Yayqoobeyndo Na'i Yuuday Anso Woosso
1
Burona sawo
1 Yesuusi Kristosa maalaara Yayqoobeyndo na'aara maaqe Yuudakofa.
Ade maaqe Wontoy eeti xheydine Yesuusi Kristosana kafutteseesituse uddi anxutta woosso.
2 Wonto maaroy, modhetey, eehay hinuse laguwaye.
Zaade eruseesiti gisha
3 Ta eehe ta badito! Ni uddina haybowafa Wontoy nimba waakeysi e maardosa hinuse diizese orjena wordiko ta yecha. Worguwamba baaka haylaxituse sekke be lakkuwasa bidziyawo ingutta aadexose hi karduttoronike hinumba osusese hinuse ta diizoronike taase orjena worgusesa maaddhi bentiko e yese. 4 Wonto jhashe eruwasiti aachiyaanna hi giddaaka gelliko u yese. Ye usiti "Wontoy axuse keenge maxoy modhewo e maaqe gisha nu col'esa nu hantoronike numba tuce abakoy baasso" yeydi Wonto maxo arxeesitaara esawoy nuuse Laaxaara numba ahesaara maaqe Yesuusi Kristosase "Nuni esuse woosuttuwanxhiko" hidi hineesitaarako. Ye uso bissheshe axiti gara e yaa'uttenike burussiko e diizuttese.
5 Laaxi be axita Gibxhe wudiyafa e kesso. Kesuwaye baaka ye e geede biya aadesso baasita e baysonike haanxho uddi erako hi ere. Eresa hi maaddhakoni ye esa sekke hinumba maxusesuko ta worge. 6 Yeydiwo beese ingutta adetoy "Ellako e elle" yeydi hido badi yesine be godo datta afaa yecha woosaxita gaxhuwayte. Ye usita Wontoy koolo makki aallo tufiyaka u yesoronike shanna cenchaaka keddaydese yaa'a wonte aalloko e gaddese. 7 Ye esukewo Sodome katamani Gamora katamani u googiya yecha katamitini laggetowa gelli asanxaara maachaaray wolko muhicho oge arsi maaquwa ogena wolko u muto. Ye usiti buro gara koolo makkina yese tamana yaa'utte cubbachiti bisha maaddhiko u yese.
8 Ye esukewo ye axiti afukka afutti ye esuna durkuttisineko tunase biya mati tunaxe u maaqe. Wonto adetoni haassi afaaka kuxa fuula keenge afaase woosaxitani u cashe. 9 Afaase woosaxituse afana maaga maaqe Mika'eeleni Muse aha gisha Humbayaara wolko be bersoniyaka "Laaxi nemba muruwaye!" yeydi e hidosa baaka esa cashena e gara yaa'ese naasso baasso. 10 Ye axitimay be eruwa abakoko uddi u cashe. Usini axe maaddhi meddhuttechine hade gaxe keenguwa keemokeko u maaddho. U ere eray uso baysesako e maaqe. 11 Qaa'eele oge u hando gisha miijhemeydi hissine hade Baala'aameke halli u undese gisha, hade Qoreke afana maaga gara toora densi u baadese gisha uso baduffu!
12 Ye usiti Kristosa eehaafa densi wolko hi muune tato giddaaka bidzoni borso keenguwasa hinunaara wolko utti muunne beesewo maxe tunaxitako. Ye massalaaka dhumoko u maaqe. Usini hade agexi ur'i etti dhaddi hange ira keenguwa dhumake yeseesitako. Mixi aafe kaxhe agunnaaka be gara aafe keenguwa e xhabhowafa shoddi dattine lam'i wogga haydhese mixuke yeseesitako. 13 Usini hade iitana jhirahoy densese bagadeko u bishe. Ye e bisha jhirahoy goffunto beysenikeko usini borsuse be hanta u beyse.
Hade Wontoy naddhi gaddecho godofa arti be godo hallese xhoolinteko u bishe. Wontoy ususe naddhese godoy koolo makki aallo shanna cenchaako.
14 Addaamiyafa ayti laappunxo yeleta maaqe Henookey ha axiti gisha kaayo zeerisine "Laaxi laga kumana taafutte afaase haylaxitaarako wolko e yoone. 15 E yoonesini uddi axi gara yaa'ese, Wonto jhashuwashiti uddi u hanto iita u hantanaara Wonto u cassho cashonaara uddi 'Baysiko hi yese' hidi u gara yaa'esuko" yeydi e hido.
16 Ye axiti uddi wogga umbu umbu hineesitaara abanani maggese danda'uwa baysowo taaggisine be iita col'a geede hangeesitaarako. U nuunay nashona kundesesako, beese bemba go'ese wordiko yahowo axe kedda kedda uyse.
Miindi ee'e e worguse gisha
17 Ta eehe ta badito! Hinunimay nu Laaxi Yesuusi Kristosana anxuttaasiti ha e buro zeerdechosha gaxhuwayte. 18 Zeerisineni "Aallicira woggaaka iita be maxo geede hangisine hayla maaqe abako gara dhaaddesitako yoonesa" yeydiko u hidecha. 19 Ye usini Ayaana Geeshe keenguwa acho maxo geede hange axitako. Usoko axiti wol garafa shahuttoronike mahesa.
20 Ta eehe ta badito! Hinunimay uddime gardi haylondese hi aadexona wola dicheshe oseywayte. Ayaana Geeshi osana shi'uwayte. 21 Nu Laaxi Yesuusi Kristosay be maarowafa densi koolo makkina yesowa hinumba e ellusesa kakkisine Wontoy hinuse indese eehaafa kese baaka essaa yesuwayte.
22 Aadexo gara eezo keengeesituse shene'uwayte. 23 Bidzi bidzi axita tamaafa shoddi ettonike etti haybowafa maaruwayte. Cubbowa hi geluwannike jhasshishine fedeesituseni shene'uwayte. Yeysi mahisine modhussi hinumba katti u cubbowafa dendasuna tuneydese u gara dollese maa'o fetto inxha'uwayte.
Yuuday Wontose kuxa indo
24 Hi unguwannike hinumba kakkisine magganaara haasse keenguwasaara kuxa fuulana yese be buro hinumba uqusese e danda'e. 25 Nu Laaxi Yesuusi Kristosa badena numba haybowafa maardi esawoy Wonto maaqesuse beritume uddi e buroni maaqqe hatteni koolo makki aalloni kuxay, fuulay osaara adetowaray maaquwaye. Ameen.