9
Haylaxita mare miijhe kesse gisha
1 Yuuda wudiya yese haylaxituse miijhe kese gisha hinuse diize worgusuwasso. 2 Ye esini Akkaya wude yese hinuni ye usita marese modhe hi massechosha erako ta ere. "Akkaya yese aadexeesiti zimberiyafa ayti marese naquttiko u yese" yeydi hissineko Maqadoonaxiti buro hinumba ta nassheshe. Fettowo hinuni marese hi naquttosi fede laga axitini maroronike matiko e yese. 3 Ha esuse hinumba nu nasshecho nashoy "Yahoko u nashicha" hidi nu hiyutteeme ye indo na'axhitako ta anxe. Buro hi gisha fedeesituko ta zeerdonike miijhe hanti taa kakkuwayte. 4 Haliya Maqadooniya axiti taara wolko handi hi hanto baanne u beeta'ayko hinumba nu nashe gisha borsako nu borse, hinunini orjenako hi borse. 5 Ha e gisha "Ingako nu inge" hidi hi hidecho miijhe burona hi hantorosa hinumba u maxusorosa hidi hissine hinuko ta hangeesume e buro ha indo na'axhita "Hanguwayte!" hidi hiyey taase worgusesa maaddhi bentiko e yese. Ye e bishanako hinuko ta hangeniya hantutti e kakke. Hi ingesini osana hi garafa ettosa e maaddho baane hi eehana hi indonikeko e beyse.
6 "Oddhe ayllasi oddhe kaxako e bhikkile, laga ayllasi laga kaxako e bhikkile" yeydi hinesa gaxhuwayte. 7 Wontoy eehesi maggana inge axe e maaqe gisha be bidzi bidzina be muxhurowanna "Ha esako ta inge" hidi be hidosa inguwaye baaka higilisine oo'oyne "Inguwa!" hidi e hiyutto gisha indoppe. 8 Uddi wogga uddi worguse abako degessi modhe hanta uddi hantese hinuse e worguseesume afana garsi Wontoy axuse be keenge maxo modhetiyafa densi hinuse lagusesuko e danda'e. 9 Ye esini "Jherdi jhi'ituse e indo, e gizeteni koolo makki aalloko e yese" yeydiko e diizuttese.
10 Aylesuse mor'e miyose kaxa inge Wontoy hi ayle mor'e kunsi garsiko e inge, hi gizeteni laga aafe kaxhoronikeko e mahe. 11 Hi inge ingo aandi ususe nu elluse axiti Wonto u galatoronike uddiwo jherdi hi ingoronike Wontoy uddi basuko hinuse kossi kossi e inge. 12 Miijhena hi mare maroy haylaxiti be jhi'etiyafa u kesorosawo e maaddho baane Wontose laga axiti orje galata u uqusorosako e mahe. 13 Miijhe ingena hi mare maroy Kristosa gisha ohe modhe odo etti woosutteesita hi maaqenikiyara ususaara fedeesitusaara ingesa hi maaqesaara e beyse gisha be uddinako Wonto u galate. 14 Wontoy axuse be keenge keddaydese maxo modhetiyafa densi hinuse modhe e hanto gisha usini hinumba sazziko hinuse Wonto u shi'e. 15 Axi zeerdi danda'uwa be ingona Wontoy galatuttesesa maaquwaye.