यॊहन तइरकासी तिसर चिठी
1
परिछ'अना
1 ई चिठी ऎन यॊहन सेयान आलन तरती र'ई। ऎन इदन एंग्है दुलारो भईस गायोस गे लिखदन, नॆकन ऎन मानिम नू चोन्हा नन्दन।†
2 अना दुलारो, ऎन निंगा गे गोहरारदन का नीन उर्मी नू बने गने र'अन नेकअन। एकासे नीन बॊलता नू परदा लगदय, अन्नेम नीन कया नू परदा। 3 जोक्क मसी भईर बरचर ती नीन मानी आबोन पत्त'अना ती उज्जदय एन्ने निंग्है पत्त'अना जॊगे उज्जना ही पत्त नू गोवाह चिच्चर ख़ने, ऎन नगदे खुसमारकन। 4 एंग्है ख़द्द-ख़र्रर मानी नू उज्जा लगनर एन्ने मेन्ना ती नन्ना कोड़हे रिझ्रना एंगा मलकी।
संगे संगे नलख नन्ना
5 अना दुलारो, नीन निंग्है गुसन बरना मसी भईर गे नीन बलना आलर रहचका ती हूँ आर गे नीन नन्ना उर्मी नू पत्त'अना जॊगे र'अदय। 6 आर निंग्है चोन्हा ही पत्त नू इय्या ता कलीसिया ही मुन्दहारे गोवाह चिच्चर। धर्मेसिन खुसमारत'अना ही लेक्खा नीन अउरिम एन्ने आलर गे आर ही डहरे ऎकना नू संगरा नन्नुम र'अना र'ई। 7 एन्देरगेका आर मल पत्त'ऊ आलर ती इन्द्रिइम संगरा मल हो'अनर ती उर्बासी चड्डे उरखका र'अनर। 8 औंगे नाम एन्ने आलर गे संगरा नन्ना ही चाड़ र'ई। एकत्रु नाम मानिमन तेंगा कुद्दना नू आर ही गने संगे नलख ननू मना ओंग्दत।
9 ऎन कलीसिया गे इदही पत्त नू ओन्टा चिठी लिखचकन। लिकिन दियोत्रेफॆस आर ही मझी नू मुद्ध मना बिद्दियस ती एमन मल इंझ्रस। 10 औंगे ऎन असन बर'ओन होले, आस एन्देर नंजस अदही पत्त नू ऎन ओर्मर गे तेंगोन। आस मलदौ सोच ती एम्है पत्त नू मलदौ ब'अदस। इत्रु हूँ आसी जिया मल बोधर'ई। अइय्या बरना भईरिन हूँ मल परघ'अदस, अरा आरिन परघ'आ बेद्दुरिन हूँ छेंकदस, अरा एन्ने ननुरिन कलीसिया ती हूँ हिगड़'अदस।
11 अना दुलारो, नीन मलदौ आबोन मला दौ आबोन धर'आ। सुरता नना का, एका ओर्तस दौ नन्दस, आस तंग्है दौ नलख इदन ऎद्ददस का आस धर्मेसी ख़द्द र'अदस। अरा एका ओर्तस मलदौ नन्दस, आस तंग्है मलदौ नलख इदन ऎद्ददस का आस धर्मेसिन बलदस।
12 दॆमॆत्रियोसी पत्त नू ओर्मर बॆस गोवाह तेंगनर, अरा मानी हूँ आसी पत्त नू बॆस गोवाह चि'ई। अरा ऎम हूँ आसी पत्त नू बॆस गोवाह चि'अदम। अरा नीन अख़दय का एम्है गोवाह मानिम र'ई।
छेद्दे मोंजरा
13 एंगा निमा लिख'आ गे नगदे कत्था र'ई। लिकिन ऎन सियाही अरा फोलटेन ती निमा गे लिख'आ मल बेद्ददन। 14 एंगा असरा र'ई का, ऎन लॆम निंग्है गुसन बर'ओन ती ऎरोन। अरा नाम छम्हा छम्हें कछनख्र'आ ओंगोत। 15 निंगा गे कोड़े मनन नेकअन। इय्या ता निंग्है संगेर निंगन मोंजरा नन्नर। अरा अइय्या ता नम्है संगेर ओर्मर गे एंग्है मोंजरन नामे नामे ती तेंके।