4
1 Hatte ta hinesi biyade dhaalesi yele oddhe yesine fetto ye wodunte gara uddi ade e maaddhakoni maalame shahuttesesa maaquwasso. 2 Esadey oto woggay yoodi elloro aallo biya dicheeshitusaara ye wodunte aykeesitusaara u oomoko e yese. 3 Yeydiwo nuni aadesso badi nu yechoniyaka ha saha woga oomo aqisine e maalitako nu maaqicha. 4-5 Ohuttecha woggay elloniyaka Wonto nayshe maaqese nu danda'oronike wogase e oomo yecha numba wozese hissine be yele e anso. Maachi garafa e yelutto, wogaseni e oomo e maaddho. 6 Wonto nayshe hi maaqe gisha Wonto "Abbayo, abbayo!" hidi xheyge be yele Ayaana ansi nu muxhurowa e gaddo. 7 Ha e gisha ha makkina sekke Wonto yeleko neni baaka maala maaquwannako. Wonto yele ne maaddho gisha Wontoy be nayshushe naddhesesa uddiko ne ekke.
Phawlose maxo Galatiya axituse
8 Buro Wonto erdo badi yesine beese Wonto maaquwadi yechashitusuko maala maaddhi hi woosutticha. 9 Hattema Wonto hi erdo geede Wontoy fettoni hinumba erdo geede ye gafaxitukuwara go'uwa ha saha wogitukowara waanidini sekke hi maaqe? Waanidini sekke ye u maalita maaqese hi worge? 10 Wontaafa, agunnaafa, bargowafa, bonowafa, beraafa yeysi shati hi kuxe. 11 Hinume hissine ta gattecho hantay haliya yahowa e atteni hissineko hi gisha ta hoodde.
12 Nuundo nayshito! Tani woga eresa maaqichine hinumba bishonike hatteni hinunini "Tamba bishuwayte!" hidiko hinumba ta shi'e. Hinuni fetto taase iita hi hantoy baasso. 13 Hi erenike, acha wogga modhe odo hinuse ohese godo ta degessosi hardi hinunaara ta yechoshunako. 14 Fetto abani ta hargena taa efe dheebese danda'ichine haasso baytako, taa darri hidobaytako. Hade Wonto woosaxuke matiko fetto hade Yesuusi Kristosake matiko tamba hi motto. 15 Ha e buro hi keengicho maggay uddi ay e baado? Hinuse e danda'uttako fetto hi aafe hi garafa kessi taase ingako hi ingaane. Tani ye esuse atoko. 16 Hinne hatte hinuse aade ta oto gisha iilaxe maaddhiya ta bento?
17 Hi buro bayse axiti hi gisha eedhi maxesako u bishe. Ye u maxoy modhe hantese maaquwasso. U worgesi ususe eedhi hi maxoronike nu garafa hinumba shahesuko. 18 Tani hinunaara yeseniyawo e maaddho baane uddi woggaakawo bidzi abakoy modhe maaddhoyna esuse eedhi maxey modheko. 19 Ta nayshito! Kristosa garawo hi miimoro aallo sekke hi gisha zerso maddhake orjenako ta maddhunge. 20 Hatte hi gidda benti burosume arsi fede ogena hinuko zeerese orjena worgoko ta worgicha. Aba hinuse ta hantesi ta buro e baanne maddhundiko ta yese.
Aggaare gishaara Saara gishaara
21 Hinuno woga oomo aqe worgeesito, haaya mee, taase ohuwayte. Wogay ohesa siido baytuwa? 22 Fissharowa Abrahaamey lam'i na'axhe e yellonike diizuttiko e yese. Bidzo yellanni maakiyo maaqichanniyoko lakko yellanni maakiyo maaquwadecha indoko. 23 Ye maaki'i yeley yeluttosi axi maxona maaqusune ye maakiyo maaquwadechanni yelemay Wontoy "Ingako ta inge" hidi gobbusechoshuna yeluttasuko. 24 Ha lam'i indowaxhiti lam'i caaqo beysesako u maaqicha. Bidzi Aggaareko. Isini Sinna bakkaa maaddha caaqoko i beyse. Maaketose maaqe nayshuko i yele. 25 Aggaarey Arabe wude yese Sinna bakka beysesa maaqisine hatte ha saha gara yese Yerusaleeme gisha maaddhiko i bente. Isini be nayshitaara maaketowako i yese.
26 Maakiyo maaquwa indoy beysesi afaa yese maakiyo maaquwa Yerusaleemeko. Isoko numba yella indoy. 27 Ha esini
"Neno nayshe yelluwanniye meendesenniye magguwa! Neno zersi eruwaniye ililli hiwwa! Ade keenge indome i adey iso dhaddese indoko laga nayshe keengesa" yeydiko e diizuttese.
28 Nuundo nayshito! Hinunini hade Yissaaqeke Wontoy "Ingako ta inge" hidi gobbusechooshuna yelutta nayshitako. 29 Yenniyani axi maxona yeluttechashi Wonto Ayaana maxona yeluttechashe waayye beysonike hanzoni yeydiwoko. 30 Hayla Fissharoy abaydina hine? Hayla Fissharoy "Maaki yello yeley maakiyo maaquwa indoy yello yeliyara fetto e dhaaluwa gisha maakiyo i yelliyara goodduwa!" yeydiko e hine. 31 Ha e gisha, nuundo nayshito, nuni maakiyo maaquwa indo nayshitako baaka maaki nayshita maaquwanxhiko.