2
थेस्सलोनिकॆ नू पौलुसी नलख
1 अना भईरो, नीम निम्है तिम अख़दर का एम्है इसन थेस्सलोनिकॆ नगरे बरना अनभनियाँ मल मंजा। 2 लिकिन नीम अख़दर का मुन्द फिलिप्पी नगरे नू सस्ती सारना पीख़्रना नू हूँ एम्है धर्मेस एमा गे एन्ने डिढ चिच्चस का ऎम बिगर अटकरका धर्मेसी दौ कत्थन तिंकम।† 3 एन्देरगेका एम्है सिखाब'अना लहर'अना ती मला, महले मलदौ मने गुट्ठी मला, महले ठकना मला। 4 लिकिन एकासे धर्मेस एमन दौ कत्था तेंगना जॊगे कमचस, ऎम अन्नेम तेंगदम। अरा इत्रु आलारिन मला एम्है जियन बिढ़दस आ धर्मसिन पत्तारदम। 5 एन्देरगेका नीम अख़दर ऎम नॆकन हूँ मल फसकटचकम महले नॆकन हूँ चिबाख़ार'आ गे लहर'आ लिक्कम। धर्मेस गोवाह र'अदस। 6 अरा ऎम आलर ती मईन मल बेद्दा लिक्कम, निम्है ती मला महले नेख'अम नन्नर ती हूँ मला। 7 ऎम मसीसी तइरका मन्ना चड्डे निम्है मइय्या ओत्था लद'आ ओंगा लिक्कम। लिकिन एकासे अयंग तंग्है ख़द्द-ख़र्रन उन्त'ई तिंद'ई, अन्नेम ऎम हूँ निम्है गने रहचकम। 8 औंगे ऎम एन्ने निम्है मइय्याँ चोन्हा नन्नुम धर्मेसी दौ कत्था नू लेका मला, लिकिन अपन अपन उज्जनन हूँ चि'आ गे सपड़ारका रहचकम, एन्देरगेका नीम एम्है ती चोन्हा मंज ख़च्चिका रहचकर।
9 अना भईरो, नीम एम्है अर्जाचका अरा सस्तिन सुरत'अदर। ऎम नॆखा नू हूँ ओत्था अम्बोम मना, अदगेम ऎम उल्ला माख़ा नलख नंजकम ती निम्है नू धर्मेसी दौ कत्थन तिंकम। 10 नीम पत्त'ऊ आलर ही मझी नू एम्है उज्जना ओक्कना एकासे नेम्हा अरा उजगो अरा बिगर बदी ही रहचा। नीमिम गोवाह र'अदर अरा धर्मेस हूँ गोवाह र'अदस। 11 नीम अख़दर का एकासे ओर्त बंगस तंग्है ख़द्द-ख़र्रन नन्दस। अन्नेम निमा ओर्त ओर्त गे नंजकम। 12 ऎम निमन सिखाबाचकम अरा रिझ्रताचकम अरा घड़ी घड़ी बुझाब'आ लिक्कम का निम्है उज्जना ओक्कना धर्मेसी जॊगे मन्ना र'ई, एकास निमन तंग्है राजी अरा महबा नू मॆख़दस।
13 ई चड्डे निमा गे ऎम धर्मेसी दौ कत्थन तिंकम, ख़ने नीम अदिन आलर ही मला धर्मेसी कत्था अक्कर ती इंझरकर। अरा ईद मानिम नू धर्मेसी कत्था हवे, एकदा नीम पत्त'ऊ आलर ही जिया नू उज्जाली। औंगे ऎम सगर घड़ी धर्मेसी धन्यवाद नन्दम। 14 भईरो, यूदेया जिला नू मसी येसुस नू र'ऊ अबड़ा धर्मेसी कलीसिया गुट्ठी लेक्खा नीम हूँ उज्जालिक्कर। एकासे आर यहूदीर ती खिलपत मंजर अन्ने नीम हूँ निम्है राजी ता आलर ती खिलपत मंजकर।† 15 आरिम उर्बा येसुसिन अरा धर्मेसी कत्था तिंगुरिन पिटियर। अरा एमन हूँ खिलपत नंजर। अरा आर धर्मेसिन मल रिझाब'अनर अरा ओर्मारिन हींड़नर।† 16 अरा अबड़र नन-यहूदीरिन नाड़र'आ गे सिखाब'अना ती एमन छेकनर का सगरो आर ही पाप ही कट्टु नींदी। छेद्द नू आर ही मइय्याँ धर्मेसी कोड़हे खींस अंड़सकी र'ई।
पौलुस कलीसिया गने अउरिम भेंट मना गे बेद्ददस
17 अना भईरो, ऎम एगघड़ी गे निम्है ती छिंड्रका रहचकम अन्नु हूँ एम्है सोचना गुट्ठी गा निम्है गने रहचा। ख़ने ऎम बग्गे चिहुट नंजकम अरा निमन कोड़हे ऎरा बेद्दा लिक्कम। 18 औंगे ऎम निम्है गुसन बर'आ गे बिद्दकम। ऎन पौलुस ओंग्होन मला घड़ी घड़ी निम्है गुसन बर'आ बिद्दकन। लिकिन सैतान एमन छेंकचा उइय्या। 19 एन्देर एमा असरा अरा रिझ चि'ई अरा नम्है उर्बा येसुसी बरना बेड़ा नू आसी मुन्दहारे एम्है महबा ही मुकुट एन्देर र'ओ? नीम मलदर का? 20 एम्है महबा अरा रीझ नीमिम हिकदर।