5
Aadexeesiti gidda meddhutta borsuse hanta gisha
1 Hi giddaa borsuse laggetoy yesesako odusuttiya yesa. Yeenke yese laggetoy aadesso baasiti da'aani fetto hantuttuwassako. Ye esini biyade macho hade be machike matesesako yesa. 2 Hinne yeenke yese borsuse zeerey hi giddaa yesune ame hi nashutte? Nashuttekofa higilli ha e bisha hanta hante axe hi giddaafa ooxey hinuse bishuwaye? 3 Fetto tani abani hinunaara wolla yaha yese dheeddakoni ta maxona hinunaara wolkoko ta yese. Hade hinunaara wolko yese axukeko ha esa hanta axi gara yaadhi alsi ta yese. 4 Laaxi Yesuusa sunxuna hi bhikkilutte woggaa tanini ta maxona hi giddaa ta bente gisha hi giddaaka yese Laaxi Yesuusa osana 5 yeenke yese axe Humbayese garsi inguwayte. Yeysi hi mahesini ye cubbachi e acho maxoy baadi e lubboy Laaxi yoone wonte looloronikeko.
6 Yebo, hi nashuttesi modhe maaquwasso. Oddhe iraacitey laga liixhe denxesa eruwaytuwa? 7 Iraacitey essaa baa hade kille liixheke hi maaqoronike dhooqo iraacite hinukafa ooxuwayte. Hattema hinuni iraacite keenguwa liixheko. Ye esini Garo Massalase nuuse dore maaddha Kristosay kaashuttiko e yese. 8 Ha e gisha be bishana bishana yese iitetey essaa kundese dhooqo iraacite e maaddho baanne iraacitey essaa baa gizetiyara aadiyaray essaa kundese helto boorana nu massala nu kuxxoose.
9 Ha e buro hinuse ta diizzo woossowa "Laggeteesitaara wolla feysshofita" hidiko ta hidecha. 10 Yeydi ta hidosini "Wonto aadesso badi yesine laggeteesitaara, uddi abakose habbu habbu hineesitaara, kaysitaara yeydiwo Wonto maaquwasita Wonto mati kuxeesitaara wolla feysshofita" hidi hiye maaquwasso. Yeydi e maaddhesakoma ha sahaafa fetto keseko hinumba e worgusicha yeydi hiyoko. 11 Hatte hinuse ta diizosi "Tani aadexesako" hidi hissine laggeteesitaara, uddi abakose habbu habbu hineesitaara, Wonto maaquwasita wonto mati kuxeesitaara, axi sunxe bayseesitaara, usshi goojheeshitaara, oo'oyne kayseesitaara wolko feysshofita, fetto kaxa usaara muudofita. 12 Aadexuwasiti gara yaa'ese essaa taa gelsesi baasso. Hinuni yaa'iya hi yesesi aadexeesiti giddaa yeseesiti gara maaquwaye? 13 Aadexuwasiti gara yaa'esi Wontoko. Yoonase "Ye iita axe hi giddaafa ooxuwaytea."