8
Wonto maaquwasuse kaashutta acho miye gisha
1 Hatte, Wonto maaquwasuse kaashutta acho miye gisha ta ohesa siwwayte. "Nu uddina erako nu keenge" yeydi nu hinesi eruttesesako. Hidakoni eray waarusuko e waaruse, eehamay dichako e diche. 2 "Erako ta keenge" yeydi maxe axi yessako e worguse aallo erdo baasso. 3 Wonto eehe axema Wontoy erako e ere.
4 Yoonase Wonto maaquwasuse kaashutta acho miye gisha ta hinesi ha saha gara kuchena naqutta "wontoko" hidi hiyuttesi maruwasa e maaqenikiyara bidzi Wonto baaka fede wontoy baanikiyara erako nu ere. 5 Laga be bishana bishana yese "wonto" hidi xheygutteesitaara "laaxe" hidi xheygutteesitaarako yesa. Afaakani maaqqe sahaakani "wonto" hidi xheygutteesiti yessakoni 6 nunimay uddi abako meddhase maaqesaara nunini esuse yese ade maaqe bidzi Wontowarawoko nu keenge. Yeydiwo uddi abakoy esuna meddhuttosaara nunini esuna yese bidzi Laaxi Yesuusi Kristosaarako nu keenge.
7 Fede Wontoy baanikiyara nu erdakoni uddi aadexeesiti ha esa eruttuwasso. Bidzi bidziti be aadesso aallo Wonto maaquwa wonto kuxe buro be losso gisha u muune achoy aadewo osa keenge Wonto maaquwasituse e kaashuttonike matiko u beene. Ye esuna u muxhurowa "Muudofuna!" yeydi e hine gisha "Tuneydiko ne yese" hidiko e hine. 8 Kaxay Wontoy modhe aafena numba beyorosa mahuwasso. Miye nu dheeddakoni nuuse face basi baasso, nu muudakoni nuuse kose abakoni baasso.
9 Kaashutta acho hoodde baaka hi muunesi aadexona miindo baasituse dhumo e maaqeeme hinumba kakkuwayte. 10 "Am ta hoodde?" hidi hissine era keendi kaasha zawaa kaashuttese acho ne muusune e muxhurowa "Muudofuna!" yeydi e hine axi niya beedako ye ne hantay ye axi kaashashe kaashuttechashe e miyoronike esa naassusuwaye? 11 Ye e gisha "Tani eraxuko" hidi ne hidosuna Kristosay esuse haydhecho be aadexona miindo baa aadexichashi baattako e baane yeydi hiyoko. 12 Ye esuna aadexe hinindo nayshita miidhenaara "Muudofuna!" yeydi hine u muxhuroy hooddoronike mahenaara Kristosako hi miidhe. 13 Yoonase aadexicha nuundo nayshaafa bidzo kaxay dhumusesa maaqo'ayko esa ta dhumuseesume hissine koolo makkina acho muuwasso.