15
Kristosay haybowafa dendo gisha
1 Hatteni nuundo nayshito! Hinuse ta otecho modhe odo hinumba maxusesuko ta worge. Ye modhe odoni hi ettechoshaara esuna miindi hi eedhechoshaarako. 2 Hinuse ta oto kato minsi aytako ha modhe odonako hi loole. Ye esi dheeddakoma hi aadesosi yahoko.
3 Uddi abakome afana maaqesa taase ta etto geede hinuse zeerdiko ta yecha. Ye esini Hayla Fissharowa e diizuttesenike Kristosay nu cubbo gishako e haydho, 4 e moogutto, Hayla Fissharowa e diizuttesenike haysso wonte haybowafa e dendo. 5 Yeydiwo Phexhroseni esa beedo, ye e geedeni e erusicho tamma lam'i esa u beedo. 6 Ye e geedeni biya aadexicha ichichi xhiixe gareesituse bidzi woggaawo e bento. Ye usaafa lagiti hatte aallo yesako u yese, bidzi bidzitimay haydhiko u yese. 7 Ye e geedeni Yayqoobey beedo, anxuttaasitini be uddina esa u beedo.
8 Aalliciraaka hade kessake yese taase assi e bento. 9 Ye esini tani anxuttaasitume uddi eeroko. Wonto zawa axita waayye beysesa ta maaqicho gisha "Anxuttasuko" hidi xheyguttese bishuwassho. 10 Hidakoni hatte ha esa yeydi ta maaddhoy Wontoy axuse keenge modhe maxowafako. Wontoy taase keenge modhe maxoy yaho atto baasso. Fetto fedeesitume uddime garsi lagussi hantiko ta yese. Yeydi ta hantosini taa e maaddho baane Wontoy be maxo modhetiyafa dendasuna taaka gaddosunako. 11 Yoonase taani maaqqe ye usiti ohesi ha modhe odoko. Hinunini "Aadeko" hidi hi ettosi ha esawoko.
Haybo denxo gisha
12 "Kristosay haybowafa dendiko yese" yeydi ohuttesa e maaddho geede hinne abasuna hinukaafa bidzi bidziti "Haydhay denduwasso" yeydi u hine? 13 Haybowafa dendey dheeba'aykoma Kristosay haybowafa dendo baasso yeydi hiyoko. 14 Kristosay haybowafa dendo baasa e maaddhako nu erusesini yahoko e maaqe, hi aadexoni yahowoko. 15 Haydhecha axiti haybowafa u dendesi aade maaqe e dheeddako Wontoni Kristosa haybowafa denso baasso yeydi hiyoko. "Wontoy Kristosa haybowafa densiko yese" hidi nu erusosuna fetto zaadena Wontose atteydasita maaddhiko nu yese hidi hiyoma! 16 Ye esini haydhecha axiti haybowafa denduwasa u maaddhako Kristosani haybowafa dendo baasso hidi hiyoko. 17 Kristosay haybowafa dendo baasa maaddhako hi aadexoy yahowoma! Hinuni hatte aallo hi cubbowafa maarutto baytako yeydi hiyoko. 18 Yeydi e maaqo'ayko Kristosa aadessi haydhasiti baadiko u yese yeydi hiyoma! 19 Kristosa gara gobbo nu keengesi ha saha gara nu yese yesosewo e maaddhako axume uddi nuuse higilusoositako nuni.
20 Hattema Kristosay haydhi dendeesitukafa burona dendase maaddhi aadena haybowafa dendiko e yese. 21 Ye esini axi hay'oronike bidzi axi badena e maaddhonike axi haybowafa dendesini e maaddhosi bidzi axi badenako. 22 Axi uddi Addaame badena e hay'enike yeydiwo axi uddi Kristosa badenako yeso e degexe. 23 Ye esini maaqesi be woggana wogganako. Haybowafa acha denday Kristosako. Ye e geedeni e yooneniya esuse maaqeesiti haybowafako u dende. 24 Ye e geedeni ha saha aalliciray e maaqe. Yenniyani Kristosay maagetoni, adetoni, osani uddi iisshi baysi kaateto ade maaqe Wontose e inge. 25 Ye esini Wontoy iilaxita uddi e adeto oomo be mahe aallo Kristosay kaatoronikeko esa e worguse. 26 Iilaxitaafa aallicira iichutti baanesi hayboko. 27 Ye esini "Wontoy uddi abako Kristosa adeto oomoko e matese" yeydiko e diizuttese. Hidakoni "Uddi abako e adeto oomoko e matese" hidi e hiyuttusune uddi abako e adeto oomo mata Wontoy beese Kristosa oomo e maaquwannike addako. 28 Uddi abakoy Kristosa adeto oomo maaddho geede ade maaqe Wontoy bidzini atto badi uddi basi gara adeto keengoronike yeley beese uddi base be adeto oomo mataasuse esuse assi e adeto oomoko e maaqe.
29 Yoonase haydha axiti denduwasa u maaddhakoma haydhasitume hissine xhamaqutteesiti u xhamaqutte xhinqatey aba birchena e keenge? Fetto denduwasa u maaddhakoma axiti u gisha abasuna u xhamaqutte? 30 Nunichi? Uddi wogga nu lubbose nu jhasshoshi abasuwa? 31 Nuundo nayshito! Uddi wonteko tani ta hay'e aallo ta kardutte. Ha esani hinuse ta ohesi Laaxi Yesuusi Kristosa badena hinunnana ta cee'utte gishako. 32 Efesoone hade bo'oke yese axitaara ta karduttosini ha saha yesosewo e maaddhako taase bentesi aba ommani? Haydha axiti haybowafa denduwasa maaddhako "Guta nu hay'e gisha nu miyyeese, nu ussheeshe" yeydi hine axituke maaqema!
33 Hallofita! Iita axaara feyshey axi maxo modheko e iise. 34 Hinumba erdi maaquwayte, gizetena yesuwayte. Ha e geede sekke cubboni hantofita! Hi giddaa Wonto eruwasitako bidzi bidziti yesa. Ha esani ta ohesi hi borsorosako.
Haybowafa nu dendeniya nu degexe gara gisha
35 Bidzi axi "Haydhecha axiti u dendesi waanidini? Haybowafa u dendoyna u garay waakidesesana?" yeydi hissineko oyceshe e danda'e. 36 Doo neno muya! Ne ayle mor'ey be haydho baassa wokke mu'uwasso. 37 Neni gosani maaqqe fede kaxa aylisine e aafeko ne aylesa baaka geede mudhi bente mazzaara e aafiyara maaquwasso. 38 Wontoy ye aylutta mor'ese be eehenikeko gara e inge. E bidzi bidzi mor'eseni be bishana be bishana yese garako e inge.
39 Achoy uddi bidzi bisha maaquwasso. Axi achoy bidzi bishako, keemosaara bo'itusaaray fede bishako, kafiti achoy fede bishako, gulxhe achoy fede bishako. 40 Afaa yeseesiti beese be bisha garako u keenge, sahaa yeseesiti beese be bisha garako u keenge. Afaa yeseesiti be bisha kuxa fuulako u keenge, sahaa yeseesitini fede bisha kuxa fuulako u keenge. 41 Qoossi keenge kuxa fuulay bidzi bishako, agunnay keenge kuxa fuulay fede bishako, assi xhoolintey keenge kuxa fuulay fedako. Bidzi xhoolintey fetto fede xhoolinteme shahuttese kuxa fuulako e keenge.
42 Haybowafa dende axiti aba u bisheshako hinuse ta ohe. Axi garay sangesa maaddhi e moogutte, sanguwasa maaddhi e dende. 43 Kuxa keenguwasa maaddhi e moogutte, kuxa fuula keengesa maaddhi e dende. Gafaxe maaddhi e moogutte, osaxe maaddhi e dende. 44 Ha sahaafa be maaqesuna e moogutte, afaase be maaqesuna e dende. Ha sahaafa maaqe garay yessa'ayko afaafa maaqe garay yesako e yese.
45 Ye esini "Buro axe maaqicha Addaamey yeso keengesa e maaddho" yeydiko e diizuttese. Geede Addaamey yeso inge Ayaanako e maaddho. 46 Buro yoodasi afaafa maaqesa maaddho badi e yesune sahaafa maaqesako, ye e geedeni afaafa maaqesi e yoodo. 47 Buro yooda axi sahaafa benta ha sahaafa meddhutta axuko. Lakkunxo axi afaafa yoodasuko. 48 Ha sahaafa maaqeesiti ha sahaafa meddhutta axuko u bishe, afaafa maaqeesiti afaafa yooda axuko u bishe. 49 Ye sahaafa meddhutta axe ni bishonike yeydiwo ye afaafa yooda axeni bishako ni bishe.
50 Nuundo nayshito! Hinuse ta ohesi achowara suuxaara maaqe garay Wonto kaatetiya geluwasso. Yeydiwo sange garay sanguwasa degexuwasso.
51 Yebo, aachiya yechine hatte addeyda bidzi basuko hinuse ta ohe. Nu uddina nuni hay'uwanxhiko, nu uddinama artoko nu arte. 52 Nu artesini aallicira marachoy uwwutteniya hade aafe qibheke bidziyakawoko. Ye esini marachoy uwwutte, haydhecha axitini sanguwasa en'a maaddhi u dende, yenniyani nu arte. 53 Ye esini sangesi sanguwassaa hay'esini hay'uwassaa arteko e worguse. 54-55 Sangesi sanguwassaa hay'ichashi hay'uwassaa e arte woggaaka
"Hayboy iichutti e baado!
Haybo, ne iichichoshi ayn yese?
Haybo, axe miidhicha ne osay ayn yese?"
yeydi diizuttechashi yenniyako e ite.
56 Hayboy axe esuna be miidhe osa e degexesi cubbowafako. Cubboy osa e degexesi wogaafako. 57 Hattema nu Laaxi Yesuusi Kristosana iicho nuuse inge Wontoy galatuttuwaye.
58 Yoonase ta eehe nuundo nayshito! Miindi ee'uwayte, bidzi abakonani sekke hanke hidofita, Laaxi hantase hi gakkesi yaho e maaquwasa erdi uddi woggaa Laaxi hanta hantese oseywayte.