13
अक्स'उर ही तबे नू र'अना
1 उर्मी आलर अक्स'ऊ आलर ही तबे नू र'आ नेकअन। एन्देरगेका उर्मी आकुस धर्मेस तरती बर'ई। एका ओर्तर आकुस नू र'अनर आरिन धर्मेस दिम असन ओक्ताचका र'अदस। 2 औंगे एका ओर्तर आकुस ही बिड़दो नू हुलहुली नन्नर होले आर धर्मेसी आनका ही बिड़दो नू हुलहुली नन्नर, आर दंडे ख़क्ख'ओर। 3 एका ओर्तर दौ नन्नर आर गे अक्स'ऊ आलर ती एल्चना मलकी, लिकिन मलदौ ननू आलर गे लेका आरिन एल्चना र'ई। नीम अक्स'ऊ आलर ती मल एल्चा बेद्ददर होले, नीम दौ नलख नना, होले आस निंगन सहरार'ओस। 4 एन्देरगेका अक्स'ऊ आलस निम्है दौ नना गे धर्मेसी जॊंख़स हिकदस। लिकिन नीम मलदौ नन्दर होले एल्चा। एन्देरगेका आस गे दंडे चि'आ गे आकुस र'ई। मलदौ ननुरिन दंडे चि'आ गे आस धर्मेसी जॊंख़स र'अदस। 5 औंगे अक्स'ऊ आलर ही तबे नू र'अना चाड़ र'ई। दंडे ही इल्चका ती लेका मला नम्है लखना ती हूँ नमा एन्ने नन्ना र'ई।
6 ई चड्डे दिम नीम मालगुजारी हूँ चि'अदर, एन्देरगेका अक्स'ऊ आलर धर्मेसी जॊंख़र हिकनर अरा आर अक्स'आ लगनर। 7 निमा ओर्मर गे एन्देर एन्देर चि'अना र'ई अदिन चि'आ। नॆका मालगुजारी चि'अना र'ई आर गे मालगुजारी चि'आ, नॆका ख़ल्ल गोड्डा ही मालगुजारी चि'अना र'ई आर गे ख़ल्ल गोड्डा ही मालगुजारी चि'आ, नॆकन एल्चना र'ई आरिन एल्चा, नॆका मईन नन्ना र'ई आरिन मईन नना।†
चोन्हा दरा नॆग
8 अपन ती नन्नर नू चोन्हा नन्नन अम्बरकी एकअम हूँ कत्था नू नॆखा हूँ नहड़ा अमा मना। एन्देरगेका नॆ तंग्है अरबर-परबर गने चोन्हा नन्दस आसिम नॆगन पूरा नंजका र'अदस। 9 एन्देरगेका नॆग ब'ई, “नन्ना आली गुसन अमके काला, अमके पिटा, अमके ख़ड़'आ, नन्नर ही जिनिसन अमके चिबाख़ार'आ।” अरा इबड़ा गने अउरिम पॆसका जुमर'अरकी ई नॆग र'ई का, “निंग्है अरबर-परबर गने निंग्है लेक्खा चोन्हा नना।”† 10 चोन्हा अरबर-परबर ही एन्देर हूँ मलदौ मल ननी, औंगे नॆ चोन्हा नन्दस आस उर्मी नॆगन पॆस्रदस।
11 अक्कुन ता बेड़ा एकासे र'ई एन्ने अख़'अरकी इदिन नना। निमा अक्कु ख़न्द्रना ती एजरना ही बेड़ा अंड़सकी र'ई। एन्देरगेका एका लेक्खा नाम पत्ताचका रहचकत आ बेड़ा ती अक्कु नम्है नाड़रना हेद्दे र'ई। 12 माख़ा नगदे किर्रिम बिच्चकी र'ई अरा बिज्जना ही बेड़ा र'ई। औंगे नाम ऊख़ा ही नलख गुट्ठी अम्बरकी उजगो उज्जना गे बिल्ली ही कमहड़ आबोन भिड़'आ। 13 उल्ला ता आलर लेक्खा नाम उजगो डहरे नू ऎकदत नेकअन। नाम रिझ रंग अरा ऊंक्खना अरा पेहरन ही सोतरा नलख अरा लम्पट नलख अरा अरबानखरना अरा डाहना आबो ती तरकूटी र'अदत नेकअन। 14 लिकिन उर्बस येसु मसीसिन अत्ता हो'आ, अरा पाप मॆद सुबहा गुट्ठी ही चिबाख़ारनन पूरा नन्ना ही सोच आबोन अम्बा चि'आ।