3
Wonto maxoy Ayhuda maaquwasituse addeydo gisha
1 Ye e gishako tani Phawlosey Ayhuda maaquwa hinumeydi hissine Yesuusi Kristosa ta mare gisha tufaxe maaddhi yesineko Wonto shi'iya ta yese. 2 "Hinumbako e go'e" yeydi hissine Wontoy axuse be keenge maxo modhetiyafa densi hinuse ta hantoronike taa e matosa aadewo siidiko hi yese. 3 Ha esume womfa hatussi hinuse ta diizzonike Wontoy aachiyaka yecha be maxo addussi tamba beysiko e yese. 4 Hinuse ta diizzesesa hi zeerussa'ayko Kristosa gisha aachiya yecha Wonto maxo taase gellase eresuko hi danda'e. 5 Ha aachutti yecha Wonto maxoy Wonto Ayaana badena hayla maaqe anxuttaasitusaara kaayaxitusaara hatte be addeydesenike ha esume buro beriti giddaa yecha axituse addeydo baasso. 6 Ye aachiya yecha Wonto maxoy Ayhuda maaquwasiti modhe odo badena Ayhudaxitaara wolko Wonto suususe shahaxe u maaqenikiyara usaara wolla bidzi gara u maaqenikiyarako. Yeydiwo Wontoy Yesuusi Kristosa badena numba e gobbusese gobbose shahaxe u maaqesako.
7 Wontoy be osana hanti axuse be keenge maxo modhetiyafa densi ha modhe odo ta hantoronike taa e mato. 8 Tani fetto haylaxiti giddaafa eero ta maaddhakoni Wontoy axuse be keenge maxo modhetiyafa densi e aallicira axi erese danda'uwa Kristosa wodunte Ayhuda maaquwasituse ta ohoronike e mato. 9 Yeydiwo uddi abako meddha Wontoy olowafa ayti aasshi be gaddecho be maxo waydi e hantuttenike uddiyadese ta addussoronike e mato.
10 Yeysini e matosi ha woggaaka afaaka yese maagitaara adete keengeesitaaray Wonto zawa axita beedi laga bishana yese Wonto eraara e gaxaara u eroronikeko. 11 Wontoy nu Laaxi Yesuusi Kristosa badena ha esa e alsosi olowafa ayti koolo makki aallo "Yeydiko e maaqe" hidi be massechonikeko. 12 Kristosaara bidzo maaddhi esa ni aadesese gisha Wonto buro naassi bidzi muxhurona uqesuko ni danda'e. 13 Ye e gisha hinumeydi hissine essaaka ta yese maddhay hinuse kuxa e maaqenike erdi "Gobbo bursofita" hidiko hinumba ta shi'e.
Efesoonaxituse Wonto shi'e gisha
14 Ye e gishako ade maaqe Wonto buro bocunti ta shi'e. 15 Afaakani maaqqe sahaaka be ommana ommana yeseesiti uddi sunxe u degexesi esukofako. 16 Hinuka yese bentuwa hi oonunte minxe osa Ayaana badena Wontoy be kuxa fuula lagetiyafa hinuse inguwaye. 17 Kristosay aadexona hi muxhurowaka be zawa mati yesoronikiyara hi xhabhowara hi kaachowaray eehana miindesesa maaqoronikiyara 18 assi Kristosa eehay hadursi bade e galaltiyara oshichi bade e aaketiyara, wokke afaa an aallo e keddaydesesaara yekke sahaa an aallo e hodhesesaara haylaxitaara uddi wolko gaxhese hi danda'oronikeko Wonto ta shi'e. 19 Kumena eruttese danda'uttuwa Kristosa eeha erese hi danda'oronike facete keenguwa Wontoy beese be modhete hinuka kunxoronikeko Wonto ta shi'e.