना ओन्टा बेंजा पेल्लो बेसे सपड़ारकी रहचा।†
3 फेन ऎन बॆल-गदिया ती एन्ने ब'अना ओन्टा जॊरसरिया ब'अनन मेजकन,† “ऎरा, अक्कुन धर्मेसी डेरा आलर मझी नू र'ई। आस आर ही गने डेरा ननोस अरा अबड़र आसी आलर मनोर। अरा धर्मेस तानिम आर ही गने र'ओस ती आर ही धर्मे मनोस। 4 अरा आस आर ही ख़न्न ती उर्मी ख़ंजलख़ोन चींचोस। अरा अक्कु ती खे'अना मल मनो, अरा ख़ोदख़ोरना मलता ओलख़ना मलता नुंजना मल र'ओ, एन्देरगेका पच्चा कत्था गुट्ठी गुछरा केरा।”†
5 फेन बॆल-गदिया नू उक्काचस आस बाचस, “ऎरा, ऎन उर्मिन पुना नन्दन चि'अदन।” फेन आस बाचस, “इदन लिख'आ, इवंगेका इबड़ा कत्था गुट्ठी पत्त'अना जॊगे अरा मानिम र'ई।” 6 आस अउरिम एंगन बाचस, “इबड़ा उर्मी कत्था गुट्ठी मंज ख़च्चकी र'ई। ऎन अल्फा अरा ओमेगा, ऒरे अरा छेद्दे हिकदन। ऎन ओनक'आरिन उज्जना अम्मु ही पझरा ती सिथिया ओन्त'ओन।† 7 नॆ मलदौ ही मइय्याँ जीत ख़क्खोस आस इबड़ा उर्मी आसीसन ख़क्खोस, अरा ऎन आसी धर्मे मनोन, अरा आस एंग्है ख़द्द मनोस।† 8 लिकिन इल्चुर, अरा मल पत्त'उर, अरा कदरहर, अरा आल पिटुर, अरा पेहरन ही सोतरा नलख ननुर, अरा टोनहर, अरा मूर्तिन ऒड़ लग्गुर अरा उर्मी ठकवा आलर ही अड्डा गन्धक लघरना चिच्ची ही समुदर हवे। ईद दुसर खे'अना हवे।”
पुना येरुसलॆम
9 फेन सात गोटा डुबहा नू सात गोटा छेद्दे सस्तिन निंदका उइय्का सात गोटा मेर्ख़ा पैकर ती ओर्तोस एंग्है गुसन बरचस ती एन्ने बाचस, “बरा, ऎन निंगन भेंडो ख़द्दस गे मुक्का मन्ना बेंजा पेल्लोन ऎद'ओन चि'ओन।” 10 औंगे ऎन धर्मेसी बॊलतासी सवंग ही तबे मंजकन, अरा आ मेर्ख़ा पैकस एंगन ओन्टा कोहाँ अरा मेच्छा परता नू चॊदस होच्चस। अरा आस नेम्हा नगरे येरुसलॆमन मेर्ख़ा ती धर्मेस गुसते एत्तना ऎदस।† 11 आद धर्मेसी महबा ती बिल्चिया, अरा अदही लौकारना कोड़हे दामी पखना लेक्खा अरा यसब ही लेक्खा रहचा अरा बिल्लौर लेक्खा फरी रहचा। 12-13 अरा अदही चरियो तरा कोहाँ अरा मेच्छा पचरी रहचा। अरा अदही पुरुब तरा तीन गोटा बली, उत्तर तरा तीन गोटा बली, दखिन तरा तीन गोटा बली, पच्छिम तरा तीन गोटा बली अन्नु बारा गोटा बली रहचा। अरा उर्मी बली ही मुन्दहारे ओन्टा ओन्टा मेर्ख़ा पैकस इज्जका रहचस। अरा बली गुट्ठी नू इस्राऎलर ही बारा गोतरर ही नामे लिख्रकी रहचा।† 14 अरा नगरे ही पचरी बारा गोट नेव पखना ही मइय्याँ कम्रकी रहचा, अरा अबड़ा नू भेंडो ख़द्द मसीसी बारा तइरकर ही नामे लिख्रकी रहचा।
15 अरा एका मेर्ख़ा पैकस एंग्है गने कछनख्र'आ लगियस, आसी गुसन नगरेन अरा अदही बली गुट्ठिन अरा पचरिन नप'आ गे ख़ेक्खा नू ओन्टा सोना ही डाँग रहचा।† 16 अरा आ नगरे चरखुट्टा उकुरकी रहचा, अरा अदही दिगहा चकड़ ओन्टम रहचा। अरा आस आ नगरेन आ डाँग ती नपचस ख़ने, बाईस सौ किलो मीट्टर दिगहा ख़क्खियस, अरा अदही दिगहा चकड़ अरा मेच्छा ओंटम रहचा। 17 फेन आस अदही पचरिन ख़ोज्जस ख़ने, आद पैसट मीटर मेच्छा रहचा। आलर बउरना नाप आबोन दिम आ मेर्ख़ा पैकस हूँ बउराचस। 18 अरा आ नगरे ही पचरी यसब ही कम्रकी रहचा, अरा नगरे अरगा सोना ही कम्रकी रहचा, एकदा झक झकर'आ काँच लेक्खा रहचा।† 19 अरा आ नगरे ही पचरी ही नेव गुट्ठी उर्मी रकम ही कोड़हे दामी पखना ती सिंगरारकी रहचा। पहिल नेव यसब ही रहचा, दोसरा नेव मड़ी ही रहचा, तिसर नेव लालड़ी ही रहचा, चौथा नेव मरकत ही रहचा, 20 पंचे नेव गोमेदक ही रहचा, छौवे नेव मानिक ही रहचा, सत्ते नेव पीत मड़ी ही रहचा, आठे नेव पेरोज ही रहचा, नौए नेव पुखराज ही रहचा, दसवाँ नेव लहसनिया ही रहचा, ग्यारवाँ नेव धुमर ही रहचा, बारवाँ नेव याकूत ही रहचा। 21 अरा बारा बली बारा मोती ही रहचा, ओन्टा ओन्टा बली ओन्टा ओन्टा मोती ही रहचा। अरा नगरे ही सड़क झक झकर'आ काँच लेक्खा अरगा सोना ही रहचा।
22 अरा ऎन आ नगरे नू मन्दिर मल ईरकन, एन्देरगेका उर्मी ती सवंगिय धर्मे उर्बस अरा भेंडो ख़द्द मसीस अदही मन्दिर हिकनर। 23 अरा आ नगरे नू बिल्ली चि'आ गे बीड़ी महले चन्दो ही चाड़ मलकी, एन्देरगेका धर्मेसी महबा दिम अदिन बिल्चत'ई चि'ई, अरा भेंडो ख़द्द मसीस अदही बिल्ली र'अदस।† 24 अरा उर्मी जाती जाती ता आलर अदही बिल्ली नू कुद्दोर नुंगोर, अरा ख़ॆख़ेल ता बॆलर तम्है खुर्जिन धर्मेसिन मईन नना गे अइय्या ओन्द्र'ओर।† 25 अरा आ नगरे ही बली गुट्ठी उल्ला ही छेद्द नू मल मुचुर'ओ, एन्देरगेका असन माख़ा मल मनी।† 26 अरा जाती जाती ता आलर तम्है खुर्जिन धर्मेसिन मईन नना गे आ नगरे नू ओन्द्र'ओर। 27 अरा अइय्या एकअम सोतबोड़'आ आलॊ मल कोर'ओ, अरा घिनघिना नलख ननू आलर अरा ठकवा कत्था कम'ऊ आलर अइय्या मल कोर'ओर। लिकिन नॆख'आ नामे भेंडो ख़द्दासी उज्जना ही पुथी नू लिख्रकी र'ई, आर लेका आ नगरे नू कोर'ओर।†