2
Kristosase modhe tooraxe maaqe gisha
1 Yebo ta na'e Xhimootoose! Yesuusi Kristosaara bidzo ne maaddhosuna Wontoy neese be keenge maxo modhetiyafa neese indo eehana oseywa. 2 Laga axiti buro taakofa ne erdese era fedeesita erusese era keengeesitusaara muxhuro keengeesitusaara odde hissine garxuwa.
3 Neeseni Yesuusi Kristosa modhe tooraxe maaddhi ne gara yoone maddha fedeesiti dandadhonike dandadhi garxuwa. 4 Tooraxi ye toorase afana maaga maggusese worge axuko baaka fede be yeso jheetiya geluwasso. 5 Yeydiwo gaaddo woxhe axi e worguse wogake be kardutto baa aallo esaara be woxhichosha iisshi moore efese danda'uwasso. 6 Wootaa wootti gakke wootaadey ye woota kaxhe kaxa muune axitume burona muunesi esako. 7 Laaxi uddi abakose gaxe neese e inge gisha neeko ta ohesa uddi hossi kessi maxuwa.
8 Dawite bohiyafa maaqe haybowafa denda Yesuusi Kristosa maxuwa. Tanini ohiya yese modhe odoy ye esako. 9 Hade woga garda axuke ta tufuttoro aallo maddhay ta gara yoodosi ha modhe odo gishako. Tani tufuttoose baaka Wonto katomay beese tufuttuwasso. 10 Yesuusi Kristosana benta loolowara koolo makkina kuxa fuulaara u degexoronike Wontoy xhardese axitume hissineko uddi base ta danda'e. 11 Ha zeeruttiya yese zeerey aadeko. Ye esini
"Esaara ni hay'o'ayko,
esaara wolkoko en'a maaddhi ni yese;
12 uddi basuna dandadhi ni miimo'ayko,
esaara wolkoko ni kaate;
'Esa eruwanxhiko' hidi ni hitta'ayko
esini assi nimba 'Uso eruwasso' hidiko e hine;
13 Nini esaara wolko bidzi muxhurona yessi bente nu dheeba'ayko
esi beese be yese godofa artese be danda'uwa gisha
be maxo garafa be geede gara maaquwasso" yeydi hinesako.
Gakkuwa hantaxi gisha
14 Ha esa modhussi u gaxhoronike axuse ohuwa. Kato seyafa hayafa etti e gara u bersuwannike uso "Wontoy beyako e yese" hidi hissine minsi kashuwa. Ye esa bishe bersay siineesita e baysesa baaka abani go'uwasso. 15 "Ha esi modhe hantaxuko" hidi Wontoy nemba hidesesa maaddhi ne bentoronike oseywa. Be hante hantana borsuwa aade maaqe Wonto kato e yesenike erusiya yese hantaxuke hantuwa. 16 Wonto kuxusuwasa maaqe go'uwa odoy axiti Wontokofa dhaddi zaroronike e mahe gisha ye esa bissheshe odo garafa neese dhaddi zaruwa. 17 Ye erusiya u yese eray hade haybose elluse madakeko bootti e muune. Ye ussaakako Hermenosiyara Filetosiyaray yese. 18 Ye usiti "Haybo denxoy maaddhi gardiko e yese" hidi hissineko aade ogiyafa beese dhaddi u kesso. Erusiya be yesesuna bidzi bidzi axita u aadexo garafa olliyako u yese.
19 Sekke hanke en'ese danda'uwa Wonto kaachomay kaachutti eedhiko e yese. Ye eedhese kaacho gara "Laaxi beese maaqeesita erako e ere" yeydi hinesaara "Laaxi sunxe xheygesi ooneni iita garafa dhaddi zaruwaye" yeydi hinesaarako diizutti yesa.
20 Zawa mallaaka laga bisha miijheko yesa. Bidzi bidziti worqiyafaara birriyafaara fedeesiti assi missaafaara sahaafaara hantutteseesitako yesa. Bidzi bidziti kuxuttese hanta gara fedeesiti assi acheysha hanta garako u feyshe. 21 Ha e gisha haanxhi zeere iita inxhadhi geeshe maaddhi yese axi kuxuttese hanta gara feyshe miijheko e bishe. Uddi modhe abako marese naquttese miijhey hayloondesesaara zawaadese go'esaarako.
22 Yoonase, neni mulloontey oone iita col'a garafa neese dhaddi ba'uwa. Geeshi muxhurona Laaxe kuxeesitaara wolko gizeteni, aadexoni, eehani, modheteni ne gara gaddi esaara dicuwa.
23 Go'uwasa maaqe birche keenguwa bersay koyse e oonesa ne ere gisha e garafa neese dhaddi zaruwa. 24 Laaxi hantaxi uddi axuse shenaxe, axe erusese era keengesa, danda'esa baaka koyse denxesa maaqe esa worgusuwasso. 25 Bemba inxha'esa shenona eruseko esa e worguse. Haliya Wontoy aade u erorosa be cubbowafa dhaddi u maaqoronike mahesuko e danda'e. 26 Ye esunako Humbayey beese be maxo alsese be harbhana uso aytechoshaafa biya gaxxhi tulxhese u danda'e.