12
Ayaana Geeshi inge ingo gisha
1 Nuundo nayshito! Hatte assi Ayaana Geeshi inge ingo gisha hi erorosako ta worge. 2 Aadesso baasita hi maaqichoniya sekke hanke goochutti zeerese danda'uwa kuchena naquttese Wonto maaquwa wontoko hi hangichonike erako hi ere. 3 Ha e gisha ha lam'i zeere hi erorosako ta worge. Ye esini ooneni Wonto Ayaanana zeerisine "Yesuusay aacuttesesako" hidi hinesi baasso. Yeydiwo Ayaana Geeshuna maaquwasa ooneni "Yesuusay Laaxuko" hidi hinesi baasso.
4 Ayaana Geeshi ingoy be bishana be bishana yesesako, Ayaanamay bidziko. 5 Wonto zawaaka hantay be bishana be bishana yesesako, Laaximay bidziko. 6 Hantuso ogey be bishana be bishana yesesako, uddi hanta uddi axukaanna hantesimay bidzi Wontoko. 7 Wontoy uddiyade go'esuko uddiyadiyaka Ayaana Geeshi hantenike beysesa e indo. 8 Ayaana Geeshi bidzi axuse gaxuna e zeeroronikeko e mahe, ye Ayaanawoy assi fede axi erana zeeroronike e mahe. 9 Ye Ayaanawoy bidzise orje aadexo e inge, ye bidzi Ayaanawoy feday fede axe loolusoronike ingo e inge. 10 Yeydiwo fedaseni micushe hanta e hantoronike osa e inge, fedaseni assi kaayo zeere e zeeroronike e mahe, fedaseni assi ingutta ingiti Ayaana Geeshukofa e maaqesani oo'oyne xhoozukofa e maaqesani shati e eroronike e mahe. Yeydiwo fedaseni kille nuunana e zeeroronike e mahe, fedaseni assi kille nuunana zeeruttesa bircheshe e danda'oronike e mahe. 11 Ye esa uddi hantesi ye bidzi Ayaanawoko, axuse e bidzi bidzise be worgenike shahuttese ingoko e inge.
Bidzi garay be sunxe sunxe keenge gisha
12 Garay bidzo maaqisine be sunxuna sunxunako e yese. Ye be sunxuna sunxuna sundi laga e maaddhakoni garay bidzowoko. Kristosani ye esuke yesesako. 13 Yeydiwo Ayhudaxitani maaqqe Ayhuda maaquwasitani, maalani maaqqe maala maaquwasita nu maaddhakoni bidzi gara maaqese Ayaana Geeshuna xhamaquttiko nu yese, nu uddinani ye bidzi Ayaanakofa nu ushoronike maaddhiko e yese. 14 Ye esini garay laga be sunxuna sunxunako e yese. Be sunxuna sunxuna yessakoni bidzi bishawo maaquwasso. 15 Tokey "Tani kuche ta maaquwa gisha gara shaho maaquwasso" yeydi hidako hinne yeydi be hidosuna gara maaqe dheeba e dheegge? 16 Washeni "Aafe ta maaquwa gisha gara shaho maaquwasso" yeydi hidako hinne gara maaqe dheeba e dheegge? 17 Garay be kumena aafe goshewo maaddhesesako abanani siyese danda'asho? Garay uddi washewo maaddhesesako abanani sinqese danda'asho? 18 Hattema Wontoy be eehenikewo be sunxuna sunxuna yese garay be bidzina bidzina be godo godo ayti bidzi garaaka e bentoronikeko e matese. 19 Garay bidzi bishawo e maaddhesesako kume garay ayafani bentaane? 20 Hattema garay be sunxuna sunxuna yese laga maaddhakoni bidzowoko.
21 Aafey kuche "Niya taase worgusuwasso" yeydi hiyese danda'uwasso. Assi qinoni toke "Niya taase worgusuwasso" yeydi hiyese danda'uwasso. 22 Gara shahowafa osa keenguwasa bisshi bentesi fetto worgusesako. 23 Nu gara shahowafa kuxuttuwasita bisheeshita modhussiko uso nu kuxe, nuu borsusesa bisshi bente nu gara modhussi kussiko nu kakke. 24 Nuu borsusuwa fede nu gara shahose ye esa uddi worgusuwasso. Wontomay kuxa facecha garituse gardesesa u kuxuttoronike matiko be shahona yese garita hanke wola e ayso. 25 Yeysini e matosi be sunxuna sunxuna yese garay woluse u maxorosako baaka wol garafa u shahuttorosa maaquwasso. 26 Gara shahowafa bidzi maddhungusune ye e shaho maaqe atta garitini be uddinako ye esaara u maddhunge. Gara shahowafa bidzi kuxuttusune atta garitini be uddinako esaara wolla u magge.
27 Yoonase, hinunini Kristosa garako, hi bidzi bidzinani e gara shahitako. 28 Wontoni be zawaaka be shahona shahona yese hanta hanteesita shati gaddiko e yese. Bizunxo anxuttaasita, lakkunxo kaayaxita, haysso eruseesita mati e gaddo. Assini micushe hanta hanteesita, feditani axe looluseesita, feditani axe marese danda'eesita, feditani assi axe ahese danda'eesita yeydiwo kille nuunana zeerese danda'e axita mati e gaddo. 29 Uddi anxuttaasituwa? Be uddinani kaayaxituwa? Uddinani eruseesituwa? Uddinani micushe hanta hanteesituwa? 30 Be uddinani axe looluse ingo keengeesituwa? Be uddinani kille nuunana zeereesituwa? Be uddinani ye kille nuunana zeeruttase bircheshe danda'eesituwa? 31 Ha e gisha uddi ingowafa gardese ingita oseydi worguwayte.
Hatte assi uddime gardese ogeko hinumba ta beyse.