១ កូរិនថូស 9

ស៊ិត ហ ឡា ណាក់ ហណាយ

ពឆិ អៃ នែ តប៊ិច ហ៊ូយ តើប ប៉ាគ់ ឌី មែ អ៊ឺម ឞ? អៃ នែ តត្រ ណាក់ អ៊ឺម ឞ? ពឆិ អៃ នែ តតៃ គ្រែដៃ យីស៊ូ កន់ដ្រាគ់ អ៊ឺម ឞ? ពឆិ តត្រ កាន ង៉ាន អៃ ឡា បើម អ៊ែ អ៊ឺម ឞ  វែ ឡា ដូវ គូ ទឹង គ្រែដៃ កន់ដ្រាគ់ អ៊ែ? 2 យ៉ះ មែ ឍឺ រ៉ា រៀន  តកាគ់ អៃ អ៊ឺម កតាម  កចន់ វែ ណាគ់ កាគ់ អៃ ពទឺ។ តូយ នែវ វែ ឡា ញិវ កើត ទឹង គ្រែដៃ កន់ដ្រាគ់ អ៊ែ ឡើយ  ឡា ពដៃ រៀន អៃ ណាក់ ហណាយ ម៉ាត់ ម៉ាត។

3 តើម ពឹង នែ អៃ ម៉ា ត្រណើវ ឌី មែ ឡា ចន់ ពង៉ាត់ អៃ រៀន អៃ តត្រ ហណាយ ម៉ាត់ ម៉ាត អ៊ឺម។ 4 ពឆិ អៃ វ៉ា អ៊ូគ បាណាបាស នែ  តប៊ិច ស៊ិត ចង់ ចា ញែត ដាក ឌឹក មែ ឡា អាំ អ៊ឺម ឞ? 5 ពឆិ អ្យា នែ  តប៊ិច ស៊ិត តៀត ទ្រី ឡា សឿ រ៉ិ អរែង  ប៉ាគ់ ឌី បូវ ហណាយ ឍឺៗ ឋាវ្គ  ប៉ាគ់ ឌី អោះ អូយ គ្រែដៃ កន់ដ្រាគ់ វ៉ា កៃផះ អ៊ឺម ឞ? 6 លឺ មូយ ប៊ិច ឡូវ អៃ វ៉ា បាណាបាស ឞ  ឡា ត្រ ពពឹត បបើម ចៀម ចាក់ ទឺ អ៊ែ?

7 តខឿយ ប៊ិច មែ ឆិ ឡា បើម តហាន ចក់ ចា លៀន កឡឹ អ៊ឺម! តប៊ិច មែ ឆិ បើម មឺរ ដាំ តណើម ប្ល៉ៃ ឈឹងជែម ម៉ា តប៉ិះ ចា ប្ល៉ៃ ហ អ៊ឺម! តប៊ិច មែ ឆិ ឡា អ្មពែក វ៉ូង ចៀម ម៉ា តចក់ ញែត ដាក តោះ ហ អ៊ឺម  8 អៃ ម៉ាង ពអ៊ែ តត្រ កាស ឌី ម៉ាង តាម លឞៀប បនិះ មិៗ អ៊ឺម  យ៉ះ ទឹង ផាប់ កគ់ ប៊ិច ចួរ ជុ ពអ៊ែ ពទឺ  9 ទឹង ផាប់ ចឞាប់ យ៉ាគ់ អ៊ែ ហាយ រៀន  «ញ៉ង ទ្រូប បួរ ឝ៉ូ ប៉ះ ពន់ឆិន ចិះ អ៊ែ អ៊ឺម» ម៉ាត់ ម៉ាត អ៊ែ  គ្រែដៃ តឃឹត អ៊ឺម ឌី ឝ៉ូ អ៊ែ  10 ហ ម៉ាង ពអ៊ែ ញ៉ន ឌី ហ ឃឹត ឌី ង៉ាយ។ ពអ៊ែ ឡើយ ឌី ប៊ិច ចួរ ជុ ទឹង ផាប់ គ្រែដៃ ខង មែ ឡា ឆមូ ចួយ  មែ ត្រ មឹង ដូវ ចិះ  មែ ឡា សួត រ៉ិះ  មែ ត្រ មឹង ដូវ ពួរ ចង់។ 11 អ៊ែ អ្យា  អ្យា ប្រឹះ អ្ងគុង សឌឺវ តូយ ផវ យ៉ាង គ្រែដៃ ឌី វែ  អ៊ែ អ្យា ដូវ សនឺ រ៉ាស ចណង់ ឍឺៗ តើម ឝឹត វែ អ៊ែ  ហ អើន យឹប ឞ? 12 ប៉ាគ់ មែ ហ៊ឹ គែង ប៊ិច ស៊ិត ចក់ លខា ឝឹត វែ ឡើយ  ពឆិ ឌី អ្យា មិញ  ប ហម អ៊ែ អ្យា ម៉ា ប៊ិច ស៊ិត ចក់ ឝឹត វែ ដុង?

ហាក់ឌី អ្យា តរូគ យួរ ស៊ិត អ៊ែ អ៊ឺម  អ្យា គូ អត់ថុន  បក់ឌី ញ៉ង អាំ ឃឺក ខាម នែ។ 13 វែ ណោះ ឡើយ ដុង? ហ ឆិ ឡា គូ ឡាប់សៃ គ្រែដៃ ទឹង អ៊ែ  ហ ប៊ិច ចណង់ ចណា តើម ឝឹត អ៊ែ ឡើយ  អ៊ែ ហ ឡា ណាក់ ប៊ុះ សនឺ ទឹង អ៊ែ  ហ ដូវ ចនែក ឌី ហ កឡឹ ឝឹត អ៊ែ ពទឺ។ 14 គ្រែដៃ កន់ដ្រាគ់ ពង់ឝ៉ាប់ ពអ៊ែ ពទឺ រៀន  មែ ឆិ ឡា រ៉ិ តប៉ច ហាយ កាន អ្យាគ់ ឝឹត គ្រែដៃ  មែ អ៊ែ ញិវ ឌី កាន អ៊ែ ឡើយ។

15 ចនែក អៃ មិញ  អៃ តប៊ិច យួរ ស៊ិត លែក នែ សអួះ  អៃ ចួរ ឝុន នែ  តត្រ អៃ ចាង ងុញ យួរ ស៊ិត អ៊ែ អ៊ឺម  ប៉ាគ់ អៃ បើម ពអ៊ែ  សិន អៃ ម៉ា គែត  អ៊ែ អ្យាគ់ ជឺរ ប្លះ ហ ម៉ា ប៉ាត់ មុះ ម៉ាត់ អៃ អ៊ិន។ 16 ទឹង អៃ ឡា ខញ៉ាយ កាន អ្យាគ់ ឝឹត គ្រែដៃ អ៊ែ  អៃ តណោះ អួត ចាក់ អ៊ឺម  ខង អៃ បើម កាន អ៊ែ ឌី ត្រ ណាធី អៃ  តណោះ តាក់ អ៊ឺម  ប៉ាគ់ អៃ តា ខញ៉ាយ កាន អ្យាគ់ ឝឹត គ្រែដៃ អ៊ឺម  អៃ ម៉ា ត្រ ធុក ញ៉ាក ម៉ាត់ ម៉ាត។ 17 ប៉ាគ់ កណា អៃ បើម កាន ខញ៉ាយ កាន អ្យាគ់ ឝឹត គ្រែដៃ ឌី ប៊ុត រូគ ម៉ើត អៃ កឡឹ  អ៊ែ អៃ ម៉ា ដូវ រង់វ៉ាន់។ ហាក់ឌី ប៉ាគ់ កាន ង៉ាន អ៊ែ ណាធី អៃ កឡឹ មិញ  ពអ៊ែ អៃ ត្រ បើម ម៉ាត់ ម៉ាត  តាម គ្រែដៃ ឡា ជុ អាំ ឌី អៃ។ 18 ពអ៊ែ ហ៊ឹ ឆិ ហ គូ រង់វ៉ាន់ អៃ អ៊ិន? រង់វ៉ាន់ អៃ អ៊ែ  ចក់ ឌី អៃ ហាយ កាន អ្យាគ់ ឝឹត គ្រែដៃ មិៗ  តចក់ ខា  តយួរ ស៊ិត ទឹង អៃ ឡា ខញ៉ាយ កាន អ្យាគ់ ឝឹត គ្រែដៃ អ៊ឺម។

19 យ៉ះ អៃ ហ៊ូយ តើប តប៊ិច ក៝ត មែ ឆិ អ៊ឺម កតាម  ណាគ់ អៃ ផម ជុ ចាក់ អៃ  បើម ប៉ាគ់ ក៝ត ឌី បនិះ លែក រ៉ា ពទឺ  បក់ឌី ចន់ដ្រា បនិះ អើន រ៉ា  អាំ មែ សឿ គ្រែដៃ គ្រិះ។ 20 សាគ់ អៃ គូ ទឹង សាត យូដា  អៃ បើម ឝុន សាត យូដា ពទឺ  បក់ឌី ចន់ដ្រា មែ សឿ គ្រែដៃ គ្រិះ។ យ៉ះ អៃ កឡឹ តគូ កន់ដ្រូម អំណាច ចឞាប់ យ៉ាគ់ ម៉ូស៊ែ កតាម  អ៊ែ ទឹង អៃ ឡា គូ អរែង ឌី បូវ ឡា គូ កន់ដ្រូម អំណាច ចឞាប់ អ៊ែ  អៃ កគ់ បើម ប៉ាគ់ ឌី មែ ឡា គូ កន់ដ្រូម អំណាច ចឞាប់ អ៊ែ ពទឺ  បក់ឌី ចន់ដ្រា មែ សឿ គ្រែដៃ គ្រិះ។ 21 ហ៊ឹ អៃ ឡា គូ អរែង វ៉ា មែ ឡា តប៊ិច ចឞាប់ យ៉ាគ់ ម៉ូស៊ែ  អៃ បើម ប៉ាគ់ ឌី មែ ឡា តប៊ិច ចឞាប់ អ៊ែ ពទឺ  បក់ឌី តនែង មែ សឿ គ្រែដៃ គ្រិះ (ហាក់ឌី ម៉ាត់ ម៉ាត អ៊ែ  តត្រ អៃ គូ តូយ លង៉ាវ ចឞាប់ គ្រែដៃ អ៊ឺម  អៃ គូ កន់ដ្រូម អំណាច ចឞាប់ គ្រែដៃ គ្រិះ មិញ)។ 22 សាគ់ ទឹង អៃ ឡា គូ អរែង វ៉ា មែ ឡា សឿ តណោះ ឌូរ អ៊ែ  អៃ បើម ប៉ាគ់ ឌី មែ ឡា សឿ តណោះ ឌូរ អ៊ែ ពទឺ  បក់ឌី តនែង មែ សឿ គ្រែដៃ គ្រិះ។ អៃ បើម ប៉ាគ់ ឌី បនិះ លែក រ៉ា ដូវ លែក តាក់  ត្រំ នែវ មែ ឡា បើម អ៊ែ ឡើយ  បក់ឌី សវ៉ាក់ មែ លែក រ៉ា  ឡា ប៊ិច កាន ញិវ កើត នែវ ដដិៗ អ៊ែ។ 23 អៃ បើម កាន លែក នែ បក់ឌី ប៊ិច ខា ឌី កាន អ្យាគ់ ឝឹត គ្រែដៃ  អៃ ម៉ើត ឌី ប៊ិច ចនែក អរែង វ៉ា មែ ទឹង ប្ល៉ៃ ពឺរ កាន អ្យាគ់ ឝឹត គ្រែដៃ អ៊ែ ពទឺ។

24 ពឆិ វែ ណោះ ឡើយ ដុង  មែ ឡា ត្រយ៉ាវ ព្រឆាំង លែក រ៉ា អ៊ែ  ប៊ិច កាស មូយ រ៉ា ឡា ដូវ រង់វ៉ាន់? ប៉ាគ់ ពអ៊ែ ហគ់ វែ ត្រយ៉ាវ ប៉ាគ់ ឌី ហ ឡា ដូវ រង់វ៉ាន់ អ៊ែ  អ៊ែ វែ ម៉ា ដូវ រង់វ៉ាន់ ពទឺ។ 25 អ៊ែ មែ ឡា អ៊ែប ហាត់  មែ ខំ អត់ថុន ចាក់ ដៃ មែ ម៉ៃៗ  បក់ឌី ដូវ ប្រវ៉ម ទូស ពឺរ ក្រឡាញ ឡា ណោះ ប៊ុក បៀរ អ៊ែ។ អ៊ែ ឌី ង៉ាយ មិញ ង៉ាយ បើម ពអ៊ែ បក់ឌី ដូវ មួក ភែ សណាគ់ ឡា តណោះ ប៊ុក អ៊ឺម។ 26 អ៊ែ ឌី អៃ មិញ  អៃ ត្រយ៉ាវ  តត្រ អៃ តណោះ ទ្រូង ហ៊ឹ ឞន អៃ ឡា ម៉ើត ពន់ទឹង អ៊ែ អ៊ឺម  អៃ អ៊ែប ហាត់ សុក មួយ នែ  តត្រ អៃ សុក កយឺវ មិៗ អ៊ឺម ពទឺ។ 27 ហាក់ឌី អៃ កឡឹ មិញ  អៃ ខំ រ៉ស ចាក់ ដៃ អៃ ខាក់ៗ  វ៉ា អៃ បើម កន់ដ្រាគ់ ឌី ចាក់ ដៃ អៃ កឡឹ  ឌូង ប៉ុះ ហ៊ឹ អៃ ខញ៉ាយ កាន អ្យាគ់ ឝឹត គ្រែដៃ ឌី មែ ហ៊ឹ គែងៗ ប្លូច ឡើយ  កើត ឌី ចាក់ អៃ កឡឹ តប៊ិច រង់វ៉ាន់ ឆិ អ៊ឺម។