ហណាយ 27

ប៉ូល ត្រ មែ តៀត ឈូន ហ៊ឹ មឿង រ៉ូម

សាគ់ មែ ហាយ រៀន អ្យា ម៉ា ទឺស ឈិះ សំបូវ រ៉ិ ហ្មិះ ហ៊ឹ ពដិះ អ៊ីតាលី  អ៊ែ មែ ម៉ប អាំ ប៉ូល វ៉ា កន់ថូត ឍឺ រ៉ា ឋាវ្គ ឌី ណាយ តហាន មរ៉ា  ម៉ាត់ ហ យូលៀស  ហ នែ បូវ តហាន ឝឹត សឋិច ទិះ មឿង រ៉ូម។ 2 អ្យា ទឺស ទឹ សំបូវ មូយ ឝឹត មឿង អាដ្រាមីត  សំបូវ អ៊ែ ឈឹង ដាល់ ម៉ា រ៉ិ ហ៊ឹ មឿង ឍឺៗ ឡា គូ រ៉ ពឹះ ស្រមុត ពដិះ ឃែត អាស៊ី អ៊ែ  ដូវ អ៊ែ ឡើយ អ្យា ឈិះ សំបូវ អ៊ែ ញឺស រ៉ិ ប្រើយ  ទឹង អ៊ែ ប៊ិច អារីសតាក បូវ មែ ម៉ាស៊ីដូន ឝឹត មឿង ធែសាឡូនិក  ហ ដក់ អរែង វ៉ា អ្យា ពទឺ។ 3 ប៉ាគ់ ប្រណូវ អ្យា រ៉ិ ប៊ឹះ មឿង ស៊ីដូន  យូលៀស ហ បើម អ្យាគ់ ឌី ប៉ូល  ហ អាំ ប៉ូល រ៉ិ ហ៊ឹ ឝណូប ណូង ហ បក់ឌី មែ ម៉ា ឆួយ ហ។ 4 ដូវ អ៊ែ ឋាវ្គ អ្យា ញឺស ឈិះ សំបូវ តើម ឝឹត មឿង អ៊ែ  អ៊ែ ឡើយ អ្យា ដក់ ព្រសច តកួល ដាក គីប្រ៉ុះ ខង កយឺវ ដះ អ្យា យឹប។ 5 អ្យា ដូវ ក្លង ស្រមុត ដាល់ ឃែត គីលីកៀ វ៉ា ឃែត ប៉ាមភីលៀ  អ៊ែ ឡើយ រ៉ិ ប៊ឹះ មឿង មីរ៉ា កនុង ឃែត លូកៀ។ 6 ទឹង មឿង អ៊ែ ណាយ តហាន ដាំង តៃ សំបូវ មូយ ឋាវ្គ ឡា ប៊ឹះ ឝឹត មឿង អាលីកសានដ្រៀ  ឡា ម៉ា ត្រ រ៉ិ ហ្មិះ ហ៊ឹ ពដិះ អ៊ីតាលី  អ៊ែ ហ ចន់ដ្រា អ្យា ទឺស ឈិះ សំបូវ អ៊ែ មិញ។ 7 សំបូវ អ៊ែ រ៉ិ ហ៊ឹ ងឺរ មិនៗ សើង ត្រូវ តង៉ៃ  អ៊ែ ឡើយ រ៉ិ ប៊ឹះ ស្រទឹង ឌី មឿង កនីដូស ហ្នដឹប ញ៉ាកៗ សាៗ  កយឺវ ពឹក ដ្រាគ់ ងឺរ អ្យា  អ៊ែ អ្យា ពឋះ សំបូវ ដក់ ទឹង ឌី មឿង សាល់ម៉ូនី សៀរ អ្នសៀរ ព្រសច តកួល ដាក គ្រែត មិញ។ 8 អ្យា ដក់ ឋាវ្គ ញ៉ាកៗ សាៗ តូយ ព្រសច តកួល ដាក អ៊ែ  អ៊ែ ឡើយ អ្យា រ៉ិ ប៊ឹះ ឞន មូយ  មែ ឡា ជុ រៀន  «ឞន ឡា អ្យាគ់ ចត សំបូវ» ឡា ដាល់ ឌី មឿង ឡាស៊ី អ៊ែ។

9 អ្យា គូ ឌុញ រ៉ ទ្រូង ដាក អ៊ែ ឌុញ កឞុ  អ៊ែ ផើយ ប៊ឹះ ធុន ឞ៊ឺ កយឺវ ប្រើយ  ធុន អ៊ែ ប្លូច តង៉ៃ ឞ៊ុន ក្រាំង ចណា ឡើយ  ពអ៊ែ ឡើយ ឌី ប៉ូល ហ ម៉ាង អាំ មែ លវ៉ាំង រៀន៖ 10 «អ៊ឺ អ៊ូគ ប៉ អោះ អូយ  តាម អៃ រ៉ាង អៃ ណោះ រៀន  ប៉ាគ់ ង៉ាយ រ៉ិ ញ៉ំៗ ហ្មិះ ហ៊ឹ ងឺរ តគ់ ឋាវ្គ  ហ ម៉ា ត្រ ឃូច បាក ម៉ាត់ ម៉ាត  តត្រ កាស ឌិវ លុប ឡង់ រ៉ាស អ្មបាស វ៉ា សំបូវ អ៊ែ អ៊ឺម  ម៉ា ប៊ិច កាន ឃូច បាក ដម ចាក់ ដៃ  ង៉ាយ ម៉ា ត្រ គែត ប៉ាត់ ដិ ឋាវ្គ»  11 ហាក់ឌី ណាយ តហាន ហ មឹង ហ ឡា ណាក់ ចំផើ សំបូវ  វ៉ា កន់ដ្រាគ់ សំបូវ ប្លះ ចាប់ ប្រម៉ាង ប៉ូល។ 12 ញ៉ន ឌី ឞន ចត សំបូវ អ៊ែ តត្រ ឞន អ្យាគ់ ចត ទឹង ធុន ឝ៉  បូវ សំបូវ អើន រ៉ា ឃឹត ឈិះ សំបូវ ញឺស ឝឹត អ៊ែ រ៉ិ ហ៊ឹ ងឺរ ឋាវ្គ  មែ ម៉ើត រ៉ិ ប៊ឹះ ហ៊ឹ មឿង ភីនីច ឡា ឞន ចត សំបូវ មូយ ណាគ់ ហ៊ឹ តកួល ដាក គ្រែត គូ សំឞ៊ឺន ហ៊ឹ អ៊ែ ធុន ឝ៉ ប៉ាគ់ កណា ហ្មប៊ឹះ។ ឞន ចត ហ៊ឹ មឿង ភីនីច អ៊ែ  មែ រ៉ាង តូយ ចម៉ា តូយ ចអៀវ ម៉ាត់ តង៉ៃ លុច។

កយឺវ ចនុះ

13 សាគ់ អ៊ែ ប៊ិច កយឺវ ពឹក អ្មប្រើ ប្រើ  អ្យាគ់ ហើត អ្នហើត តើម ឝឹត ចំឞ៊ែង តូយ ចអៀវ ម៉ាត់ តង៉ៃ លុច  បូវ មែ គឹន រៀន កយឺវ អ្យាគ់ ឡើយ  មែ តនែង អ្មបារចាក់ ហរ៉ូច ពឌឹក ម៉ាម មែ ឡា កលីះ បក់ឌី ពអ៊ឹង សំបូវ  អ៊ែ ឡើយ មែ ឈិះ សំបូវ រ៉ ព្រសច ពឹះ តកួល ដាក គ្រែត។ 14 ហាក់ឌី ឞៀតៗ ដូវ អ៊ែ ប៊ិច កយឺវ ចនុះ ទុត ថាំង  ម៉ាត់ ហ «កយឺវ ចនុះ ឝឹត ចអៀវ ម៉ាត់ តង៉ៃ ឡិច» ហ ពឹក តើម ឝឹត តកួល ដាក អ៊ែ។ 15 កយឺវ អ៊ែ ថាំង យឹប  ពអ៊ែ សំបូវ ហ អ៊ឺន តណោះ ដក់ ហ៊ឹ ងឺរ យ៉ាវ  អ្យា ពដូយ អាំ សំបូវ សលែវ សយ កយឺវ តាម រូគ ហ។ 16 អ្យា ឈិះ សំបូវ ដក់ កំបគ់ ឌី កយឺវ រ៉ តកួល ដាក កិ  ម៉ាត់ តកួល ដាក កូដា  អ្យា ហយៀក ពឌឹក ឌូក កិ ប៉ាបៗ ពុនៗ សម៉ើយ។ 17 ដូវ អ៊ែ ឡើយ មែ ចក់ សន់ដ្រាន់ ប៊ឹក វ៉ម ឈុំ សំបូវ អ៊ែ  បក់ឌី ហ ម៉ា នឹង ឝ្រ៉ត់។ មែ ពឌឺស ហ្មបាន ដ្រាគ់ កយឺវ  ឌូង ប៉ុះ សំបូវ អ៊ែ រ៉ិ ឡាន់ ពឺង ផាច ហ៊ឹ ច្រឡះ ស្រមុត សៀរទីស  អ៊ែ សំបូវ មែ សលែវ តាម ឌី កយឺវ ឡា ពឹក ហ ឡើយ។ 18 ប៉ាគ់ ប្រណូវ  ញ៉ន ឌី កយឺវ ពឹក អ្យា ថាំង យឹប  អ៊ែ មែ កលីះ តាក់ សនឺ រ៉ាស ឍឺ ឝឹត សំបូវ ហ្មិះ ទឹ ដាក។ 19 ប៉ាគ់ ហ្មប្រា មែ កគ់ កលីះ តាក់ សនឺ រ៉ាស មែ ឡា យួរ ទឹង សំបូវ អ៊ែ ឋាវ្គ។ 20 កយឺវ អ៊ែ ហ ណាគ់ ថាំង គូ ពឹក អ្យា ដឌែ  តប៊ិច តៃ តង៉ៃ ខៃ ពតួរ យ៉ាវ កឡាំ រង់អូត។ អ្យា តប៊ិច គឹន មឹង ញិវ យ៉ាវ។

21 តប៊ិច ចង់ ចា ឌុញ ម៉ាំង ឡើយ។ ប៉ូល ឌឹក ឆុង ទឹង ងឺរ ខំឡាំង កនុង សំបូវ អ៊ែ  អ៊ែ ឡើយ ហ ហាយ ឌី មែ រៀន៖ «អ៊ឺ អ៊ូគ ប៉ អោះ អូយ  ប៉ាគ់ វែ ម៉ា ចង់ហៀង ប្រម៉ាង អៃ អ្នឌូ ឌូ អ៊ែ  ប៉ាគ់ តវីះ ឝឹត តកួល ដាក គ្រែត អ៊ែ  វែ ម៉ា តលែក រ៉ាស អ្មបាស ឃូច បាក ប៉ាគ់ នែ អ៊ឺម  22 ហាក់ឌី ណិះៗ នែ  ហគ់ ហូក រ៉គ់ មិញ អ៊ូគ ប៉ អោះ អូយ  តប៊ិច មែ ឆិ ម៉ា ត្រ គែត អ៊ឺម កនុង ខំឡាំង បូវ ង៉ាយ នែ  ប៊ិច ឡូវ សំបូវ ឡា ម៉ា ត្រ លុប ឡង់  23 ខង ម៉ាំង អ៊ិន ប៊ិច មរ៉ា ឝឹត គ្រែដៃ ឡា កន់ដ្រាគ់ អៃ ឡា កដាប ហ្មបះ  ហ ឆុង ទឹង ដៀក អៃ  24 ហ ម៉ាង រៀន៖ “អ៊ឺ ប៉ូល  ញ៉ង ឌូង អ៊ឺម  សៃ ត្រ ឆុង ព្រដះ ងឺរ ។ សរ៉ាង  គ្រែដៃ បើម អ្យាគ់ ឌី សៃ  ហ អាំ លែក មែ ឡា ឈិះ សំបូវ អរែង វ៉ា សៃ អ៊ែ ម៉ា ណាគ់ ញិវ លែក”។ 25 អ៊ឺ អ៊ូគ ប៉ អោះ អូយ  ហគ់ វែ ហូក មិញ  ឌីខង អៃ សឿ គ្រែដៃ  កាន អ៊ែ ម៉ា កើត សយ ប្រម៉ាង ឞាវ គ្រែ ឡា ហាយ ឌី អៃ អ៊ែ ឡើយ  26 ហាក់ឌី ង៉ាយ ម៉ា ត្រ គីន ទឹង ពឹះ តកួល ដាក»។

27 សំបូវ អ្យា សលែវ រ៉ ដាក ស្រមុត អាឌ្រីយ៉ាទិក ឌុញ ម៉ាំង ឡើយ  ដូវ ជិត ពួន តង៉ៃ រ៉ិ អ្យា ឡា ញឺស អ៊ែ  អ៊ែ ប៊ឹះ ម៉ាំងៗ  បូវ មែ ឡា គូលី សំបូវ អ៊ែ  មែ គឹន រៀន ម៉ា ឈឹង ដាល់ ប៊ឹះ ពឹះ ឡើយ។ 28 មែ កលីះ ឆមឺ ប្រវ៉ិះ កនុង ដាក  មែ តៃ ចំប្រ៊ុ បារ ជិត ស្រដូវ បនិះ  រ៉ិ ហ៊ឹ ងឺរ ឞៀតៗ  មែ កលីះ ឆមឺ ប្រវ៉ិះ កនុង ដាក មូយ រន់ទុះ ឋាវ្គ  មែ តៃ ចំប្រ៊ុ ជិត សើង ស្រដូវ បនិះ។ 29 ញ៉ន ឌី ឌូង ប សំបូវ អ្យា ម៉ា សលែវ ឍុញ ហ៊ឹ តម៉  បូវ មែ កលីះ ម៉ាម ពអ៊ឹង សំបូវ ពួន អ្មប៉ម តូយ ត្រិច  អ៊ែ មែ គូ អាគ់ថាន ចាំ ប៊ឹះ ត្រះ។ 30 បូវ ឡា បើម គូលី សំបូវ អ៊ែ មែ ងុញ ត្រយ៉ាវ តាក់ សំបូវ  មែ តនែង អ្មបារចាក់ ពឌឺស ឌូក កិ ទឹ ដាក  មែ បើម ពតាគ់ ប៉ាគ់ កលីះ ម៉ាម ពអ៊ឹង សំបូវ តូយ ងឺរ។ 31 ប៉ូល ហាយ ឌី ណាយ តហាន វ៉ា កួន តហាន រៀន៖ «ប៉ាគ់ បូវ មែ នែ តគូ កនុង សំបូវ អ៊ឺម  វែ លែក រ៉ា ម៉ា គែត ម៉ាត់ ម៉ាត ឡើយ»។ 32 បូវ តហាន ច្រិះ ឆមឺ  ពលែវ តាក់ ឌូក កិ អ៊ែ ប៉ាត់ តាក់។

33 និះ ឈឹង ដាល់ ប្រាង  ប៉ូល ចន់ដ្រា លែក មែ ចង់ ចា  ហ ហាយ ឌី មែ រៀន៖ «វែ គូ ឌី វ៉ល់ កតល់  វែ ក្រាំង ចណា កណាប់ ជិត ពួន តង៉ៃ ឡើយ  វែ តប៊ិច ចា នែវ ឆិ សអួះ ពនែ។ 34 ពអ៊ែ អៃ ឡា វែ ចង់ ចា មិញ  អ៊ែ វែ ម៉ា ញិវ  ខង កនុង បូវ វែ នែ តប៊ិច ដើម មូយ រ៉ា ម៉ា ប៉ាត់ អ៊ឺម»។ 35 ដូវ ហ ហាយ ឌី មែ ពអ៊ែ  ហ ចក់ នំប៉ាំង អាគ់ថាន ហាយ កាន ហូក ឌី គ្រែដៃ ពឹង ងឺរ បូវ មែ លែក រ៉ា  អ៊ែ ឡើយ ហ កដោះ នំប៉ាំង អ៊ែ ចា ប្រើយ។ 36 មែ ដុង ហូក ទឹង ចាក់ មែ ឡើយ  អ៊ែ មែ ចង់ ចា ពទឺ។ 37 ខំឡាំង អ្យា កនុង សំបូវ អ៊ែ  ប៊ិច បារ ក្លាំ ប៉ឹះ ជិត ត្រូវ រ៉ា។ 38 ហ៊ឹ មែ ចង់ ចា ផិ ឡើយ  មែ ហយៀក កលីះ កប៉ូវ ចិះ សាលី ហ្មិះ ទឹ ដាក  បក់ ហ ម៉ា ហយ៉ូច សំបូវ អ៊ែ។

សំបូវ ក្លាំ

39 ហ៊ឹ ត្រះ តប៉ៃ ឡើយ  មែ រ៉ាង ពដិះ ហ៊ឹ ងឺរ អ៊ែ  មែ តា សឝ៉ាវ ពដិះ អ៊ែ អ៊ឺម។ មែ តៃ ហបៗ ស្រមុត ឡា ប៊ិច ផាច រ៉ ពឹះ។ មែ ឃឹត មុត ពឝ៉ើន សំបូវ ហ៊ឹ អ៊ែ  ប៉ាគ់ កណា ម៉ា បើម ប៊ឹះ ហ៊ឹ អ៊ែ។ 40 មែ ឡិះ ឆមឺ ប៊ឹក ម៉ាម ពអ៊ឹង សំបូវ កលីះ តាក់ ទឹ ដាក  ដូវ អ៊ែ មែ ឡិះ ឆមឺ ចំផើ ពទឺ។ អ៊ែ មែ ពឌឹក ហ្មបាន ដ្រាគ់ កយឺវ តូយ ងឺរ បក់ឌី សំបូវ ម៉ា ដក់ ហ្មិះ ហ៊ឹ ពឹះ។ 41 ហាក់ឌី សំបូវ តូយ ងឺរ ហ គឺង ឌី ផាច  អ៊ែ តូយ ត្រិច សំបូវ អ៊ែ  ហ ប្ល៉ះ ញ៉ន ឌី ដាក ឡា ផង ដះ ពឹង ហ។

42 បូវ មែ តហាន ងុញ កជែត តាក់ បូវ កន់ថូត លែក អ៊ែ  ឌូង ប៉ុះ មែ កន់ថូត ឍឺ រ៉ា ម៉ា រែ ដាក ព្រដិច ចាក់។ 43 ហាក់ឌី ណាយ តហាន ងុញ សវ៉ាក់ ប៉ូល តអាំ មែ កជែត ហ អ៊ឺម  ហ តអាំ បូវ កួន តហាន ហ អ៊ែ បើម សយ ខំឃឹត មែ អ៊ឺម។ ហ ប្រ៉ៃ លែក មែ ឡា ណោះ រែ ដាក  ជ្រុះ រែ ដាំង ពឹះ ឋួរ  44 ចនែក មែ ឡា តណោះ រែ ដាក  ហ ប្រ៉ៃ មែ រ៉ាប់ កប៉ង់ ពឹង កតារ  កប៉ង់ ពឹង ព្រឡះ សំបូវ រែ តូយ ត្រិច។ ពអ៊ែ មែ លែក រ៉ា អ៊ែ ប៊ឹះ ហ៊ឹ ឝ៉ូក អ្យាគ់ៗ។