5
1 Cindese adiyaxhita hade niyadekeysi beedi eehana uso gayluwa baaka u gara miindofuna. Mulla maaqe asanxita hade neyndo na'axhekeysi usaara zeeruwa. 2 Cindese indowaxhitani neyndo ne beene aafena beewwa. Yeydiwo bunaycitani hade neyndo bunaycekeysi col'e baaka keddaydese geejhetena beewwa.
U adey baadese indowaxhiti gisha
3 Biya maresa keenguwa u adey baadese indowaxhita kussi modhussi aykuwa. 4 I adey baadese indoy naysheni maaqqe obobaxhe i keema'ayko burussi ye nayshiti Wonto be kuxenike be zawa gerituse modhe hanta hantena beyse lossuttuwaye. Yella geriti bemba aytonike nayshi uso mati aykeko e worguse. Ye e bisha hantay Wonto maggusako e magguse. 5 I adey baadesune bemba maresa keenguwa indoy Wontoko i gobbe. Wonta qama Wonto miindi zeerussiko be maddhase i shi'e.
6 Ha saha magganawo yese indoy ee'isidi haydhiko i yese. 7 Bidzoni haasse keenguwasa u yesoronike uso ha ta woosso erusuwa. 8 Be iginituse fetto be zawa axituse worguse abako mahuwasi be aadexo dattiko e yese. Wonto aadexuwasitumeni gardese iitako.
9 I adey baadese indo sunxe essa diizusosa ne diizesi i beray izzuppi tammume wokke maaddhesesaara bidzi adewo gellecha indowarako. 10 Isini nayshe modhussi dichena, borsa mokkena, yekke ullaydi aadexeesituse worguse abako hantena, maddhundeseesita marena fede fede modhe hanta hantena haanxhi modhete hantana eruttese indo maaqeko e worguse. 11 U adey baadese mulla maaqe indowaxhi sunxe diizzi ettofuna. Ye usiti buro garako u acho maxoy uso iichete Kristosase be caadhecho caaqo dhaddi ade gele u worge. 12 Hikketeko buro be caadhecho caaqo be woddusso gisha be gara e yaa'uttoronike u mahe. 13 Yeydiwo hanta keenguwasa maaddhi se zawa ha zawa hante u losse. Ye esawoni e maaddho baane zeerese uso e worgusuwa zeere zeerdiko axe u gunce, biya gelsuwa fede axi zeeriya u gele. 14 Ye e gisha u adey baadese mulla indowaxhita "Gelli nayshe yelli be zawa modhussi ahuttuwaye" yeydiko ususe ta hine. Yeysi u matako iilaxi u gara bidzi haasuse abakoko e dheegge. 15 Hattema ye ussaafa bidzi bidziti dhaddi Humbayeko maaqe aytiko u yese.
16 Ooneni aadexiya yese indoy be iginiti giddaa u adey baadese indowaxhiti yesa'ayko Wonto zawaxituse idda u maaqeesume ye indoy uso maruwayya. Yeydi e maaddho geede Wonto zawaxiti fetto bemba maresa keenguwa u adey adey baadese indowaxhita maresuko u danda'e.
Cimiti gisha ohutta woosso
17 Wonto zawaxita modhussi ahiya yese cimituse fetto Wonto kato ohenani maaqqe erusena gakkeesituse u wooma keddaysi shameko e worguse. 18 Hayla Fissharowa "Kaxa bukkiya yese maydo nuuna tuttofuna!" fede godo assi "Hantaxituse ye u hanto wooma miijhe shameko e worguse" yeydiko e hine. 19 Wonto zawa cimiti gara dende luufose lam'i oo'oyne haydzi axi bidzi maxo e gara indo baasa ye luufo ettofuna. 20 Cubbo hanta axe fedeesiti beedi jhashorosa uddi aadexeesiti buro muruwa.
21 Wonto burowara Yesuusi Kristosa burowara kuxuttese Wonto woosaxiti burowara "Ha esa hantuwa" hissine neese ta otosuna ne hantoronikeko odde hidi ta hine. Ye esini "Ha esi mallako, ha'esi eeroko" hidi shir'i ne hante abako hantofuna. 22 Oone garani haliya alleydi cima maagexese ne kuche gaddofuna. Fediti cubbowa gelli usaara bidzo maaddhi shatoppuna. Nemba geejhetena modhussi kakkuwa.
23 Laga wogga ne gawwoy harge gisha oddhe oddhe weyne daana ushuwa baaka waaxewo usshofuna.