2 पतरस 2

ठकवा सिखाब'अना ती चिहुंक

¹ इस्राऎल आलर ही मझी नू ठकवा धर्मेसी कत्था तिंगुर रहचर। अन्नेम निम्है मझी नू हूँ ठकवा सिखाब'उर चो'ओर। आर नठारनन ओन्द्रना ठकवा सिखाब'अनन नूख़ुर नूख़ुर ओन्द्र'ओर। अरा आर तमन मूल्ली चि'अरकी ख़ीन्दका कोड़हे सवंगिय उर्बासिन हूँ बलदम ब'ओर। ई लेक्खम आर तमा गे चाँड़हेम नठारनन ओन्द्र'ओर। ² अरा कोड़हे आलर आर ही कोड़हे सोतरा उज्जा ओक्कना नू ऎकोर। अरा आर ही चड्डे मानी ही डहरे गे निंदा मनो। ³ अरा आर तम्है कोड़हे चिबाख़ारना ती ताम कमचका ख़ीरी गुट्ठिन तेंगरकी निम्है गुस्ते फफड़'ओर मॊख़ोर। अरा आर मइय्याँ बरना दंडे पॆसका नगदे उल्ला ही मुन्द तिम धर्मेस ती सपड़ारकी र'ई, अदही बरना ही दिरी मलकी, आर ही नठाब'अना चाड़हेम अंड़सो।

⁴ एकाबारी मेर्ख़ा पैकर पाप नंजर ख़ने, धर्मेस आरिन हूँ मल अम्बियस, लिकिन नरक नू हेबड़ियस ती ख़ोड़ख़ा ऊख़ा गड़डी नू रायबड़ी उल्ला गे सिकड़ी ती हॆंचका उइय्कादस। ⁵ अरा धर्मेस चिरान ता ख़ॆख़लन हूँ मल अम्बियस, लिकिन आस धर्मेसिन मल इल्च'ऊ आलर ही ख़ॆख़ेल ही मइय्याँ कोहाँ बहड़िन तइय्यस ती आरिन नठाबाचस। अरा धर्मेसी उजगो नेंवई ही पत्त नू मेन्ताचका नूहस अरा आसी एड़पातर सात झनरिन लेका बछाबाचस। ⁶ अरा धर्मेस सोदोम अरा गोमोरा नगरे गे एन्ने दंडे चिच्चस का अबड़न ऒलताचस ती चिन्दी नंजस। धर्मेसिन मल इल्चुर गे ईदिम मनो एन्ने ऎद'आ गे आ नगरे गुट्ठी ओन्टा जोक्खा ख़ीरी मना गे एन्ने नंजस। ⁷ लिकिन धर्मेस उजगो रहचका लॊथसिन बछाबाचस। आस गा नॆग मलका आलर ही सोतरा उज्जना ओक्कना ती जिया नू दुक्खे मंजस। ⁸ आ उजगो आलस लॊथस उजगो मलका आलर ही मझी नू उज्जा लगियस ख़ने, उर्मी उल्ला आर ही नॆग मलका नलख गुट्ठिन ऎरालियस अरा मेनालियस। औंगे आसी जिया ऒलालिया। ⁹ औंगे उर्बस अख़दस का धर्मेसिन इल्चू आलारिन आर ही बिढ़्रना ती एकासे बछाब'अना र'ई, अरा उजगो मलका आलारिन दंडे चि'अनुम चि'अनुम नेंवई उल्ला गे उइय्यना र'ई। ¹⁰ मुध गा तम्है पाप सुबहा ती बरना मलदौ चिबाख़ारना अरा सोतरा नलख गुट्ठी ही ख़ॊख़ा ख़ॊख़ा कालरकी धर्मेसी अदिया आबोन हींड़'उर मइय्याँ धर्मेस एन्नेम बेड़हा दिम र'अदस। इबड़ा आलर फुलई मनू अरा हुड्ड र'अनर। ईर मेर्ख़ा ता महबा ही आलॊ गुट्ठिन हूँ निंदा नना गे मल इल्चनर। ¹¹ लिकिन ठकवा सिखाब'उर ती कोड़हे सवंग अरा पया र'अना मेर्ख़ा पैकर हूँ मेर्ख़ा ता महबा ही आलॊ गुट्ठी ही बिड़दो नू उर्बासी मुन्दहारे बदी मल ठेकाब'अनर। ¹² लिकिन इबड़ा ठकवा सिखाब'उर गा ताम मल बुझुरका कत्था गुट्ठी नू निंदा नन्नर। ईर आलर ही सुबहा मलका मेक्खो गुट्ठी लेक्खा र'अनर। ईर तम्है सुबहा ही लेक्खा ऎकना उज्जना आलॊ गुट्ठी लेक्खा र'अनर। ईर धरतारकी लौर'आ अरा पिटर'आ गेम कुन्द्रका र'अनर। मेक्खो गुट्ठी लेक्खम ईर हूँ नठार'ओर।

¹³ आर नंजका उजगो मलका नलख गुट्ठी ही ऊजी नू धर्मेस आर गे दंडे चि'ओस। आर उल्ला बेड़ा नू हूँ मलदौ मदी गुट्ठी ती रिरयार'आ गे कोड़हे बेद्दनर। आर टिकला अरा लज्जे मलका लेक्खा हिकनर का आर निम्है गने मदी गुट्ठी नू ओन्ना उर्मी बेड़ा नू निमन लज्जे मॊख़त'ओर। ¹⁴ आर ताम ईरू उर्मी आलीर गने नन्ना आली गुसन कालू पापन नना बेद्दनर। अरा आर इकला हूँ पाप नना गे मोका बेद्दनन मल अम्बनर। आर ठिमठिमने मल र'ऊ आलारिन तम्है तरा मन्तानर, अरा आर ही जिया मलदौ चिबाख़ारना नू हेबरा केरा, अरा धर्मेस आर गे दंडे चि'ओस। ¹⁵ आर उजगो डहरेन अम्बरकी तम्है डहरेन एब्सका चिच्का र'अनर। आर बोसोरसी तंग्दस धर्मेसी कत्था तिंगू बालामसी डहरे नू ईक्कानर, एकास मलदौ नन्ना ती ढिबा अर्ज'आ बेद्दा लगियस। ¹⁶ अन्नू हूँ आस गा ओन्टा गदही ती तंग्है मलदौ नलख ही पत्त नू केबेर मोक्कस। कछनख्र'आ पोलना आ मेक्खो आलर ही सड़ा ती कछनख्रका ती आ धर्मेसी कत्था तिंगुसी लूर मलका नलखन छेकचा।

¹⁷ इबड़ा ठकवा सिखाब'उर अम्मु मलका पझरा गुट्ठी अरा घटा ती उढियाचका बदाली गुट्ठी लेक्खा अनभनियाँ हिकनर। ईर गे ख़ोड़ख़ा ऊख़ा नू अड्डा उइरकी र'ई। ¹⁸ ईर अनभनियाँ कत्था गुट्ठिन कछनख्रनर ती तम्है पत्त नू फुलई मन्नर। अरा मलदौ डहरे नू उज्जू आलर ती बछर'आ गे चिहुट ननू पुना पत्त'ऊ आलारिन ईर आल सुबहा ती बरना पेहरन ही सोतरा नलख ही चिबाख़ारनन चिबाख़ार'आ गे नन्ना ती आरिन पाप नुम र'आ गे तिहा नन्नर। ¹⁹ ईर आर गे ओन्टा छछिन्द उज्जनन गच्छरनर, लिकिन तामिम सोतबोड़'आ उज्जना गे जॊंख़ र'अनर। एन्देरगेका एकास एका मलदौ ती पोलदस चाड़ा, आस अदही जॊंख मनदस कादस। ²⁰ ईर नम्है उर्बस अरा नाड़ुस येसु मसीसी पत्त नू अक्खर ती, ई ख़ॆख़ेल ही सोतबोड़'आ नलख गुट्ठी ती बछरना ती हूँ, फेन ईर अबड़ा सोतबोड़'आ नलख गुट्ठी नू बझरका र'अनर। ईर एन्ने बझरका र'अनर होले, ईर ही ख़ॊख़ा ता दसा मुन्द ता दसा ती कोड़हे मलदौ मनी क'ई। ²¹ ईर उजगो उज्जना ही डहरेन अक्का ख़ॊख़ा तमा गे चितारका नेम्हा पॆसका गुट्ठी ती पछली किर्रना ती, ईर इकला हूँ उजगो उज्जना ही डहरेन बल्लुर रहचका होले, आद ईर गे कोड़हे बॆस रहचा दने। ²² ई ब'अना गुट्ठी ईर गे ठौका उक्की का “अल्ला तंग्है पुतुरका तरम पछली किर्री,” अरा “एमताचका किस्सी अउरिम चॊतोर नुम लोटोर'आ किर्रिम ब'ई।”