4
बॊलता गुट्ठिन लखना
1 अना दुलारो, ई सौंसार नू नगदे बग्गे ठकवा धर्मेसी कत्था तिंगुर चॊचका र'अनर। औंगे नेम्हा बॊलतस ती ब'अदन ब'ऊ उर्मी आलारिन अमा पत्त'आ। लिकिन बिढ़'आ ती ऎरा का अबड़ा बॊलता गुट्ठी धर्मेस ती बरचका का मल्ली। 2 धर्मेसी बॊलतन ख़क्खका धर्मेसी कत्था तिंगुरिन नीम एकासे अख़'आ ओंग्दर का: ओर्त धर्मेसी कत्था तिंगुस येसु मसीस मानिम आल मंजस ती बरचस एन्ने तेंग्रदस होले, आस नू धर्मेसी बॊलतस र'अदस। 3 लिकिन ओर्तस तंगन धर्मेसी कत्था तिंगुस ब'अदस ती येसु मसीसी पत्त ता मानिमन मल तेंग्रदस होले, आस धर्मेस तरती मल र'अदस। बर'ओ एन्ने नीम मेंजका रहचका ठकवा मसीसी बॊलता ईदिम हिके। अक्कु आद ख़ॆख़ेल नू बरच ख़च्चकी र'ई।
4 अना ख़द्दारो, नीम धर्मेसी हिकदर, नीम अबड़ा ठकवा धर्मेसी कत्था तिंगुर ती जीत ख़क्खकादर। एन्देरगेका ई सौंसार नू र'ऊ बॊलता गुट्ठी ती निम्है नू र'ऊ नेम्हा बॊलतस कोहँस र'अदस। 5 आर सौंसार ता हिकनर, औंगे आर सौंसार ही पत्त ता कत्था गुट्ठिन कछनख्रनर, अरा सौंसार ता आलर आर ही कत्थन मेन्नर। 6 ऎम धर्मेसी हिकदम, अरा नॆ धर्मेसिन अख़दस आस एम्है कत्थन मेन्दस। अरा नॆ धर्मेसी मलदस आस एम्है कत्थन मेना मल बेद्ददस। नाम इत्रु तिम नॆ मानी ही बॊलतन ख़क्खकादर अरा नॆ बेहड़'अना ही बॊलतन ख़क्खकानर एन्ने लखदत हो'अदत।
धर्मेस चोन्हा हिकदस।
7 अना दुलारो, नाम ओर्त ओर्त गने चोन्हा नन्दत नेकअन। एन्देरगेका चोन्हा धर्मेस ती बर'ई। अरा एकास चोन्हा नन्दस आस धर्मेसी ख़द्द र'अदस, अरा धर्मेसिन अख़दस। 8 लिकिन एकास चोन्हा मल नन्दस, आस धर्मेसिन बलदस, एन्देरगेका धर्मेस चोन्हा हिकदस। 9 धर्मेस तंग्है ओन्टे लेका ख़द्दासिन ख़ॆख़ेल नू इदगे तइय्यस का नाम आसी ती जमनजुग उज्जनन ख़क्खा ओंग्दत। इत्रु धर्मेस नम्है मइय्याँ मंजका चोन्हन दहदर नंजस। 10 नाम धर्मेस मइय्याँ चोन्हा नंजका ती मला, आस नम्है मइय्याँ चोन्हा नंजका ती नम्है पाप गुट्ठिन ओथ्रना ही दाँड़े बेसे तंग्है ख़द्दासिन तइय्यस। ईदिम चोन्हा हवे।
11 अना दुलारो, धर्मेस ई लेक्खम नम्है मइय्याँ एन्ने कोड़हे चोन्हा नंजस होले, नाम हूँ ओर्त ओर्त गने चोन्हा नन्ना र'ई। 12 धर्मेसिन नॆ हूँ इकला हूँ मल्ला ईरका। लिकिन नाम ओर्त ओर्त गने चोन्हा नन्दत होले, धर्मेस नम्है नू बन्चकादस, अरा आसी चोन्हा नम्है नू बड़ियर मन्र'ई।†
13 धर्मेस तंग्है बॊलतासिन नमा गे चिच्कादस। इत्रुम नाम अख़दत का नाम आस नू बन्चकादत, अरा आस नम्है नू बन्चकादस। 14 अरा ऎम इदन ईरका रहचकम अरा इदही पत्त नू गोवाह चि'अदम का धर्मे बंगस तंग्दासिन ख़ॆख़ेल ही नाड़ुस बेसे तइय्कादस। 15 एका ओर्तस येसुस धर्मेसी ख़द्दस एन्ने तेंग्रदस, आस नू धर्मेस बन्चकादस, अरा आस हूँ धर्मेस नू बन्चकादस। 16 अरा धर्मेस नम्है मइय्याँ नंजका चोन्हन नाम अक्कादत अरा पत्ताचकादत। धर्मेस चोन्हा हिकदस। एकास चोन्हा नू बन्चकादस आस धर्मेस नू बन्चकादस, अरा धर्मेस हूँ आस नू बन्चकादस। 17 एन्ने नाम धर्मेस नू बन्चका र'अना अरा धर्मेस नम्है नू बन्चका र'अना ती नम्है चोन्हा बड़ियर मन'ओ क'ओ। औंगे नमा नेंवई उल्ला गे एल्चना मल मनो। एन्देरगेका ई ख़ॆख़ेल नू नम्है उज्जना मसीसी उज्जना लेक्खा र'ई। 18 चोन्हा नू एल्चना मल मनी, एन्देरगेका मानिम चोन्हा एल्चनन तरकूटी ननी चि'ई। दंडे गा ओर्तोसिन इल्चत'ई चि'ई। अरा नॆ तंग्है एल्चनर आर चोन्हा नू बड़ियर मल्ला मंजका।
19 नाम चोन्हा नन्दत एन्देरगेका मुन्द धर्मेस नमन चोन्हा नंजस। 20 एकअम ओर्तस “ऎन धर्मेसिन चोन्हा नन्दन” ब'अदस, लिकिन तंग्है संगे मसी भईसिन ख़ाँड़दस होले, आस ठक'उस र'अदस। एन्देरगेका तान ईरका तंग्है संगे मसी भईसिन चोन्हा मल ननुस, तान मल ईरका धर्मेसिन चोन्हा नना पोलदस। 21 एका ओर्तस धर्मेस गने चोन्हा नन्दस, आस गे तंग्है संगे मसी भईस गने हूँ चोन्हा नन्ना र'ई। ई पॆसकन दिम नाम धर्मेस ती ख़क्खकादत।