2
मसीस नम्है सहाड़ा
1 अना एंग्है ख़द्दारो, ऎन इदगे इदन निमा गे लिखदन का नीम पाप अम्बोर नना। लिकिन नेकईम पाप नन्दस होले, धर्मेस बबस गुसन नमा गे गोहरार'ऊ ओन्टा सहाड़ा ननू र'अस। आसिम येसु मसीस, अरा आस उजगो दिम र'अस। 2 अरा आसिम नम्है पाप गुट्ठिन ओथ्रना ही दाँड़े हिकदस, नम्है पाप गुट्ठिन लेका मला सौंसे ख़ॆख़ेल ता आलर ही पाप गुट्ठिन ओथ्रना दाँड़े हिकदस।
3 नाम धर्मेसी पॆसका गुट्ठिन पॆस्र'ओत होले, अत्रु नाम अक्ख ख़च्चोत का नाम आसिन अक्ख ख़च्चिका र'अदत। 4 एकअम ओर्तस ब'अदस का, “धर्मेसिन ऎन अख़दन,” लिकिन आस धर्मेसी पॆसका गुट्ठिन मल पॆस्रदस होले, आस ठक'उस र'अदस, अरा आस मानी लगे मल उज्जदस। 5 लिकिन एकास धर्मेसी कत्थन पॆस्रदस ती उज्जदस, आस ऎद्ददस का धर्मेस आसिन मानिम अरा बड़ियर लगे चोन्हा नन्दस। नाम धर्मेस नू र'अदत एन्ने ईद ती अख़दत। 6 औंगे एकास तान धर्मेस नू बन्चका र'अदन ब'अदस, आस येसुस एकासे नना लगियस अन्नेम तान हूँ उज्जना र'ई।
पुना पॆसका
7 अना दुलारो, ऎन निमन पुना पॆसकन मल लिखदन, लिकिन ऒड़ तिम निमा ख़क्ख्रका पच्चा पॆसकन दिम लिखदन। आ पच्चा पॆसका गा नीम मुन्द मेंजका कत्था दिम हवे।† 8 अन्नु हूँ एका पॆसकन ऎन अक्कुन लिखदन, आद पुना हवे। ई पॆसका ही मानिम मसीस नू अरा निम्है नू हूँ ईथ्र'ई, एन्देरगेका ऊख़ा तरकूटी मनाली अरा मानी बिल्ली अक्कु बिल्चाली।
9 एका ओर्तस तान बिल्ली नू र'अदन ब'अदस, लिकिन तंग्है संगे मसी भईसिन हींड़दस, आस अक्कु गूटी ऊख़ा नू र'अस। 10 एका ओर्तस तंग्है संगे मसी भईसिन चोन्हा नन्दस, आसिम बिल्ली नू र'अदस, अरा नन्नारिन मूड़त'अना एन्देर कत्था हूँ आस नू मलकी। 11 लिकिन एका ओर्तस तंग्है संगे मसी भईसिन हींड़दस, आस ऊख़ा नू र'अदस अरा ऊख़ा नू ऎकदस, अरा आस एसन कालदस अदिन बलदस, एन्देरगेका ऊख़ा आसिन अन्धहा नंजकी चिच्की र'ई।
12 अना चोन्हा ख़द्दारो, येसुसी नामे ती
निम्है पाप गुट्ठी छमा मन्तारका ती ऎन निमा लिखदन।
13 अना बंगारो! एकास ऒड़ तिम र'अस,
आसिन नीम अक्का र'अना ती ऎन निमा लिखदन।
अना जॊंख़ारो, मलदौ आबोन नन्त'उस सैतान मइय्याँ
नीम जीत ख़क्खका र'अना ती ऎन निमा लिखदन।
14 अना चोन्हा ख़द्दारो, नीम धर्मे बंगासिन
अक्का र'अना ती ऎन निमा लिखदन।
अना बंगारो, एकास ऒड़ तिम र'अस,
आसिन नीम अक्का र'अना ती ऎन निमा लिखदन।
अना जॊंख़ारो, नीम पत्त'अना नू बड़ियर र'अना ती,
अरा धर्मेसी कत्था निम्है जिया नू मड़चकी र'अना ती,
अरा मलदौ आबोन नन्त'उस सैतान मइय्याँ
नीम जीत ख़क्खका र'अना ती ऎन निमा लिखदन।
15 नीम ई ख़ॆख़ेल ती मलता ई ख़ॆख़ेल ता आलॊ गुट्ठी ती चोन्हा अमके नना। एकास ख़ॆख़ेल ती चोन्हा नन्दस आस नू धर्मे बंगासी चोन्हा मलकी। 16 एन्देरगेका ई ख़ॆख़ेल नू र'अना कया ही चिबाख़ारना अरा ख़न्न ही चिबाख़ारना अरा उज्जना ही खुर्जी गुट्ठी ही फुलई मन्ना इबड़ा उर्मी धर्मे बंगस ती मला, लिकिन ख़ॆख़ेल ती बर'ई। 17 ख़ॆख़ेल अरा अदही चिबाख़ारना आबो मुंजुर'ओ क'ओ। लिकिन धर्मेसी मनेन ननुस गा जनमजुग गे बन्चका र'ओस।
ठकवा मसीसी पत्त नू चिहुंक र'अना
18 अना ख़द्दारो, ईद छेद्द उल्ला हवे। नीम मेंजकादर का ठकवा मसीस बर'आ लगदस। अक्कु गूटी कैनो ठकवा मसीर चॊचकानर। इत्रु ती नाम अख़दत का छेद्दे बेड़ा अंड़सा ख़च्चकी र'ई। 19 आर नम्है कलीसिया गुट्ठी तिम उरखर, लिकिन मानी नू आर नम्है खोंड़हा ता मल रहचर। आर नम्है मधे ता आलर होले, नम्है गने बन्चका र'ओर दनेस। लिकिन आर नम्है ती उरखर केरर, इत्रु ती ईद फरी ईथर'ई का अबड़ा ओर्मर ती नॆ हूँ नम्है मधे ता मलनर।
20 लिकिन नीम गा मसीस तरती नेम्हा बॊलतासी पूरकसन ख़क्खादर, अरा नीम ओर्मर मानी आबोन अख़दर। 21 नीम मानी आबोन बलना ती मला, नीम मानी आबोन अख़ना ती, अरा एकअम ठकना मानी तरती मल बर'ई इदन नीम अख़ना ती दिम ऎन इदन निमा गे लिखदन। 22 ठकवा नॆ तंग्है? एकास येसुसिन मसी मलदस ब'अदस आसिम ठकवा हिकदस। अरा आसिम ठकवा मसी हिकदस। अरा आसिम धर्मे बंगासिन अरा ख़द्दासिन ख़ाँड़दस। 23 नॆ ख़द्दासिन मल हुकमारदस आस गुसन बंगस हूँ मल र'अदस, अरा नॆ ख़द्दासिन मनदस आसी गुसन बंगस हूँ र'अदस। 24 ऒड़ नू नीम एन्देर कत्था मेंजकर, आद निम्है नू बन्चकी र'अना र'ई। अरा एका कत्थन नीम ऒड़ नू मेंजकादर आद निम्है नू बन्चकी र'ई होले, नीम हूँ ख़द्दस अरा बंगस नू बन्चका र'ओर। 25 जनमजुग उज्जनन चि'ओन एन्ने आस नम्है गने गच्छरस, ईदिम आसी गच्छरना हवे।
26 नॆ निमन बेड़ाब'आ बेद्दनर, आर ही पत्त नू ऎन निमन इबड़ा कत्थन लिखचकादन। 27 लिकिन निमा गे नेम्हा बॊलतस ख़क्ख्रका र'अदस, आस निम्है नू र'अदस। औंगे एकअम आलर ही सिखाब'अना निमा गे चाड़ मलकी। निमा एन्द्रन अख़'आ गे चांड़ र'ई अबड़ा उर्मिन नेम्हा बॊलतस निमा गे सिखाब'अदस। आसी सिखाब'अना मानिम र'ई, ठकवा मल्ली। औंगे आसी सिखाब'अना लेक्खा नीम मसीस नू बन्चका र'आ।
नाम धर्मेसी ख़द्दत