Anxutta Phawlosey Filmonase Anso Woosso
1
Burona sawo
1 Yesuusi Kristosameydi hissine tufuttese taa Phawlosekofaara nu indo na'i Xhimootoosekofaara.
Nuni hantenike hantiya yese nu eehe Filmona neesuko ha woosso nu anxe. 2 Yeydiwo nuundo busho Afibiyaseni, kaati tooraxi dargenike modhe odo gisha nuura dargiya yese Arkiphaaseni, ne zawaa bhikkilutte Wonto zawa axituseniko ha woosso nu anxe.
3 Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.
Phawlosey Filmona gisha Wonto galatto
4-5 Laaxi Yesuusa ne aadexenikiyara Wonto aadexeesita ne eehenikiyara ta siido gisha Wonto ta shi'e woggaaka nemba massiko uddi wogga esa ta galate. 6 Kristosase nu maaqenike nu keenge modhe zeerey uddi neese modhussi gelete ne aadexo fedase shahena ne oseyoronikeko Wonto ta shi'e. 7 Nuundo na'e, Wonto aadexeesiti muxhuro ne doojhusho gisha ne keenge eehana keddaysi maddiko ta oseydese.
Anasimoose gisha
8 Kristosay taase indo adetona worguse base ne hantoronike "Ha esa hantuwa!" hidi nemba woosesuko ta danda'icha. 9 Hattema eehay niise yese gisha nemba shi'eko ta wordese. Ta shi'esa nemba siye e worgusesi tani Phawlosey cindesesaara hatteni Yesuusi Kristosa gisha tufuttesesaara ta maaqe gishako. 10 "Nemba ta shi'e" hidi ta hidosi Anasimoose gishako. Tufe zawa yesineko Wonto e aadexoronike mati tayne ta yele e maaddho. 11 Esini ha esume buro niya go'esa maaquwadiko e yecha, hattema niyani taani go'esa maaddhiko e yese.
12 Esani matiko neeko ta anxe, ta muxhuroni e garako yese. 13 Modhe odo gisha haya tufutti ta yesune neni taa marasshe gisha taa marisine hana taara e attorosa wordiko ta yecha. 14 Maaqe baaka mahese neyne modhe zeerey eehana baaka osana e maaquwannike hissine niya oycci eehusso badi abani mahese worguwasso. 15 Anasimoosey hatte oddhe woggasewo ne garafa e shahuttosi haliya hanzowafa ayti sekke uddi wogga neera wolko yesesuko e maaqe. 16 Ha e geede sekke neera e yese yesoy hade maalake maaddho badesine maalame gardi hade eehuttese neyndo na'ukeko. Esi taase fetto ta eehe Nuundo na'uko. Nenimay neese hantesa e maaqe gishaara Kristosana neyndo na'e e maaqe gishaara taame garsiko esa ne eehe.
17 Yoonase aadexoy nimba bidzo matosuna neyndo na'ukeysi taa beeta'ayko Anasimoose taa ne beenenike esa beedi ekkuwa. 18 Nemba e miidho basi yesa'ayko ta gara taakuwa, miijhe e ettesso tanko neese shamara. 19 "Tanko neese shamara" hidi hissine hay tanko Phawlosey ta kuchena neese diizesa. Neni neese yeso ne degessoy ta badena e maaqe gisha fetto neese ta mato base zeerese worguwasso. 20 Yoonase nuundo na'e, Laaxume hissine ha modhe hanta ne hantorosako ta worge. Odde, Kristosa beedi ta muxhuro doojhushuwa. 21 Fetto nemba ta oycoshumeni garsi ne hantenike erdi taase ne woosuttenike eezzo badesineko ha esa neese ta diize.
22 Feday assi Wontoy hi shi'e siidi tufiyafa taa e birchenikiyara hinuko ta maaqenikiyara gobbo ta keenge gisha godo taase naquwa.
Aallicira sawo
23 Yesuusi Kristosa gisha taara tufutti yese Ephafray "Ta sawo ohuwa" hidiko e sawuse. 24 Yeydiwo taara wolla hantiya yese Marqoosey, Aristrokosey, Demaasiyara Luqaasiyaray "Sawa ne yese?" hidiko sawo neese u anxe.
25 Laaxi Yesuusi Kristosay axuse keenge maxo modhetey hinunaara wolko yesuwaye.