Anxutta Phawlosey Galatiya Wudaxituse Anso Woosso
1
Burona sawo
1 Axukofa oo'oyne axuna e maaddho baanne Yesuusi Kristosanaara haybowafa esa densa ade maaqe Wontonaara anxuttase maaddhi maagetta Phawlosekofa. 2 Taara uddi taara yese indo nayshaaray Galatiya wudiya be godowa godowa yese Wonto zawa axituko ha woosso nu anxe.
3 Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.
4 Nuuse ade maaqe Wonto maxoke ha iita sahaafa numba kessese Kristosay nu cubbo gishako biya garsi e indo. 5 Koolo aallo Wontose kuxay maaquwaye. Ameen.
Phawlosey oto modhe odome fede modhe odoy baasso
6 Kristosa badena axuse be keenge maxo modhetiyafa densi hinumba xheydecha Wonto dhaddi fede modhe odo hidi hiinessaa alleydi artiya hi yesesi micushako taa e micushe. 7 Hi buro bayseesitaara Kristosa gisha ohe modhe odo arxese worgeesitaaray bidzi bidzi axiti u yesesa baaka aadewo fede modhe odoy baasso. 8 Nuuni e maaddhako oo'oyne afaafa yooda Wonto woosaxeni fetto e maaddhako nuni hinuse otecho modhe odome fede modhe odo hidi hiyuttesa hinuse e oho'ayko ye esi aacuttesesa maaquwaye. 9 Ha esume buro nu otechonike hatteni kossiko ta ohe. Hinuni siidi hi ettecho ha modhe odome fede modhe odo hidi hiyuttesa ooneni hinuse oho'ayko aacuttesesa maaquwaye.
10 Hine tani worgesi axi tamba nashorosuwani Wontoy tamba nashorosani? Tani worgesi axe maggusesuwa? Axe maggusese wordessakoma Kristosa maala maaquwadiko ta yecha.
Phawlosey ohe modhe odo gisha
11 Nuundo nayshito! Hinuse ta oto modhe odoy axukofa bentase e maaquwannikeko hi erorosa ta worge. 12 Ye esani taase addusay Yesuusi Kristosako baaka axukofa etto baasso, axini tamba erusso baasso.
13 Buro bidzi muxhurona Ayhuda wogana ta yechonike siidiko hi yecha. Wonto zawa axita higilsa keenguwasa uso waayye beysi baysese ta worgicha. 14 Ta yecho beraa ta makko maaqicha laga Ayhudaxitukafa woga kafena uso uddi garoko ta garicha. Nuwadiyaxhiti woga gishani usume gardi eedhesesako ta maaqicha.
15-16 Wontoy ta yelutto baanneko burowo taa e xhardo. Ayhuda maaquwasituse e yele gisha modhe odo ta ohorosa be yele taase addusese be wordo wogga be keenge maxo modhetena taa e xheydo. "Hatte am ta hanto?" hidi esaara wolko maxo ta arsosi baasso. 17 Yeydiwo taame buro anxuttaasita maaqichashitaarani wolla muhese Yerusaleeme hando baasso. Usuko hamekofa Arabe wudeko ta hando, yahafani maaddhi Damasiqo hanke ta yoodo.
18 Haydzi bera geede Phexhrose beyese Yerusaleeme handi e da'aa tamma ichichi wonta aallo ta decco. 19 Esaara Laaxi Yesuusayndo na'e maaqe Yayqoobiyara ta beedosa baaka anxuttaasittaafa feda ooneni beedo baasso. 20 Wontoy erenike ha esa hinuse diizisine ta ohesi aadeko zaadduwasso.
21 Ye e geedeni Sooriya wudiyakaara Kilqiya wudiyakaarako ta hando. 22 Kristosa aadessi Yuuda wudiya be godowa godowa yese Wonto zawa axiti taara muti deemona taa eruwadiko u yecha. 23 "Buro numba waayye beysicha axi baysese be hicho aadexo gisha hatte erusiyako e yese" yeydi hine odowoko u siidecha. 24 Ta gishani Wonto u galaticha.