កណើត ពដិះ គ្រែ 8

ណូអ៊ែ ញឺស ឝឹត ឌូក ទិះ

គ្រែដៃ ហ ចនិះ ឌី ណូអ៊ែ  វ៉ា សនឺ ស្រ៊ុក  សនឺ ប្រ៊ី លែក អ៊ែ ឡា គូ អរែង វ៉ា ហ កនុង ឌូក ទិះ អ៊ែ។ អ៊ែ ឡើយ គ្រែដៃ បើម កយឺវ ពឹក ពឺង ពដិះ គ្រែ  អ៊ែ ដាក ហ ស្រាក់ ចាំ ស្រាក់។ 2 អ៊ែ ដាក ឡា ប្ល៉ុះ ឝឹត ពដិះ  វ៉ា គ្រែ ឡា ប៉ើក បហយ អ៊ែ  ហ ប៉ាំង ឋាវ្គ  វ៉ា គ្រែ ឞ៊ឺ កគ់ ហ ត្រះ ពទឺ។ 3 ដាក កគ់ ចាំ ស្រាក់ ចាំ ស្រាក់។ មូយ ក្លាំ សើង ជិត តង៉ៃ រ៉ិ អ៊ែ  ដាក ហ ស្រាក់ ឡើយ។

4 ប៊ឹះ តង៉ៃ ជិត ប៉ឹះ  ខៃ ប៉ឹះ  អ៊ែ ឌូក ទិះ ហ គឺង ពឺង ចន់ឌូ អារ៉ារ៉ាត។ 5 ដាក ហ គូ ស្រាក់ ដឌែ និះ ប៊ឹះ ខៃ ជិត។ ទឹង ខៃ ជិត តង៉ៃ មូយ  អ៊ែ មែ តៃ ហ្នដើម ឡូវ បូយ ចន់ឌូ។

6 ប្លូច ពួន ជិត តង៉ៃ ឋាវ្គ  អ៊ែ ណូអ៊ែ ហ ប៉ើក ឝ៉ឡោះ ហ ឡា បើម ទឹង ឌូក អ៊ែ។ 7 អ៊ែ ហ ប្រ៉ូស កអាក មូយ  ហ ប៉ារ់ ជឹ ដក់ ដាល់ ឌី ដាក ស្រាក់ ប៊ឹះ ពដិះ។ 8 ដូវ អ៊ែ ឋាវ្គ ហ ប្រ៉ូស ជែម ព្លឹក មូយ  បក់ឌី ណោះ រៀន ដាក ឡា ស្រាក់ លែក ឡើយ។ 9 ហាក់ឌី ជែម ព្លឹក អ៊ែ  ដាំង ឞន ជ្រឹប តបើម តៃ អ៊ឺម  អ៊ែ ហ ប៉ារ់ ជឹ ដាំង ណូអ៊ែ កនុង ឌូក  ឌីខង ដាក ណាគ់ ទិះ ប៊ិង ពដិះ គ្រែ នែ។ អ៊ែ ណូអ៊ែ លូក ចក់ ហ តមុត កនុង ឌូក ឋាវ្គ។ 10 ដូវ អ៊ែ ណូអ៊ែ ចាំ ប៉ឹះ តង៉ៃ រ៉ិ អ៊ែ  អ៊ែ ហ ប្រ៉ូស ជែម ព្លឹក ឝឹត ឌូក អ៊ែ ឋាវ្គ។ 11 និះ ប៊ឹះ ហ៊ឹ អ្មប៊ឹ  ជែម ព្លឹក អ៊ែ ជឹ ហ៊ឹ ហ ឋាវ្គ  ហ្នដឹប ហ ឝ៉ង់ បិច អូលីវ។ អ៊ែ ណូអ៊ែ ហ ណោះ រៀន  ដាក ស្រាក់ ឞ៊ែត ឡើយ។ 12 ហ ចាំ រ៉ាង ប៉ឹះ តង៉ៃ ឋាវ្គ  អ៊ែ ហ ប្រ៉ូស ជែម ព្លឹក អ៊ែ ហ្មិះ ហ៊ឹ លង៉ាវ មូយ លឺក ឋាវ្គ  ហាក់ឌី ជែម អ៊ែ តជឹ ហ៊ឹ ហ យ៉ាវ។ 13 សាគ់ ណូអ៊ែ អញុ ត្រូវ ក្លាំ មូយ កម៉  កនុង តង៉ៃ មូយ  ខៃ មូយ  អ៊ែ ដាក ស្រាក់ ឡើយ ឝឹត ពដិះ អ៊ែ។ ណូអ៊ែ ហ ប៉ើក កំពូ ឌូក  ហ រ៉ាង តៃ ពដិះ ឝ៉ូក លែក ឡើយ។ 14 ប៊ឹះ តង៉ៃ បារ ជិត ប៉ឹះ  ខៃ បារ  អ៊ែ ពដិះ អ្យាគ់ ស្រាំង ឡើយ។

15 អ៊ែ គ្រែដៃ ហាយ ឌី ណូអ៊ែ រៀន៖ 16 «ហគ់ សៃ ញឺស ឝឹត ឌូក នែ  អរែង វ៉ា ទ្រី សៃ  កួន កឡ សៃ  វ៉ា ហ្នដឹប កម៉ាន់ ម៉ាយ សៃ ពទឺ។ 17 ហគ់ ពញឺស លែក ឌី សនឺ ឡា គូ អរែង វ៉ា សៃ  យ៉ះ ជែម ចណាយ  សនឺ ឈឹង ពួន  វ៉ា សនឺ ឡា លឡរ វ៉ារ ពឹង ពដិះ  បក់ឌី មែ ម៉ា ពឝ៉ើត កួន ចូវ អាំ អើន ស៊ឺក តាក ប៊ិង ពដិះ គ្រែ នែ»។ 18 ពអ៊ែ ណូអ៊ែ ហ ញឺស ឝឹត ឌូក អរែង វ៉ា កួន កឡ ហ  វ៉ា ទ្រី ហ  វ៉ា ហ្នដឹប កម៉ាន់ ម៉ាយ ហ 19 វ៉ា លែក ឌី សនឺ នឺ  ប៉ាគ់ ឡា សនឺ ឈឹង ពួន  ជែម ចណាយ  វ៉ា សនឺ ឡា លឡរ វ៉ារ ពឹង ពដិះ  កគ់ ញឺស ឝឹត ឌូក សយ នែវ ហ ពទឺ។

20 ដូវ អ៊ែ ឡើយ ណូអ៊ែ ហ បើម ឞន ប៊ុះ ម៉ប ឌី គ្រែដៃ យីហូវ៉ា។ អ៊ែ ហ ចក់ សនឺ ឈឹង ពួន ត្រំ នែវ ឡា អ្យាគ់ ស៊ែះ  វ៉ា ជែម ត្រំ នែវ ឡា អ្យាគ់ ស៊ែះ  តៀត ប៊ុះ ម៉ប ហ៊ឹ គ្រែដៃ។

ណូអ៊ែ បើម ឞន ប៊ុះ ម៉ប ឌី គ្រែដៃ យីហូវ៉ា (8:20)

21 សាគ់ គ្រែដៃ យីហូវ៉ា ហ ដុង ត្រ រូគ ឌី តូរ អ្មពី អ៊ែ  ហ ឃឹត កនុង ប៊ុត ហ រៀន៖ «អៃ ម៉ា តា យយ៉វ ពដិះ នែ ញ៉ន ឌី បនិះ យ៉ាវ  យ៉ះ ខំឃឹត មែ ឃឹត ឡូវ កាន តហ៊ិ តើម ឝឹត អ្ងគ្លែត ឡើយ។ អៃ ម៉ា តា ថំឡាយ លែក ឌី សនឺ ឡា ប៊ិច ក្លើម សើម យ៉ាវ  ប៉ាគ់ អៃ ឡា ថំឡាយ មែ ពឋើម អ៊ែ។

22 កាស ឌិវ ឆិ ណាគ់ ប៊ិច ពដិះ គ្រែ 

អ៊ែ ធុន ឆមូ ចួយ  ធុន សួត រ៉ិះ 

ធុន ដុ  ធុន ឝ៉ 

ធុន ឞ៊ឺ  ធុន ប្រ៉ាំង 

តង៉ៃ វ៉ា ម៉ាំងៗ

ហ ម៉ា តប៊ិច ប៉ាត់ ពណាត់ អ៊ឺម»។