4
1 Wonto burowara, en'a yeseesiti garani maaqqe haydheseesiti gara yaa'ese hine Yesuusi Kristosa burowara e yoone wontiyara e kaatetowaara maxisine odde hissine neese ta ohesi 2 Wonto kato ohuwa, e bishe woggani maaqqe e bishuwa woggaa hantese naquttesesa maaquwa, keddaydese danda'onaara erusenaara gayluwa, kashuwa, osusuwa. 3 Ha esa esume ta otosi axiti doomete facete keenguwa erunxe siyese u inxha'e woggay yoone gishako. Yeydi hiyoni be col'e abakoy gizoronike be worgesa eruse eraxitako beese u bhikkile. 4 Aade gara shasha matiko go'uwa mamako siyese u eehe. 5 Neesema neni uddi basi zeere e worgusenike hante toyya axe maaquwa, maddhani danda'uwa, modhe odo oheesiti hantenike nenini hantuwa, Wontoy neese indo hanta uddina hantuwa.
Phawlosey be gisha zeerdosa
6 Hade kaashay kaashuttenike kaashuttese uddhiko ta yese. Ha saha garafa dhaddi ta hange woggay elliko yese. 7 Modhe kardoko ta kardutto, ta woxeni woxxhi alsiko ta yese, ta aadexoni kattiko ta yese. 8 Ha e geede tamba kafiya yesesi gizetena ta yesso gisha ta qinowa gadutte mooreko. Ye moore taase ye wonte ingesi gizo yaa'a yaa'e Laaxuko. E ingesi ta goshushewo e maaddho baanne e addeynesa orjena wordi kakkiya yese uddi axusuko.
Phawlose muta maddha gisha
9 Ukkenawo taako yoowese karduttuwa. 10 Demaasey ha saha eetiko ta garafa dhaddi shahutti Teselonqe katamaa handese. Qarqisey Galatiya wude Titoy Dalmaxhiya wude hidiko u handese. 11 Luqaase goshewoko taara wolko yesa. Marqoosey tamba laga basuna marese e danda'e gisha ne yooworoniyaka neera etti yoowwa. 12 Tikiqose Efesooniyako ta ansese. 13 Assi taako yoosine Xhiro'ada katamaa Karpaase da'aa ta dattecho toyya maa'owara ta fissharitaara fetto biraanna fissharitaa etti neera yoowwa.
14 Qanga hashushi abako hante Iskindirey keddaydese maddhako ta gara e ellusso. Ye e gisha Laaxi e hantake e wooma shamako e shange. 15 Nu otosa uddi iitanawo e inxhadhese gisha e garafa nenini nemba modhussi kakkuwa.
16 Ta luufutto luufuse sekke e utta mahese yaa'axiti buro acha ta eedho wonte be uddina taa dhaddi u handosa baaka ooneni tamba marday baasso. Ye esa Wontoy ususe hade miidhakeysi mati taattofe. 17 Modhe odoy be kumena ta badena ohuttoronikiyara Ayhuda maaquwa fede ommiti be uddina siyoronikiyara Laaxi taa kiiddhiko osani taase e indo. Garma asshaafani tamba e maardo. 18 Laaxi an basi iita hantaafani taa kessiko afaa yese be kaatetiyaka e elluse. Esuse aallicira keenguwasa koolo makkina kuxay maaquwaye. Ameen.
Aallicira sawo
19 Ha ta sawo Pharsiqilaseni Aqilaseni ohuwa, assi Onesifore zawa axituseni ohuwa. 20 Erasxhoosey Qorontoose katamaako atto. Trofimosey hardineko Milixhine katamaaka ta dhaddo.
21 Bargo agexib yoone woggame buro taako ellese karduttuwa. Awbuloseni, Fudeseni, Linoseni, Qelawdiyaneni maaqqe aadexeesiti fedeesitini uddiko sawo neese u anxe. 22 Laaxi neera wolko yesuwaye.
Wontoy axuse keenge maxo modhetey hinuse maaquwaye.